រាជធានីភ្នំពេញ ៖ រឿងតំឡើងឋានន្តរសក្តិ គឺជាប្រធានបទក្តៅគគុកដែលមហាជនតែងតែចង់ដឹងថា តើការតំឡើងឋានន្តរសក្តិនៅតាមស្ថាប័នរដ្ឋនីមួយៗកន្លងមកពិតជាធ្វើបានយ៉ាងសុក្រិត យុត្តិធម៌ ឬយ៉ាងណា ព្រោះមានពាក្យខ្សឹបគ្នាតាមតុកាហ្វេកន្លងមករឿងភាពមិនប្រក្រតីមួយចំនួនពាក់ព័ន្ធនឹងបញ្ហានេះ ។
យ៉ាងណាមិញ សម្តេចតេជោហ៊ុន សែន នាយករដ្ឋមន្ត្រីកម្ពុជាបានប្រកាសនៅថ្ងៃទី០៦ ខែឧសភានេះថា ការតំឡើងឋានន្តរសក្តិកន្លងមកនឹងត្រូវត្រួតពិនិត្យឡើងវិញគ្រប់ស្ថាប័ន-ក្រសួង ទាំងអស់ ដែលធ្វើឲ្យមហាជនសាទរនឹងចំណាត់ការនេះ ។
សម្តេចនាយករដ្ឋមន្ត្រីបានបង្ហោះសារក្នុងហ្វេសប៊ុកសម្តេចយ៉ាងដូច្នេះថា ៖ «ថ្ងៃនេះខ្ញុំសូមប្រកាសថា ខ្ញុំនឹងពិនិត្យឡើងវិញនូវការតម្លើងឋានន្តរសក្តិ និងថ្នាក់នៅក្នុងក្រសួង មន្ទីរ ស្ថាប័នទាំងអស់កន្លងមកថា តើបានតំឡើងឲ្យមន្ត្រី និងកងកម្លាំងក្នុងក្រសួងរបស់ខ្លួនបានត្រឹមត្រូវទៅតាមការកំណត់ក្នុងច្បាប់ហើយឬនៅ» ។ សម្តេចតេជោ ហ៊ុន សែន បានបន្តថា ៖ «រដ្ឋមន្ត្រីដែលគ្រប់គ្រងគ្រប់ក្រសួងទាំងអស់ ត្រូវយកចិត្តទុកដាក់លើរឿងនេះ គឺត្រូវតំឡើងឋានន្តរសក្តិឲ្យបានត្រឹមត្រូវទៅតាមច្បាប់កុំធ្វើតាមតែបទបញ្ជា ហើយកុំគិតតែតំឡើងឋានន្តរសក្តិ និងតួនាទីរបស់ខ្លួន ឬបក្សពួកខ្លួនមិនបានគិតគូរដល់មន្ត្រីនៅក្រោមឱវាទ ។
តាមច្បាប់នៅក្នុងក្របខណ្ឌមន្ត្រីរាជការស៊ីវិល គឺក្រោយរយៈពេល០២ឆ្នាំត្រូវស្នើសុំតំឡើងឋានន្តរសក្តិចំនួន០១ដង ។ ដូច្នេះតើគ្រប់ក្រសួងស្ថាប័នទាំងអស់បានធ្វើត្រឹមត្រូវតាមការកំណត់ក្នុងច្បាប់ហើយឬនៅ?» ការប្រកាសចាត់វិធានការនេះបានធ្វើឲ្យមហាជននាំគ្នាចែកចាយនូវការប្រកាសរបស់សម្តេចជិត៦ពាន់ដង និងមានបញ្ចេញមតិជាច្រើនគាំទ្រ ហើយបងប្អូនខ្លះបានសរសេរអរគុណសម្តេចដែលមើលឃើញចំណុចនេះ ។ នេះជាការលើទឹកចិត្តដែលជម្រុញដល់សម្លេងឆ្នោត ។ អ្នកខ្លះទៀតបានអះអាងក្នុងហ្វេសប៊ុកសម្តេចដោយចោទប្រកាន់ថា «កន្លងមកមានការតែងតាំងតែបក្សពួក» ដូចជាស្ថាប័នខ្លះក្នុងតួនាទីដូចគ្នា អ្នកបម្រើការងារចាស់ៗជំនាន់ឪពុកគេដល់ពេលកូនគេរៀនចប់មកវិញបានតួនាទីដូចគ្នា តែឲ្យកូនពាក់ស័ក្តិលើកអ្នកចាស់ជាដើម ដែលនេះជាការវាយប្រហារទឹកចិត្តធ្ងន់ធ្ងរថា តើគាត់ទៅផ្ទះគាត់ប្រាប់ប្រពន្ធកូនគាត់យ៉ាងមិច ក្នុងគ្រួសារគាត់មានសមាជិកត្រូវបោះឆ្នោតប៉ុន្មាននាក់ ។
រឿងមួយទៀតការបង្កើតក្រុមការងារចុះជួយបក្ស ខ្ញុំមើលឃើញផលចំណេញតិចណាស់ព្រោះថា ការចុះនេះបានតម្រូវឲ្យមន្ត្រីថ្នាក់ក្រោមចុះដោយចំណាយថវិការប្រមូលពីការិយាល័យដូច្នេះម្នាក់ៗប្រឹងរកលុយមកចូលចង់មិនចង់ត្រូវតែរកលុយអ្នកផ្ទះមកចូលដឹងទេថា អ្នកផ្ទះសួរថា ឯងខំនេះពេលឈ្នះឆ្នោតបានអីមកវិញ នេះជាសំនួរគ្មានចម្លើយ ។ ពេលចង់បានតួនាទីត្រូវដេញថ្លៃគ្នាស័ក្តិត្រូវឡើង បើមិនឲ្យលុយគេមិនធ្វើឲ្យបានហើយត្រូចំណាយលុយឲ្យថ្នាក់ដឹកនាំមកប្រកាសពាក់ ៕
ចែករំលែកព័តមាននេះ