ខេត្តបន្ទាយមានជ័យ ៖ គ្រោះថ្នាក់ចរាចរណ៍រវាងម៉ូតូបុករថយន្តកើតឡើងកាលពីវេលាម៉ោង៥និង៣០នាទីល្ងាចថ្ងៃទី៥ ខែឧសភា ឆ្នាំ២០១៨ លើកំណាត់ផ្លូវជាតិលេខ៥៦ ត្រង់ចំណុចមុខវត្តម្កាក់ ស្ថិតក្នុងភូមិម្កាក់ សង្កាត់ម្កាក់ ក្រុងសិរីសោភ័ណ ខេត្តបន្ទាយមានជ័យ បានបណ្តាលឱ្យស្លាប់ម្នាក់នឹងកន្លែងកើតហេតុ និង របួសស្រាលម្នាក់ ។
លោកវរសេនីយ៍ទោ សួន នីប៉ូ នាយរងការិយាល័យ បានឲ្យដឹងថា ជនរងគ្រោះទាំង២នាក់ អ្នកបើកម៉ូតូឈ្មោះរស់ សារឹទ្ធ ភេទប្រុស អាយុ៤៧ឆ្នាំ ត្រូវជាឪពុក រស់នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ រងរបួសស្រាល ចំណែកអ្នករួមដំណើរជាកូនឈ្មោះរស់ បូរី ភេទប្រុស អាយុ១៦ឆ្នាំស្លាប់នៅនឹងកន្លែងកើតហេតុ ។
អ្នកបើករថយន្តឈ្មោះហេង លីដា ភេទប្រុស អាយុ៣១ឆ្នាំ នៅភូមិវាលទ្រា ឃុំអូរតាគី ស្រុកថ្មគោល ខេត្តបាត់ដំបង ត្រូវបានកម្លាំងនគរបាលចរាចរណ៍នាំមកសួរនាំជុំវិញករណីគ្រោះថ្នាក់ចរាចរណ៍នេះ។
តាមប្រភពព័ត៌មានបានឱ្យដឹងថា មុនពេលកើតហេតុ អ្នកបើកបរម៉ូតូជាឪពុកបានដឹកកូនប្រុសធ្វើដំណើរចេញពីផ្លូវលំឡើងមកលើផ្លូវជាតិ ក្នុងទិសដៅពីកើតទៅលិច ឡើងឆ្លងកាត់ជាតិក៏បានទៅបុករថយន្តមួយគ្រឿងម៉ាកហ៊ីយ៉ាន់ដាយ កំពុងធ្វើដំណើរលើផ្លូវជាតិលេខ៥៦ បើកបរក្នុងទិសដៅពីជើងទៅត្បូង បណ្តាលឲ្យកូនប្រុសដែលមិនបានពាក់មួកសុវត្ថិភាពបោកក្បាលស្លាប់ភ្លាមៗនឹងកន្លែង ចំណែកអ្នកបើកបរម៉ូតូពាក់មួកសុវត្ថិភាពរងរបួសស្រាល ។
សពជនជនរងគ្រោះត្រូវបានកម្លាំងនគរបាលចរាចរណ៍ដឹកទៅប្រគល់ជូនក្រុមគ្រួសារដើម្បីរៀបចំធ្វើបុណ្យតាមប្រពៃណី។
លោកនាយរងការិយាល័យបានបញ្ជាក់ថា មូលហេតុដែលបង្កឲ្យមានគ្រោះថ្នាក់ចរាចរណ៍នេះ បណ្តាលមកពីអ្នកបើកបរម៉ូតូស្រវឹង ចំពោះរថយន្តនិងម៉ូតូខូចខាតស្រាល និងនាំយកមករក្សាទុកនៅការិយា ល័យ នគរបាលចរាចរណ៍ផ្លូវគោក ដើម្បីរងចាំធ្វើការដោះស្រាយតាមច្បាប់៕
ចែករំលែកព័តមាននេះ