រាជធានីភ្នំពេញ ៖ គណបក្សប្រជាធិបតេយ្យមូលដ្ឋានបានស្នើ និងអំពាវនាវដល់ប្រជាពលរដ្ឋជាម្ចាស់ឆ្នោតកុំបែកបាក់គ្នា គ្រាន់តែរឿងបោះឆ្នោតនៅពេលខាងមុខនេះឲ្យសោះ ។ នេះបើតាមការលើកឡើងរបស់លោក យ៉ង សាំងកុមារប្រធានគណៈកម្មការនាយកគណ បក្សប្រជា ធិបតេយ្យ មូលដ្ឋាន ។
លោកយ៉ង សាំងកុមារបានឲ្យដឹងថា គណបក្សប្រជាធិបតេយ្យមូលដ្ឋាន (គបម) បានបង្កើតឡើងជាផ្លូវការនៅថ្ងៃទី0២ ខែសីហា ឆ្នាំ២០១៥ ដែលមានលោកបណ្ឌិត កែម ឡី ជាបិតាស្ថាបនិក ។ គណបក្សត្រូវបានបង្កើតឡើង ដើម្បីផ្តល់ជាជម្រើសថ្មី ឬជម្រើសទី៣ដល់ប្រជាពលរដ្ឋដែលមិនពេញចិត្តនូវនយោបាយប្រឈមមុខដាក់គ្នារវាងគណបក្សធំៗទាំង២ គឺរវាងគណបក្សប្រជាជន និងអតីតគណបក្សសង្គ្រោះជាតិ ។
លោកយ៉ង សាំងកុមារបានសរសេរលើបណ្តាញសង្គមនៅថ្ងៃទី៦ ខែឧសភានេះ តាំងពីការករកើតដំបូង គណបក្សប្រជាធិបតេយ្យមូលដ្ឋានបាន និងកំពុងកសាងខ្លួនជាកម្លាំងកណ្តាលនិយម មូលដ្ឋាននិយម និងសេរីនិយមសង្គម ។
លោកបញ្ជាក់ថា ៖ «យើងជាគណបក្សនយោបាយមួយដែលមានគោលបំណងវែងឆ្ងាយ គុណតម្លៃ គោលការណ៍ និងគោលនយោបាយច្បាស់លាស់ដាច់ដោយឡែកពីគណបក្សដទៃ ហើយមិនរណបមិនចំណុះ ឬមិនជាសម្ព័ន្ធគណ បក្សមួយណាទេ ។
កន្លងមក គបម បានដាក់បេក្ខជនចូលរួមការបោះឆ្នោតឃុំសង្កាត់ នៅចំនួន២៧ឃុំសង្កាត់ កាលពីខែមិថុនា ២០១៧ ហើយទទួលបានជោគជ័យនៅចំនួន៣ឃុំ ដោយទទួលបានអាសនៈសរុបចំនួន៥ ។ ជំទប់ និងសមាជិកក្រុមប្រឹក្សាឃុំតំណាងឲ្យ គបម បាន និងកំពុងបំពេញតួនាទីរបស់ខ្លួនបានយ៉ាងល្អ ក្នុងការធ្វើការបម្រើប្រជាពលរដ្ឋ» ។
លោកបន្តថា សម្រាប់ការបោះឆ្នោតជាតិនៅថ្ងៃទី២៩ ខែកក្កដា ២០១៨ ខាងមុខនេះ គបម ក៏បានត្រៀមខ្លួនដាក់បេក្ខជនចូលរួមប្រកួត ហើយការសម្រេចចិត្តរបស់យើងធ្វើជាជំហានៗដូចខាងក្រោម ៖ ទី១- នៅខែមករា ២០១៨ យើងបានសម្រេចចិត្តរើសបេក្ខជន សម្រាប់ឈរឈ្មោះតាមគោលការណ៍ប្រជាធិបតេយ្យផ្ទៃក្នុងបក្ស ។ មកដល់ពេលនេះយើងបានត្រៀមបេក្ខជនសម្រាប់គ្រប់២៥រាជធានីខេត្ត ។ ទី២- នៅថ្ងៃទី៦ ឧសភា ២០១៨ ខាងមុខនេះ យើងនឹងធ្វើការសម្រេចជាផ្លូវការពីការដាក់បញ្ជី ឬមិនដាក់បញ្ជីឈ្មោះបេក្ខជន ដើម្បីចូលរួមប្រកួតការបោះឆ្នោត ។ ទី៣- តំណាងគណបក្សរបស់យើងមកពីរាជធានីខេត្ត នឹងចូលរួមធ្វើការសម្រេចរួមគ្នា បន្ទាប់ពីវាយតម្លៃលើបរិយាកាស ការត្រៀមខ្លួនការបោះឆ្នោត និងការពិគ្រោះយោបល់ពីប្រជាពលរដ្ឋតាមមូលដ្ឋាន ។ ទី៤- ក្នុងករណី គបម សម្រេចចុះបញ្ជី ហើយយើងក៏អាចដកខ្លួនចេញពីការបោះឆ្នោតពេលណាក៏បានដែរ ជាពិសេសប្រសិនបើលក្ខខណ្ឌទាំង៤របស់យើង មិនត្រូវបានបំពេញ ។
លោកបញ្ជាក់ថា លក្ខខណ្ឌទាំង៤ នោះគឺ ទី១ ៖ សេរីភាពនៃការធ្វើសកម្មភាពដូចជា ការលើកស្លាក ការជួបជុំសមាជិក និងអ្នកគាំទ្រ ទី២ ៖ បេក្ខជនសកម្មជន និងអ្នកគាំទ្រ មិនរងការគំរាមកំហែងក្រោមរូបភាព ផ្សេងៗ ទី៣៖ សេរីភាពក្នុងការផ្សព្វផ្សាយ ពីគណបក្សតាមប្រព័ន្ធផ្សព្វផ្សាយផ្សេងៗ ទី៤ ៖ មានការផ្តល់សិទ្ធិសេរីភាពពេញលេញដល់អ្នកសង្កេតការណ៍ជាតិ និងអន្តរជាតិចូលរួមបានគ្រប់គ្រាន់ទាំងមុនពេលបោះឆ្នោត ពេលថ្ងៃបោះឆ្នោត និងពេលរាប់សន្លឹកឆ្នោត ។
លោកគូសបញ្ជាក់បន្ថែមថា ការចូលរួម ឬមិនចូលរួមរបស់ គ.ប.ម ក្នុងការបោះឆ្នោតជារឿងសំខាន់ ។ តែអ្វីដែលសំខាន់បំផុត គឺយើងមិនត្រូវឲ្យខ្មែរបែកបាក់គ្នាដោយសារការបោះឆ្នោតទេ ។ ការឈ្នះ ឬចាញ់ឆ្នោតជារឿងធម្មតា ហើយអ្វីដែលសំខាន់បំផុត គឺក្រោយការបោះឆ្នោតយើងចេះរួបរួមគ្នាកសាងជាតិ តាមគោលការណ៍ប្រជាធិបតេយ្យសេរីពហុបក្ស ។
សូមជម្រាបថា ការលើកឡើងរបស់លោកយ៉ង សាំងកុមារ ខណៈដែលម្ចាស់ឆ្នោតកំពុងតែមានគំនិតខ្វែងគ្នា ពោល គឺអ្នកគាំទ្រអតីតបក្សប្រឆាំង និងបក្សកាន់អំណាច ៕
ចែករំលែកព័តមាននេះ