រាជធានីភ្នំពេញ ៖ អតីតតារាសម្តែងលោក ចៅ ចាន់ណារី មិនអាចវិលរកការសម្តែងជាថ្មីឡើងវិញបានទេ បើទោះបីជាពេលនេះលោកបានលេចមុខជាថ្មី ក្រោមការជួយជ្រោមជ្រែងពីប្រមុខរាជរដ្ឋាភិបាល និងអ្នកសិល្បៈជាបន្តបន្ទាប់ក៏ដោយ ។…
រាជធានីភ្នំពេញ ៖ អតីតតារាសម្តែងលោក ចៅ ចាន់ណារី មិនអាចវិលរកការសម្តែងជាថ្មីឡើងវិញបានទេ បើទោះបីជាពេលនេះលោកបានលេចមុខជាថ្មី ក្រោមការជួយជ្រោមជ្រែងពីប្រមុខរាជរដ្ឋាភិបាល និងអ្នកសិល្បៈជាបន្តបន្ទាប់ក៏ដោយ ។
លោកចៅ ចាន់ណារី ត្រូវបានស្នើសុំពីអ្នកសិល្បៈឲ្យលោកចូលរួមសម្តែងជាថ្មីឡើងវិញ បន្ទាប់ពីលោកសម្ងំលាក់ខ្លួនរស់នៅជាមួយនឹងជីវភាពដ៏ក្រលំបាកនៅខេត្តត្បូងឃ្មុំជាច្រើនឆ្នាំ ។
យ៉ាងណាក៏ដោយអតីតតារាសម្តែងតួអង្គប្តីនាងនី ក្នុងភាពយន្តរឿង«កូនពស់កេងកង»របស់លោកហ្វៃ សំអាង បានបដិសេធការស្នើសុំឲ្យចូលរួមសម្តែងជាថ្មី ក្រោមហេតុផលលោកមានជំងឺប្រចាំកាយមិនអាចសម្តែងបាន ។
តារាកំប្លែងលោកជួង ជី ហៅកុយដែលបានផ្ចុងផ្តើមឲ្យលោកចៅ ចាន់ណារី បង្ហាញមុខមាត់ជាថ្មីនោះបានអះអាងកាលពីពេល ថ្មីៗកន្លងមកថា បន្ទាប់ពីសម្តេចតេជោ ហ៊ុន សែន បានផ្តល់ប្រាក់សម្រាប់សាងសង់ផ្ទះបង្ហើយឲ្យលោកចៅ ចាន់ណារី មក លោកក៏បានសាកសួរពីការចូលរួមសម្តែងជាថ្មីឡើងវិញដែរ ប៉ុន្តែបើតាមការបញ្ជាក់ពីលោកចៅ ចាន់ណារី គឺលោកមិនអាចចូលរួមសម្តែងបានទេ ដោយសារតែលោកមានជំងឺបេះដូងដែលញាំញីអស់ជាច្រើនឆ្នាំ ។
បើតាមនាយកុយ ថាអ្នកដឹកនាំកុនលោកជា វណ្ណា ក៏មានបំណងចង់ឲ្យលោកចៅ ចាន់ណារី ចូលរួមសម្តែងនៅក្នុងផលិតកម្មលោកផងដែរ ប៉ុន្តែដោយសារលោកចៅ ចាន់ណារី មានជំងឺទើបមិនអាចសម្តែងបាន ។
នាយកុយ បញ្ជាក់ថា បច្ចុប្បន្នលោកនៅមិនទាន់ដឹងទេថា លោកចៅ ចាន់ណារី នឹងអាចប្រកបរបរអ្វីដើម្បីចិញ្ចឹមគ្រួសារនោះឡើយ ដោយសារតែពេលនេះលោកត្រូវការពេលវេលាជួសជុលផ្ទះដែលកសាងជិត១០ឆ្នាំមិនទាន់ហើយនោះជាមុនសិន ។ សម្រាប់មុខរបរលក់ខោអាវជជុះនោះទំនងជាលោកចៅ ចាន់ណារី បោះបង់ចោល ហើយៗអាចទៅរកមុខរបរផ្សេងទៀត ព្រោះបើតាមអនុសាសន៍របស់សម្តេចតេជោ គឺចង់ឲ្យលោកមានសល់លុយកាក់ខ្លះសម្រាប់បង្កើតមុខរបរចិញ្ចឹមគ្រួសារ ។
អតីតតារាសម្តែងលោកចៅ ចាន់ណារី ត្រូវតារាកំប្លែងនាយកុយ ប្រទះឃើញដោយចៃដន្យនៅតាមដងផ្លូវក្នុងខេត្តត្បូងឃ្មុំ ជាមួយនឹងរូបរាងចុះស្គម ក្នុងជីវភាពក្រលំបាកមិនគួឲ្យជឿ ។ ពេលនោះនាយ កុយ បានស្នើសុំឲ្យអតីតតារាភាពយន្តរូបនេះមកភ្នំពេញ ដើម្បីឲ្យសមាគមសិល្បករខ្មែរជួយ និងស្វែងរកការសម្តែងជាថ្មីឡើងវិញ ។
ឆ្លើយតបការស្នើសុំនេះលោកចៅ ចាន់ណារី ហាក់នៅមានការរាករែកចិត្ត ដោយសារតែលោកអៀនខ្មាសមហាជន នៅពេលដែលលោកធ្លាក់ខ្លួនដល់កម្រិតនេះ ខុសប្លែកទាំងស្រុងកាលពីលោកនៅសម្តែង ។
លោកចៅ ចាន់ណារី បានទទួលយកការស្នើសុំរបស់នាយកុយ ធ្វើដំណើរមកភ្នំពេញ ហើយបានការជួយជ្រោមជ្រែងពីសមាគមសិល្បករខ្មែរ ជាពិសេសបានសម្តេចតេជោហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ជ្រោមជ្រែងឲ្យលោកបានរស់នៅក្នុងជីវភាពថ្មីសមរម្យ ៕
ចែករំលែកព័តមាននេះ