រាជធានីភ្នំពេញ ៖ ជនសង្ស័យម្នាក់ធ្វើសកម្មភាពលួចម៉ូតូមួយគ្រឿងគេចខ្លួនបាន១៦ថ្ងៃ ត្រូវម្ចាស់ចាប់ក្របួចជាប់ប្រគល់ឲ្យសមត្ថកិច្ចកាលពីវេលាម៉ោង៧និង៣០នាទីយប់ថ្ងៃទី០៥ ខែឧសភា ឆ្នាំ២០១៨ នៅចំណុចមុខក្លោងទ្វារវត្តញាណរង្សី ផ្លូវបេតុង សង្កាត់ទួលសង្កែទី១ ខណ្ឌឫស្សីកែវ…
រាជធានីភ្នំពេញ ៖ ជនសង្ស័យម្នាក់ធ្វើសកម្មភាពលួចម៉ូតូមួយគ្រឿងគេចខ្លួនបាន១៦ថ្ងៃ ត្រូវម្ចាស់ចាប់ក្របួចជាប់ប្រគល់ឲ្យសមត្ថកិច្ចកាលពីវេលាម៉ោង៧និង៣០នាទីយប់ថ្ងៃទី០៥ ខែឧសភា ឆ្នាំ២០១៨ នៅចំណុចមុខក្លោងទ្វារវត្តញាណរង្សី ផ្លូវបេតុង សង្កាត់ទួលសង្កែទី១ ខណ្ឌឫស្សីកែវ ។
ជនរងគ្រោះឈ្មោះ សោម ផានិត ភេទប្រុស អាយុ១៨ឆ្នាំ មុខរបរកម្មករស្នាក់នៅ ផ្ទះលេខ៤៣៣ ផ្លូវលំ ក្រុមទី៤ ភូមិទួលសំពៅ សង្កាត់ទួលសង្កែទី១ ខណ្ឌឫស្សីកែវ ។ ចំណែកម៉ូតូដែលជនសង្ស័យលួចយកទៅបាត់នោះម៉ាកហុងដាឌ្រីមស៊េរីឆ្នាំ២០០៩ ពណ៌ខ្មៅពាក់ស្លាកលេខ
កណ្តាល1D-6226 ។
ជនសង្ស័យមានឈ្មោះ ភក្ត្រ័ សោភា ភេទប្រុស អាយុ១៩ឆ្នាំ ស្នាក់នៅនឹងមុខរបរមិនពិតប្រាកដ ជិះម៉ូតូ ពណ៌ខ្មៅ អត់ស្លាកលេខ ។
សមត្ថកិច្ចបានឲ្យដឹងថា កាលពីវេលាម៉ោង៨ព្រឹកថ្ងៃទី១៥ ខែមេសា ឆ្នាំ២០១៨ ជនរងគ្រោះបានមកលេងផ្ទះរបស់មិត្តភក្តិនៅចំណុចផ្ទះជួល ក្រោយផ្សារជ័យជំនះ ផ្លូវបេតុង ក្រុមទី១ ភូមិពោងពាយ សង្កាត់ទួលសង្កែទី២ ខណ្ឌឫស្សីកែវ បានទុកម៉ូតូ និងចាក់សោនៅមុខបន្ទប់ជួល រួចក៏ដើរចូលបន្ទប់ជួលដេកលេងលក់ទាំង៣នាក់ រួមទាំងជនរងគ្រោះជនសង្ស័យនឹងឈ្មោះផា(ដែលត្រូវជាបងជីដូនមួយរបស់ជនរងគ្រោះ) លុះវេលាម៉ោង៩ព្រឹកថ្ងៃដដែល ខណៈពេលជនរងគ្រោះភ្ញាក់ពីដំណេករត់ចេញមកក្រៅបន្ទប់ទើបដឹងថា បាត់ម៉ូតូបាត់ទាំងជនសង្ស័យខាងលើតែម្តង ។
សមត្ថកិច្ចបានបន្តឲ្យដឹងថា លុះនៅវេលាម៉ោង៧និង៣០នាទី យប់ថ្ងៃទី០៥ ខែឧសភា ឆ្នាំ២០១៨ ឈ្មោះ សោម សាវឿន ភេទប្រុស អាយុ៣៨ឆ្នាំ មុខរបរសន្តិសុខឯកជន (ត្រូវជាពូរបស់ជនរងគ្រោះ) និងឈ្មោះសោម រតនា (ត្រូវជាបងបង្កើតរបស់ជនរងគ្រោះ)បានឃើញជនសង្ស័យឈ្មោះ ភក្គ្រ័ សោភា ខណៈពេលកំពុងជិះម៉ូតូបានប្រទះឃើញជនសង្ស័យខាងលើកំពុងបណ្តើរម៉ូតូមួយគ្រឿងម៉ាកយ៉ាម៉ាហាអត់ស្លាកលេខនៅចំណុចមុខក្លោងទ្វារវត្តញាណរង្សី ផ្លូវបេតុង សង្កាត់ទួលសង្កែទី១ ខណ្ឌឫស្សីកែវ ក៏បានឃាត់ខ្លួនបញ្ជួនមកប៉ុស្តិ៍នគរបាលរដ្ឋបាលទួលសង្កែទី២ ដើម្បីសួរនាំ ។
បច្ចុប្បន្នជនសង្ស័យត្រូវបានកម្លាំងជំនាញខណ្ឌឫស្សីកែវកសាងសំណុំរឿង ដើម្បីបញ្ជូនទៅសាលាដំបូងរាជធានីភ្នំពេញអនុវត្តតាមនីតិវិធី ៕
ចែករំលែកព័តមាននេះ