ខេត្តប៉ៃលិន ៖ ប្តីប្រពន្ធមួយគូបានដួលសន្លប់ស្តូកស្តឹងដោយសាររន្ទះបាញ់ ខណៈពួកគាត់កំពុងតែនាំគ្នាជម្រះស្មៅនៅក្នុងចម្ការដំឡូងមីទាំងកណ្តាលភ្លៀង ។ ទោះជាបែបណា ត្រូវបានសាច់ញាតិហៅរថយន្តសង្គ្រោះមន្ទីរពេទ្យដឹកទៅកាន់មណ្ឌលសុខភាពភ្លាមៗផងដែរ ។ បាតុភូតធម្មជាតិនេះកើតឡើងកាលពីវេលាម៉ោង៣និង២០នាទីរសៀល ថ្ងៃទី១…
ខេត្តប៉ៃលិន ៖ ប្តីប្រពន្ធមួយគូបានដួលសន្លប់ស្តូកស្តឹងដោយសាររន្ទះបាញ់ ខណៈពួកគាត់កំពុងតែនាំគ្នាជម្រះស្មៅនៅក្នុងចម្ការដំឡូងមីទាំងកណ្តាលភ្លៀង ។ ទោះជាបែបណា ត្រូវបានសាច់ញាតិហៅរថយន្តសង្គ្រោះមន្ទីរពេទ្យដឹកទៅកាន់មណ្ឌលសុខភាពភ្លាមៗផងដែរ ។ បាតុភូតធម្មជាតិនេះកើតឡើងកាលពីវេលាម៉ោង៣និង២០នាទីរសៀល ថ្ងៃទី១ ឧសភា ស្ថិតក្នុងភូមិកូនភ្នំ ឃុំអូរអណ្តូង ស្រុកសាលាក្រៅ ។
ប្រភពព័ត៌មានពីមន្ត្រីសមត្ថកិច្ចនគរបាលបានឲ្យដឹងថា ជនរងគ្រោះជាប្រពន្ធឈ្មោះ តិល អឿម អាយុ៦៣ឆ្នាំ ចំណែកប្តីឈ្មោះ យន់ ហ៊ីង អាយុ៥៤ឆ្នាំ ពួកគាត់រស់នៅក្នុងភូមិស្លា ឃុំស្ទឹងកាច់ ស្រុកសាលាក្រៅ ។
ប្រភពបានបន្តទៀតថា មុនពេលកើតហេតុ ប្តីប្រពន្ធទាំង២នាក់ខាងលើកំពុងតែនាំគ្នាជម្រះស្មៅដំឡូងមីនៅក្នុងចម្ការរបស់ខ្លួន ស្របពេលដែលមេឃកំពុងធ្លាក់ភ្លៀងស្រិចៗ ដោយពួកគាត់ទាំងពីរនាក់ប្តីប្រពន្ធមិនបានរកកន្លែងជ្រកភ្លៀងនោះទេ គឺនៅតែបន្តនាំគ្នាជម្រះស្មៅក៏ត្រូវរន្ទះបាញ់សន្លប់ទាំងពីរនាក់តែម្តង ។ក្រោយការព្យាបាលដោយយកចិត្តទុកដាក់ពីសំណាក់គ្រូពេទ្យ បច្ចុប្បន្នទាំងពីរនាក់ប្តីប្រពន្ធនោះបានដឹងខ្លួនឡើងវិញហើយ តែហាក់នៅវង្វេងវង្វាន់នៅឡើយ ។
សូមបញ្ជាក់ថា នៅឆ្នាំ២០១៨នេះ មានករណីរន្ទះបាញ់ចំនួន៣លើក តែមិនបណ្តាលឱ្យមនុស្សណាម្នាក់ស្លាប់ទេ គឺងាប់តែគោ១ក្បាល ខណៈកំពុងចងឱ្យស៊ីស្មៅនៅក្បែរដើមឈើ ៕
ចែករំលែកព័តមាននេះ