រាជធានីភ្នំពេញ ៖ សម្តេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានអះអាងទៅកាន់អ្នកដែលអំពាវនាវកុំឲ្យពលរដ្ឋទៅបោះឆ្នោតជ្រើសតាំងអ្នកតំណាងរាស្ត្រនៅពេលខាងមុខនេះ ជាការរំលោភច្បាប់រដ្ឋធម្មនុញ្ញនៃព្រះរាជាណាចក្រកម្ពុជា ។ ការលើករបស់ប្រមុខរាជរដ្ឋាភិបាល និងប្រធានគណបក្សប្រជាជនកម្ពុជាបន្ទាប់ពីលោក សម រង្ស៊ី…
រាជធានីភ្នំពេញ ៖ សម្តេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានអះអាងទៅកាន់អ្នកដែលអំពាវនាវកុំឲ្យពលរដ្ឋទៅបោះឆ្នោតជ្រើសតាំងអ្នកតំណាងរាស្ត្រនៅពេលខាងមុខនេះ ជាការរំលោភច្បាប់រដ្ឋធម្មនុញ្ញនៃព្រះរាជាណាចក្រកម្ពុជា ។
ការលើករបស់ប្រមុខរាជរដ្ឋាភិបាល និងប្រធានគណបក្សប្រជាជនកម្ពុជាបន្ទាប់ពីលោក សម រង្ស៊ី អតីតប្រធានគណបក្សសង្គ្រោះជាតិ និងជាប្រធានចលនាសង្គ្រោះជាតិបានអំពាវនាវពីក្រៅប្រទេសកុំឲ្យពលរដ្ឋទៅបោះឆ្នោតនៅពេលខាងមុខនេះ ។ ជាងនេះអតីតមេបក្សប្រឆាំងនេះគ្រោងនឹងបោះពុម្ពខិតបណ្ណ ដើម្បីផ្សព្វផ្សាយថែមទៀត ។
យ៉ាងណាក្តីនៅថ្ងៃទី៤ ខែឧសភា ឆ្នាំ២០១៨ សម្តេចតេជោ ហ៊ុន សែន បានសរសេលើបណ្តាញសង្គមថា ការបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ គឺសំខាន់ខ្លាំង ណាស់ ។ មាត្រា៣៤នៃរដ្ឋធម្មនុញ្ញ ឆ្នាំ១៩៩៣ ដែលជាច្បាប់កំពូលរបស់កម្ពុជា គឺបញ្ជាក់ ច្បាស់អំពីសិទ្ធិជាមូលដ្ឋានរបស់ពលរដ្ឋខ្មែរទាំង២ភេទ គឺមានសិទ្ឋិបោះឆ្នោត និងមានសិទ្ធិឈរឈ្មោះបោះឆ្នោតនៅក្នុងរបបដឹកនាំប្រជាធិបតេយ្យសេរីពហុបក្ស ។
សម្តេចបញ្ជាក់ថា «ការឃោសនាមិនឲ្យពលរដ្ឋទៅបោះឆ្នោត គឺរំលោភច្បាប់ប្រទេសដែលបានចែងច្បាស់នៅក្នុងមាត្រា១៤២ នៃច្បាប់ស្តីពីការជ្រើសតាំងតំណាងរាស្ត្រ» ។
សម្តេចក៏បានសរសេទៀតថា ខ្ញុំសូមអរគុណប្រទេសជាដៃគូអភិវឌ្ឍន៍ទាំងអស់ដែលដែលបានចូលរួមជួយកសាងកម្ពុជា និងជួយរៀបចំព្រមទាំងផ្តល់នូវជំនួយទាំងថវិកា និងបច្ចេកទេសដល់ការរៀបចំការបោះឆ្នោតនៅកម្ពុជាដូចជា ប្រទេសជប៉ុន ប្រទេសចិន និងកិច្ចសហការជាមួយប្រទេសរុស្សីជាដើម ។
ជាមួយគ្នានេះដែរ ខ្ញុំសូមអរគុណដល់ (គ.ជ.ប) ដែលជាស្ថាប័នច្បាប់ និងបច្ចេកទេសរបស់កម្ពុជា ដែលមានសមត្ថភាពក្នុងការរៀបចំការបោះឆ្នោតនៅកម្ពុជាទទួលបានជោគជ័យ៥លើករួចមកហើយ ចាប់តាំងពីឆ្នាំ១៩៩៨ ។ អរគុណបងប្អូនជនរួមជាតិដែលមានជំនឿទុកចិត្តលើការដឹកនាំរបស់ខ្ញុំ ហើយតែងតែបោះឆ្នោតឲ្យគណបក្សប្រជាជនគ្រប់អាណត្តិ ដើម្បីបន្តអភិវឌ្ឍន៍ប្រទេសជាតិយើងឲ្យកាន់តែរីកចម្រើន ។
សម្តេចក៏បានលើកពីដំណើរការចុះឈ្មោះបេក្ខជនឈរឈ្មោះសម្រាប់បោះឆ្នោតអាណត្តិទី៦ដែរថាបើតាមដំណឹងពី (គ.ជ.ប) គឺមានគណបក្ស៣ហើយ ដែលបានចុះបញ្ជីរួចរាល់ក្នុងការចូលរួមប្រកួតប្រជែងក្នុងការបោះឆ្នោតថ្ងៃទី២៩ ខែកក្កដា ឆ្នាំ២០១៨ ខាងមុខនេះ គឺ១- គណបក្សប្រជាជនកម្ពុជា ២- គណបក្សសញ្ជាតិកម្ពុជា និង៣- គណបក្សយុវជនកម្ពុជា ។ ការចុះ ឈ្មោះ គឺចំណាយពេលខ្លី ។ ទន្ទឹមនឹងនោះ គឺមានគណបក្ស៦ទៀតដែលបានបញ្ជាក់ពីជំហរចុះបញ្ជីចូលរួមប្រកួតប្រជែងក្នុងការបោះឆ្នោតជ្រើសរើសតំណាងរាស្ត្រនីតិកាលទី៦ឆ្នាំ២០១៨ ដោយបានរៀបចំប្រាក់កក់១៥លានរៀល នៅរតនាគាជាតិនៃកម្ពុជា ។ សរុបទាំងអស់មានគណបក្សនយោបាយចំនួន២១ កំពុងបំពេញបែបបទ ។
គួរបញ្ជាក់ថា ទោះបីជាមានការអំពាវនាវពីក្រុមប្រឆាំងនៅក្រៅប្រទេសពលរដ្ឋទៅបោះឆ្នោតនៅពេលខាងមុខយ៉ាងណាក្តី មន្ត្រីជាន់ខ្ពស់គ.ជ.ប បានអះអាងចំនួនអ្នកទៅបោះឆ្នោតនឹងមានជាង៥០% ព្រោះថា ចំនួននោះបើតាមទិន្នន័យអ្នកបោះឆ្នោតឆ្នាំ២០១៧ ចំនួនជាង៥០% បានបោះឆ្នោតគាំទ្រគណបក្សប្រជាជនកម្ពុជា និងមានចំនួនទៀតបានបោះឆ្នោតជួនគណបក្សផ្សេងៗ ។
មន្ត្រី គ.ជ.ប ក៏បានអះអាងទោះបីជាចំនួនអ្នកទៅបោះឆ្នោតតិចក្តី លទ្ធផលនៃការបោះឆ្នោតនៅតែប្រកាសលទ្ធផលជាធម្មតា ៕
ចែករំលែកព័តមាននេះ