រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា ចំណូលចរន្តថវិកាជាតិរបស់រាជរដ្ឋាភិបាលក្នុងរយៈពេល៥ឆ្នាំចុងក្រោយនេះ (២០១៣-២០១៨) បានកើនពី២.២៦៤លានដុល្លារ ដល់ចំនួនជាង៤.៥៦០លានដុល្លារអាមេរិក ។
ថ្លែងក្នុងកិច្ចប្រជុំជាមួយតំណាងសហភាពអឺរ៉ុប និងធនាគារពិភពលោកប្រចាំកម្ពុជា លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងថា ជាលទ្ធផល ក្នុងរយៈពេល៥ឆ្នាំចុងក្រោយនេះ ចាប់ពីឆ្នាំ២០១៣-២០១៨ ចំណូលចរន្តថវិការដ្ឋ បានកើនឡើងជាង២ដង មានប្រមាណ២.២៦៤លានដុល្លារ ដល់ប្រមាណ៤.៥៦០លានដុល្លារអាមេរិក ។ ការកើនឡើងនៃទំហំចំណូលនេះ បានផ្តល់លទ្ធផលជាវិជ្ជមាន ដោយអនុញ្ញាតឱ្យរាជរដ្ឋាភិបាលបង្កើនចំណាយយ៉ាងច្រើនទៅលើការលើកកម្ពស់គុណភាព និងការពង្រីកវិសាលភាពនៃសេវាសាធារណៈ ទាំងតាមរយៈចំណាយចរន្តថវិកាជាតិ និងចំណាយវិនិយោគសាធារណៈ ដើម្បីធ្វើឱ្យការផ្តល់សេវាសាធារណៈកាន់តែប្រសើរឡើង និងកាន់តែខិតជិតប្រជាពលរដ្ឋ ។
លោកបន្តថា កម្មវិធីកែទម្រង់គ្រប់គ្រងហិរញ្ញវត្ថុសាធារណៈនៅកម្ពុជា ត្រូវបានប្រកាសដាក់ឱ្យអនុវត្តនៅឆ្នាំ២០០៤ ក្នុងគោលដៅផ្លាស់ប្តូរ «ប្រព័ន្ធគ្រប់គ្រងហិរញ្ញវត្ថុសាធារណៈ ដែលផ្តោតលើធាតុចូល និងមជ្ឈការ» ទៅជា «ប្រព័ន្ធគ្រប់គ្រងហិរញ្ញវត្ថុសាធារណៈ ដែលផ្តោតលើធាតុចេញ និងវិមជ្ឈការ» ស្របតាមការលានុវត្តន៍ជាអន្តរជាតិ ហើយកម្មវិធីកែទម្រង់នេះ ត្រូវបានដាក់ចេញដោយរចនាតាមអភិក្រមជាខឿនចំនួន៤ និងត្រូវបានរៀបចំអនុវត្តជា៤ដំណាក់កាលផងដែរ ។
យោងតាមទិន្នន័យរបស់ធនាគារពិភពលោកបានបង្ហាញថា ប្រទេសកម្ពុជាទទួលបានកំណើនសេដ្ឋកិច្ចក្នុងអត្រាជាមធ្យម៧,៦% ចាប់ពីឆ្នាំ១៩៩៤-២០១៥ គឺស្ថិតក្នុងចំណាត់ថ្នាក់ទី៦នៅលើពិភពលោក ហើយកម្រិតអត្រាភាពក្រីក្រធ្លាក់ចុះពី៤៧,៨%ក្នុងឆ្នាំ២០០៤ មកនៅត្រឹម១៣,៥%ក្នុងឆ្នាំ២០១៤ និងទទួលបានឋានៈជាប្រទេសចំណូលមធ្យមកម្រិតទាបផងដែរ ។
ឯកអគ្គរដ្ឋទូតនៃស្ថានតំណាងសហភាពអឺរ៉ុបប្រចាំនៅកម្ពុជា លោក George Edgarបានថ្លែងថា ដើម្បីឈានឆ្ពោះទៅសម្រេចបានគោលដៅអភិវឌ្ឍន៍ដោយចីរភាព បច្ចុប្បន្ននេះ សហភាពអឺរ៉ុបកំពុងផ្តល់ហិរញ្ញប្បទានដោយផ្ទាល់តាមរយៈធនាគារពិភពលោក លើគម្រោងការគ្រប់គ្រងហិរញ្ញវត្ថុសាធារណៈដល់ប្រទេសជាដៃគូមួយចំនួន រួមមាន កម្ពុជា, ឡាវ, វៀតណាម, ឥណ្ឌូណេស៊ី, ហ្វ៊ីលីពីន, ម៉ុងហ្គោលី, ទីម័រខាងកើត, វៀតណាម និងដល់ប្រទេសមីយ៉ាន់ម៉ា ក្នុងពេលឆាប់ៗខាងមុខនេះ ។
ប្រមុខរាជរដ្ឋាភិបាលកម្ពុជា កាលពីខែមេសាកន្លងមកនេះ បានប្រកាសដាក់ឲ្យអនុវត្តនូវគោលនយោបាយកែទម្រង់ហិរញ្ញវត្ថុជំហានទី២ ដើម្បីធ្វើយ៉ាងណា ឲ្យការចំណាយថវិការបស់ជាតិកាន់តែមានប្រសិទ្ធភាព និងចំគោលដៅ ៕
ចែករំលែកព័តមាននេះ