រាជធានីភ្នំពេញ ៖ ក្រុមយុវសិស្សកម្ពុជា ដែលបានប្រកួតប្រជែងលើវិញ្ញាសាមនុស្សយន្តតំបន់អាស៊ាន«២០១៨ ASEAN Regional Robotics Competition»ហើយទទួលបានជ័យលាភីជាម្ចាស់ពានរង្វាន់លេខ១ នៅប្រទេសឥណ្ឌូណេស៊ី ក្នុងចំណោម៤ប្រទេសបានមកដល់ប្រទេសកម្ពុជាហើយកាលពីរសៀលថ្ងៃទី១…
រាជធានីភ្នំពេញ ៖ ក្រុមយុវសិស្សកម្ពុជា ដែលបានប្រកួតប្រជែងលើវិញ្ញាសាមនុស្សយន្តតំបន់អាស៊ាន«២០១៨ ASEAN Regional Robotics Competition»ហើយទទួលបានជ័យលាភីជាម្ចាស់ពានរង្វាន់លេខ១ នៅប្រទេសឥណ្ឌូណេស៊ី ក្នុងចំណោម៤ប្រទេសបានមកដល់ប្រទេសកម្ពុជាហើយកាលពីរសៀលថ្ងៃទី១ ឧសភា នេះ ។
ក្រុមយុវសិស្សកម្ពុជាដែលដណ្តើមបានជ័យលាភីលេខ១ជូនជាតិនេះត្រូវបានលោក ច័ន្ទ រ័ត្ន ប្រធាននាយកដ្ឋានស្រាវជ្រាវវិទ្យាស្ត្រ ក្រសួងអប់រំ យុវជននិងកីឡា និងក្រុមយុវសិស្សរាប់សិបនាក់បានទៅទទួលស្វាគមន៍ដល់ព្រលានយន្តហោះភ្នំពេញ ជាមួយនឹងបាច់ផ្កាកិត្តិយស ។ ក្រុមសិស្សានុសិស្សវិទ្យាល័យទួលទំពូងទទួលបានចំណាត់ថ្នាក់លេខ១ក្នុងការប្រកួតប្រជែងមនុស្សយន្តតំបន់អាស៊ាន ឆ្នាំ២០១៨ (ក្រុមSTEM Cambodia នេះមានគ្នា៣នាក់ ក្នុងនោះមានម្នាក់ឈ្មោះតេង ទិត្យវិទូ ។
ការប្រកួតនេះទទួលបានពិន្ទុ២៥៧ ច្រើនជាងក្រុមផ្សេងៗទៀត ដែលមកពីបណ្ដាប្រទេសផ្សេងៗក្នុងតំបន់សម្រាប់ការប្រកួតប្រភេទ Scout Class ដោយការបង្កើតមនុស្សយន្តក្នុងទឹក ហើយនេះជាលើកទីមួយហើយ ដែលតំណាងសិស្សានុសិស្សកម្ពុជា បានចូលរួមក្នុងព្រឹត្តិការណ៍ប្រកួតនេះទាំងថ្នាក់ជាតិ និងថ្នាក់តំបន់។ លោក ច័ន្ទ រ័ត្ន ប្រធាននាយកដ្ឋានស្រាវជ្រាវវិទ្យាស្ត្រ ក្រសួងអប់រំ យុវជននិងកីឡា ដែលបានអញ្ជើញមកទទួលយុវសិស្សជ័យលាភី ម្ចាស់ពានរង្វាន់លេខ១ ថ្នាក់ជាតិដល់ព្រលានយន្តហោះមានប្រសាសន៍ថា ក្នុងនាមក្រសួងអប់រំ យុវជននិងកីឡា លោកពិតជារីករាយយ៉ាងខ្លាំងចំពោះយុវសិស្សកម្ពុជាយើងដែលដណ្តើមបានជ័យលាភីនេះ ។ លោកបន្តថា ការប្រកួតប្រជែងមនុស្សយន្តតំបន់អាស៊ាន «២០១៨ ASEAN Regional Robotics Competition»ដែលបានប្រព្រឹត្តទៅកាលពីថ្ងៃទី២១ ដល់២៣ ខែមេសា ឆ្នាំ២០១៨ នៅប្រទេសឥណ្ឌូណេស៊ី កន្លងមកនេះគឺមានយុវសិស្សមកពី៤ប្រទេសក្នុងនោះរួមមាន ប្រទេសថៃ ម៉ាឡេស៊ី ឥណ្ឌូណេស៊ី និងប្រទេសកម្ពុជា ហើយក្នុងចំណោម៤ប្រទេសនេះ មានតែកម្ពុជាទេ ដែលជាប្រទេសមិនទាន់រីកចំរើនខ្លាំងដូចគេ ប៉ុន្តែបែរជាប្រទេសយើងដណ្តើមបានជ័យលាភីដ៏មានកិត្តិយសនេះ យើងពិតជាមានមោទនភាពយ៉ាងខ្លាំង ។
លោក ច័ន្ទ រ័ត្ន បានបញ្ជាក់បន្ថែមថា ការប្រលងប្រកួតប្រជែងនៅក្រៅប្រទេសកន្លងមកនេះយុវសិស្សរបស់យើងបានប្រកួតប្រជែងជាមួយបរទេសជាច្រើនវិញ្ញាសាហើយដែរ តែសម្រាប់ការប្រកួតប្រជែងមនុស្សយន្តតំបន់អាស៊ាននេះ វាជាការប្រកួតជាលើកទី១ ហើយវាក៏ជាការប្រកួតដែលកម្ពុជាទទួលបានជ័យលាភីលេខ១តែម្តង ។ លោកបញ្ជាក់ថា វាពិតជាអស្ចារ្យសម្រាប់ក្រុមយុវសិស្សរបស់យើងដោយក្រុមរបស់គាត់មានគ្នា៣នាក់ បានបង្កើតជាតុក្កតាយន្តមួយ ហើយពួកគាត់បានបញ្ជាឱ្យតុក្កតាយន្តមួយនេះអាចរើសសម្រាមចេញពីបាតទឹកសមុទ្របាន ។ ជាងនេះទៅទៀតក្រុមយុវសិស្សទាំង៣ក៏នូវបានពន្យល់យ៉ាងក្បោះក្បាយពីមនុស្សយន្តដោយទាញយករូបមន្តគណិតវិទ្យា មកធ្វើជាអំណះសំណាង ។
គួររំឭកថា យុវសិស្សជ័យលាភីគឺជាម្ចាស់ពានរង្វាន់លេខ១ថ្នាក់ជាតិបានរៀបចំឡើងលើកទី១ នៅក្នុងព្រឹត្តិការណ៍មហោស្រពវិទ្យាសាស្ត្រ និងគណិតវិទ្យាលើកទី៤កាលពីខែមីនាកន្លងទៅ ហើយយុវសិស្សដែលបានពន្យល់យ៉ាងក្បោះក្បាយពីមនុស្សយន្តដោយទាញយករូបមន្តគណិតវិទ្យាមកធ្វើជាអំណះសំណាងនោះ គឺយុវសិស្សឈ្មោះ តេង ទិត្យវិទូ ភេទប្រុស អាយុ១៧ឆ្នាំ ដែលជាសិស្សរៀននៅថ្នាក់ទី១១ នៃវិទ្យាល័យទួលទំពូងនិងមានលំនៅក្នុងសង្កាត់ បឹងត្របែក ខណ្ឌចំការមន ៕
ចែករំលែកព័តមាននេះ