កាលពីថ្ងៃអង្គារកន្លងមកនេះ ក្រុមហ៊ុន Facebook បានប្រកាសពីសេវាកម្មស្វែងរកគូស្រករថ្មីរបស់ខ្លួន ។ ក្រុមហ៊ុននេះឲ្យដឹងថា អ្នកប្រើប្រាស់អាចបង្កើត Profile ស្វែងរកគូស្រករមួយ ដោយមិនចាំបាច់ឲ្យមិត្តនៅលើ Facebook ដឹង ។ សេវាកម្មថ្មីនេះ នឹងមិនស្វែងរកគូស្រករដែលជាមិត្តរបស់អ្នកប្រើប្រាស់នៅលើ Facebook ទេ ។
មុនពេលប្រកាសពីសេវាកម្មនេះ Facebook បានព្យាយាមបង្កើតចំណុចពិសេសថ្មីៗជាច្រើន រួមមាន ការស្វែងរកការងារ និងការទិញទំនិញជាដើម ។ ពួកគេបានព្យាយាមកាន់តែខ្លាំងឡើងក្នុងការធ្វើឲ្យអ្នកប្រើប្រាស់ចំណាយពេលច្រើននៅលើបណ្តាញសង្គមរបស់ខ្លួន ។
ប្រាកដណាស់ ការផ្តល់សេវាកម្មយ៉ាងច្រើននេះបានជួយឲ្យ Facebook អាចរក្សាភាពនាំមុខគេនៅក្នុងចំណោមដៃគូប្រកួតប្រជែងផ្សេងទៀត ។ សេវាកម្មស្វែងរកគូស្រករថ្មីនេះ នឹងអនុញ្ញាតឲ្យអ្នកប្រើប្រាស់មើលឃើញកម្មវិធី និងក្រុមមនុស្ស ដែលមានចំណង់ចំណូលចិត្តស្រដៀងគ្នា។ ប្រសិនបើអ្នកប្រើប្រាស់មើលឃើញកម្មវិធីអ្វីដែលពួកគេចង់ចូលរួម គឺពួកគេអាចចូលរួមកម្មវិធីនេះបានជាមួយអ្នកដទៃ ។
ពេលនោះ Profile របស់អ្នកប្រើប្រាស់នឹងត្រូវបានចែករំលែកជាមួយអ្នកដទៃទៀត ដែលចូលរួមកម្មវិធីដូចគ្នា និងប្រើប្រាស់សេវាកម្មនេះដែរ ។ ពួកគេអាចជ្រើសរើសអ្នកប្រើប្រាស់ និងចាប់ផ្តើមការសន្ទនាលក្ខណៈឯកជន ដែលមិនតភ្ជាប់ជាមួយ Messenger ឬ WhatsApp ឡើយ ។
សម្រាប់ព័ត៌មានលម្អិតបន្ថែមមិនទាន់ត្រូវបានប្រកាសចេញនៅឡើយទេ ប៉ុន្តែសេវាកម្មថ្មីនេះ អាចនឹងចាប់ផ្តើមដំណើរការនាចុងឆ្នាំ២០១៨ ៕
ចែករំលែកព័តមាននេះ