ខេត្តមណ្ឌលគិរី ៖ ឈើខុសច្បាប់ពេញមួយរថយន្តបម្រុងលួចឆ្លងដែន ត្រូវបាននគរបាលការពារព្រំដែនគោកលេខ៦២១ ចាប់បង្ក្រាបបានកាលពីម៉ោង១និង៣០នាទីយប់ ថ្ងៃទី៣ ឧសភា នៅចំណុចចំការស្វាយចន្ទីរ របស់ប្រជាពលរដ្ឋក្នុងភូមិឆ្នែង ឃុំស្រែខ្ទុម ស្រុកកែវសីមា ។
សមត្ថកិច្ចបានឲ្យដឹងថា ពេលកម្លាំងនគរបាលព្រំដែនកំពុងល្បាតតាមគោលដៅសំខាន់ៗ តាមបន្ទាត់ព្រំដែនក៏បានប្រទះរថយន្តឡង់គ្រីស័រកែច្នៃទ្រុងមួយគ្រឿង មានផ្ទុកឈើប្រភេទកកោះសន្លឹកធំៗចំនួន១៧សន្លឹក ជាប់ផុងនៅចំការស្វាយចន្ទីរ ក៏ចាប់បង្ក្រាបភ្លាមៗតែម្តង។
សមត្ថកិច្ចបន្តថា ក្រោយពីចាប់បង្ក្រាបនោះ គេមិនអាចយករថយន្តដឹកឈើខុសច្បាប់ទៅរក្សាទុកនៅកន្លែងរដ្ឋបាលព្រៃឈើបានទេ លុះនៅព្រឹកថ្ងៃទី៣ ទើបអាចរករថយន្តអូសសណ្តោងចេញពីកន្លែងជាប់ផុងបាន និងយកទៅរក្សាទុកនៅកន្លែងជំនាញ ដើម្បីចាត់វិធានការបន្ត។ ក្នុងករណីខាងលើនេះ ពេលសមត្ថកិច្ចកំពុងប្រតិបត្តិការគេបានឃើញមានវត្តមានរបស់លោក ស៊ិន វណ្ណរិន សមាជិកក្រុមប្រឹក្សាស្រុកកែវសីមា ហើយត្រូវគេដឹងថា ជាម្ចាស់រថយន្តដឹកឈើខុសច្បាប់នោះ ចេញមុខទៅចរចាជាមួយសមត្ថកិច្ច ដើម្បីរំដោះយករថយន្តល្មើសនោះវិញ។ ទោះជាយ៉ាងណា ករណីបង្ក្រាបការជួញដូរឈើឆ្លងនេះខាងលើ សមត្ថកិច្ចមិនបានឃាត់ខ្លួនមនុស្សណាម្នាក់ឡើយ។
ក្រុមអ្នកតាមដានបរិស្ថានបាននិយាយថា បច្ចុប្បន្នព្រៃឈើក្នុងដែនជម្រកការពារសត្វព្រៃកែវសីមា ដែលមានលោក ឌិន ប៊ុនធឿន ជានាយកគ្រប់គ្រងកំពុងមានសកម្មភាពកាប់ឈើប្រណីត និងឈើប្រភេទលេខ១ លេខ២ យ៉ាងអនាធិបតេយ្យ ខណៈឈើប្រណីតដូចជា ធ្នង់ នាងនួន ត្រូវបានគេសង្កេតឃើញថា មិនមានសេសសល់នៅក្នុងព្រៃដែនជម្រកនេះទៀតទេ ពោលគឺត្រូវគេកាប់អស់គ្នាសោះក្នុងអំឡុងពេលប៉ុន្មានឆ្នាំចុងក្រោយនេះ។
ក្រុមអ្នកអង្កេតដដែលបន្តថា បទល្មើសព្រៃឈើនៅដែនជម្រកសត្វព្រៃកែវសីមា ដែលមានវិសាលភាពលើផ្ទៃដីចំនួនបីក្រុង-ស្រុក គឺ ស្រុកកែវសីមា ស្រុកអូររាំង និងក្រុងសែនមនោរម្យ បានកើតមានខ្លាំងបំផុតនៅចំណុច អណ្តូងក្រឡឹង រកា ចុងរាំង អូរខ្ទង់ ស្រែព្រះ កាទី គីឡូ៥៩ រហូតដល់គីឡូ៧៥ តាមបណ្តោយផ្លូវជាតិលេខ៧៦ ចុងផ្លាស់ ស្រែឈូក និងតំបន់ជាច្រើនទៀតដែលសម្បូរឈើកម្រៗ។
សកម្មភាពក្រុមឈ្មួញរកស៊ីឈើទាំងនោះ ភាគច្រើនគឺបានដឹកចេញទៅប្រទេសវៀតណាម តាមច្រករបៀងចាប់ពីស្រុកកែវសីមា ខេត្តមណ្ឌលគិរី រហូតដល់ច្រករបៀងនៅស្រុកស្នូល ខេត្តក្រចេះ ដែលមានច្រកសំខាន់ៗសម្រាប់នាំឈើចេញប្រមាណជា១០ទីតាំងក្នុងទឹកដីនៃខេត្តទាំងពីរ៕
ចែករំលែកព័តមាននេះ