ខេត្តសៀមរាប ៖ អាជ្ញាធរក្រុងសៀមរាបនឹងចុះរៀបចំសណ្តាប់ធ្នាប់ និងទប់ស្កាត់ ការលក់ដូរនៅលើផ្លូវមុខព្រះរាជដំណាក់ ក្នុងបរិវេណ មុខ និងក្រោយព្រះអង្គចេក ព្រះអង្គចម ដឹកនាំដោយលោក សូរ ប្លាតុង អភិបាលក្រុងសៀមរាប នាថ្ងៃទី២ ខែឧសភា ឆ្នាំ២០១៨ ស្ថិតនៅក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាប។ លោក សូរ ប្លាតុង អភិបាលក្រុងសៀមរាប បានឱ្យដឹងនៅថ្ងៃទី១ ខែឧសភា ឆ្នាំ២០១៨នេះថា កម្លាំងរបស់លោក នឹងចុះទៅទប់ស្កាត់កន្លែងលក់ដូរ នៅសួនច្បារមុខព្រះរាជដំណាក់នៅព្រលឹម ថ្ងៃទី២ ឧសភាស្អែកនេះព្រោះថា ទីតាំងទី១/ជាទីសក្ការៈបូជា ដែលមានសាធារណៈជនជាច្រើនចេញ ចូល អុជធូប បួងសួង សុំសេចក្តីសុខសប្បាយ។
ទីតាំងទី២/ ជាតំបន់ទេសចរណ៍ ដែលកន្លងមកភ្ញៀវទេសចរជាតិ និងអន្តរជាតិជាច្រើន ជាពិសេសអ្នកទេសចរណ៍ ជនជាតិចិន ដែលចេញចូលទស្សនាព្រះរាជដំណាក់ ព្រមទាំងនាំគ្នាមកអុជធូប នៅទីសក្ការៈបូជា របស់ ព្រះអង្គចេក ព្រះអង្គចម ផងដែរ។ និងទីតាំងទី៣/ ដែលជាតំបន់ ជាបេះដូងនៃក្រុងសៀមរាប ដូច្នេះទីនោះមិនគួរឱ្យមានការលក់ដូរពេញផ្លូវបែបនេះទេ។
លោកអភិបាលក្រុងសៀមរាប បានបញ្ជាក់ទៀតថា អាជីវករទាំងនោះបានចូលមកលក់នៅតំបន់ខាងលើ ក្នុងអំឡុងពេលចូលឆ្នាំ ហើយពួកគេ បែរជាមិនចេញ នៅបន្តលក់រហូតមកពេលនេះ ដោយមិនព្រមចាកចេញឡើយ ហើយលើសពីនេះ ពួកគេបានពង្រីកការលក់ដូររបស់ពួកគេច្រើនលើសដើម ដែលជាក្ដីបារម្ភរបស់អាជ្ញាធរ ថា នឹងអាចមានការកើនឡើងនៃចំនួនអាជីវករ ប្រសិនបើគ្មានការទប់ស្កាត់ និងគ្រប់គ្រងបានទាន់ពេល វេលា ខណៈនេះអាជីវករដែលកំពុងលក់ទាំងអស់ សរុបមានចំនួនជិត១០០នាក់ផងដែរ៕
ចែករំលែកព័តមាននេះ