ខេត្តបន្ទាយមានជ័យ ៖ ត្រឹមតុដែកមួយ ដាក់លើម៉ូតូនិងសរសេរថា «កាត់សក់» ជាមួយនឹងឧបករណ៍បន្តិចបន្តួច បុរសម្នាក់អាចរកចំណូលជាមធ្យមបាន៥ម៉ឺនរៀល ដោយមិនបាច់ខំប្រឹង ។ មិនតែប៉ុណ្ណោះ…
ខេត្តបន្ទាយមានជ័យ ៖ ត្រឹមតុដែកមួយ ដាក់លើម៉ូតូនិងសរសេរថា «កាត់សក់» ជាមួយនឹងឧបករណ៍បន្តិចបន្តួច បុរសម្នាក់អាចរកចំណូលជាមធ្យមបាន៥ម៉ឺនរៀល ដោយមិនបាច់ខំប្រឹង ។ មិនតែប៉ុណ្ណោះ យប់ឡើងអាចជួយកិច្ចការសង្គមជាតិថែមទៀតផង ។ ជាងកាត់សក់ចល័ត្ររូបនេះ ឈ្មោះ សៅ ចាន់ម៉ុន អាយុ៤២ឆ្នាំ មានទីលំនៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត និងជាប្រជាការពារភូមិផងដែរ ។ ស្របតាមសម័យទំនើបជាងកាត់សក់ចល័តរូបនេះ ប្រើឧបករណ៍កាត់សក់កន្ត្រៃអគ្គិសនី ដូចហាងទំនើបៗដែរ ប៉ុន្តែអ្វីដែលមិនដែលប្រទះនោះ កន្ត្រៃអគ្គិសនីរបស់គាត់ កែច្នៃប្រើត្រឹមដោតខ្សែភ្លើងចេញពីអាគុយម៉ូតូអាចដំណើរការ និងកាត់សក់បានគ្រប់កន្លែង ។
ជួបសម្ភាសន៍ផ្ទាល់ជាមួយជាងកាត់សក់រូបនេះបាននិយាយថា គាត់ប្រកបរបរនេះ ជាង១៥ឆ្នាំហើយ គឺដំបូងមានរយៈពេល៤ខែ នៅឯខេត្តព្រះវិហារ ខណៈទៅស្នាក់នៅទីនោះ និង១៥ឆ្នាំ នៅក្រុងប៉ោយប៉ែត ។ គាត់អះអាងថា របរនេះមិនល្អភ្នែកមើលទេ តែអាចរកលុយចិញ្ចឹមគ្រួសារ ដែលមានកូនក្នុងបន្ទុករហូត
ដល់ទៅ៣នាក់ឲ្យរៀនសូត្របាន ។ គាត់ថា តម្លៃកាត់សក់សម្រាប់មនុស្សចាស់ម្នាក់៣០០០រៀល ឯក្មេង
តាមអាយុបើក្មេងតូច១៥០០រៀល និងវ័យជំទង់២០០០រៀលជាដើម ។ គាត់ថា បើប៉ះចំគ្រួសារខ្វះទីទ័ល ក្រ កូនច្រើនក្នុងបន្ទុកក៏មានករណីលែកលែងអាចយកក្នុងតម្លៃតិចតួចបំផុតរហូតកន្លែងខ្លះមិនយកកម្រៃទៀតផង។
ជាងកាត់សក់រូបនេះបន្តថា ដោយសារម៉ូយ (អតិថិជន) ស្គាល់ច្រើនធ្វើឲ្យអាជីពគាត់បន្តតាំងពីដើមរហូតទល់បច្ចុប្បន្នមិនថា ប្រជាពលរដ្ឋតាមភូមិ សូម្បីតែព្រះសង្ឃនិងដូនជីតាមវត្តមួយចំនួន ក៏ត្រូវការគាត់កាត់ឬកោរសក់ឲ្យដែរ ។
ចែករំលែកព័តមាននេះ