រាជធានីភ្នំពេញ ៖ ថ្ងៃដំបូងនៃការចុះបញ្ជីគណបក្សនយោបាយឈរបោះឆ្នោត និងបញ្ជីបេក្ខជនឈរឈ្មោះ គឺមានគណបក្សនយោបាយចំនួន២បានដាក់ពាក្យសុំជាមួយគណៈកម្មាធិការជាតិរៀបចំការបោះឆ្នោត(គ.ជ.ប) គឺគណបក្សប្រជាជនកម្ពុជាដែលបានដាក់ឈ្មោះសម្រាប់២៥មណ្ឌល និងគណបក្សទី២ គឺគណបក្សយុវជនកម្ពុជាលើ១៧មណ្ឌល ។
នេះបើយោងតាមការសេចក្តីប្រកាសព័ត៌មានរបស់ (គ.ជ.ប) ចុះថ្ងៃទី៣០ ខែមេសា ឆ្នាំ២០១៨ ដែលជាថ្ងៃទី០១ នៃការទទួលពាក្យពីគណបក្សនយោបាយដែលមានបំណងចូលរួមប្រកួតប្រជែងការបោះឆ្នោតរដ្ឋសភាដែលនឹងប្រព្រឹត្តទៅនាថ្ងៃទី២៩ ខែកក្កដា ឆ្នាំ២០១៨ ។ យ៉ាងណាមិញ សម្រាប់គណបក្សនយោបាយប្រមាណជាង៣០បក្សទាំងចាស់ និងបង្កើតថ្មី និងបានចុះបញ្ជីជាមួយក្រសួងមហាផ្ទៃ បើក្រឡែកមើលកម្លាំងវិញហាក់នៅចាញ់ប្រៀបគណបក្សប្រជាជនកម្ពុជាឆ្ងាយណាស់ទាំងចំនួនមណ្ឌលដែលឈរឈ្មោះប្រកួតប្រជែង និងធនធានមនុស្សក៏ដូចជា ប្រវត្តិនៃការអភិវឌ្ឍប្រទេស ។
លោក សុខ ឥសាន អ្នកនាំពាក្យគណបក្សប្រជាជនកម្ពុជានាថ្ងៃទី០១ ខែឧសភា ឆ្នាំ២០១៨ បានបង្ហោះសារតាមប្រព័ន្ធតេឡេក្រាមរៀបរាប់អំពីភាពខ្លាំងរបស់គណបក្សកាន់អំណាចមួយនេះ សម្រាប់ការបោះឆ្នោតថ្នាក់ជាតិឆ្នាំ២០១៨ខាងមុខនេះ ដោយអះអាងថា សន្លឹកបៀរសម្រាប់លេងរបស់គណបក្សប្រជាជនកម្ពុជា គឺពិតជាល្អខ្លាំងណាស់ ។
លោកសុខ ឥសានបានសរសេរថា ៖ «គណបក្សប្រជាជនកម្ពុជាពិតជាមានសន្លឹកបៀរអាត់បួន សម្រាប់លេងជាមួយបណ្តាគណបក្សនយោបាយផ្សេងៗដែលមានអត្ថភាពនៅកម្ពុជា [ដូចជា] – អាត់ទី១ គឺគណបក្សប្រជាជនកម្ពុជា មានគុណសម្បត្តិក្នុងស្នាដៃជាប្រវត្តិសាស្ត្រក្នុងការវាយផ្តួលរំលំរបបប្រល័យពូជសាសន៍ប៉ុលពត រំដោះប្រជាជនឲ្យរួចផុតពីការកាប់សម្លាប់ពីរបបប្រល័យពូជសាសន៍ប៉ុលពត បានទាន់ពេលវេលាតាមការអំពាវនាវរបស់ប្រជាជន ។ – អាត់ ទី២ គឺគណបក្សប្រជាជនកម្ពុជាបានដាក់ចេញនូវនយោបាយបង្រួមបង្រួមជាតិឈានដល់កិច្ចព្រមព្រៀងទីក្រុងប៉ារីសថ្ងៃ២៣ តុលា ឆ្នាំ១៩៩១ បើកផ្លូវឲ្យអ៊ុនតាក់រៀបចំការបោះឆ្នោតឆ្នាំ៩៣ បង្កើតរដ្ឋធម្មនុញ្ញសម្រាប់ប្រើប្រាស់ដល់សព្វថ្ងៃ ។ – អាត់ ទី៣ គឺគណបក្សប្រជាជនកម្ពុជាបានដាក់ចេញនយោបាយឈ្នះ -ឈ្នះ ធ្វើឲ្យអង្គការចាត់តាំងនយោបាយ និងយោធារបស់ខ្មែរក្រហមត្រូវរលំរលាយទាំងស្រុង នាំមកនូវសន្តិភាពពេញលេញជូនប្រទេសជាតិ និងប្រជាជនកម្ពុជា ។ – អាត់ទី៤ គឺគណបក្សប្រជាជនកម្ពុជាបានដឹកនាំសង្គមកម្ពុជាតាមរយៈរាជរដ្ឋាភិបាលកម្ពុជា ដឹកនាំដោយសម្តេចតេជោហ៊ុន សែន ជានាយករដ្ឋមន្ត្រី កសាង និងអភិវឌ្ឈន៍ប្រទេសមានការរីកចម្រើនលើគ្រប់វិស័យ ធ្វើឲ្យកម្ពុជាក្លាយជាប្រទេសមានចំណូលមធ្យមកម្រិតទាប និងឈានទៅរកចំណូលមធ្យមកម្រិតខ្ពស់នាពេលខាងមុខ ។
អ្នកនាំពាក្យគណបក្សប្រជាជនកម្ពុជាបានបន្ថែមថា សន្លឹកបៀរអាត់ទាំងបួននេះ គឺជាស្នាដៃនិងគុណសម្បត្តិរបស់គណបក្សប្រជាជនកម្ពុជាសម្រាប់យកទៅប្រកួតប្រជែងជាមួយ គណបក្សនយោបាយនានាដែលបានដាក់បេក្ខភាពប្រកួតប្រជែងក្នុងការបោះឆ្នោតនា ខែកក្កដាខាងមុខនេះ ។ លោកសុខ ឥសានក៏បានអំពាវនាវបងប្អូនប្រជាពលរដ្ឋមេត្តាផ្តល់ការគាំទ្រគណបក្សប្រជាជនកម្ពុជា ក្នុងការបោះឆ្នោតខាងមុខ ដើម្បីគណបក្សបន្តបេសសកកម្មដឹកនាំកសាង និងអភិវឌ្ឈន៍ប្រទេសកម្ពុជាឲ្យកាន់តែរីកចម្រើនថែមទៀត ស្របតាមបំណងប្រាថ្នារបស់បងប្អូនជាម្ចាស់ឆ្នោត ។
សម្រាប់គណបក្សខ្មែរសាធារណរដ្ឋដែលមាន លោកលន់ ឫទ្ធិ កូនប្រុសអតីតប្រធានាធិបតីលន់ ណុល ជាប្រធានឯណោះវិញ គឺបានប្រកាសដាក់បេក្ខភាពចូលរួមបោះឆ្នោតយ៉ាងតិច៥ខេត្ត-ក្រុង សម្រាប់ការបោះឆ្នោតខាងមុខ ។ ចំណែកឯគណបក្សប្រជាធិបតេយ្យមូលដ្ឋាន (គបម) កាលពីថ្ងៃទី៣០ ខែមេសា បើទោះបីជាមិនទាន់ចុះបញ្ជីគណបក្សនយោបាយឈរបោះឆ្នោត និងបញ្ជីបេក្ខជនឈរឈ្មោះជាមួយ (គ.ជ.ប) ផងបានគម្រាមថា គណបក្សមួយនេះអាចនឹងដកខ្លួនចេញពីការបោះឆ្នោត ប្រសិនលក្ខខណ្ឌមួយចំនួនមិនត្រូវបានបំពេញ ។
យោងតាមសេចក្តីថ្លែងការណ៍របស់គណបក្សប្រជាធិបតេយ្យមូលដ្ឋានចុះថ្ងៃទី៣០ ខែមេសា ឆ្នាំ២០១៨ បានបញ្ជាក់ថា គណបក្សមួយនេះកំពុងត្រៀមចូលរួមការបោះឆ្នោតជាតិនាពេលខាងមុខ ។ តែ (គ.ប.ម) អាចដកខ្លួនចេញពីការបោះឆ្នោតវិញដែរ ដោយអះអាងថា ការដកខ្លួនចេញក្នុងលក្ខខណ្ឌមួយចំនួនមិនត្រូវបានបំពេញ ទី១ – គ្មានការរំខានក្នុងការធ្វើសកម្មភាពដូចជាការលើកស្លាក ការជួបជុំសមាជិកនិងអ្នកគាំទ្រ ។ ទី២- មិនមានការគម្រាមកំហែងក្រោមរូបភាពផ្សេងៗដល់បេក្ខជន សកម្មជន និងអ្នកគាំទ្រ ៕
ចែករំលែកព័តមាននេះ