រាជធានីភ្នំពេញ ៖ មន្ត្រីជាន់ខ្ពស់នៃរាជរដ្ឋាភិបាលកម្ពុជា រំពឹងថា តាមរយៈវេទិកាសេដ្ឋកិច្ច ខ្សែក្រវាត់មួយ ផ្លូវមួយ ដែលប្រារព្ធធ្វើឡើងនៅកម្ពុជានាពេលនេះ នឹងទាក់ទាញវិនិយោគិន និងភ្ញៀវទេសចររបស់ប្រទេសចិន…
រាជធានីភ្នំពេញ ៖ មន្ត្រីជាន់ខ្ពស់នៃរាជរដ្ឋាភិបាលកម្ពុជា រំពឹងថា តាមរយៈវេទិកាសេដ្ឋកិច្ច ខ្សែក្រវាត់មួយ ផ្លូវមួយ ដែលប្រារព្ធធ្វើឡើងនៅកម្ពុជានាពេលនេះ នឹងទាក់ទាញវិនិយោគិន និងភ្ញៀវទេសចររបស់ប្រទេសចិន មកវិនិយោគលើគ្រប់វិស័យនៅកម្ពុជាបន្ថែមទៀត ។
ថ្លែងនារសៀលថ្ងៃទី២៩ មេសា ឆ្នាំ២០១៨ នៅសណ្ឋាគារសូហ្វីតែល ភ្នំពេញ ភូគីត្រា នៅក្នុងវេទិកានេះ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីទំនាក់ទំនងជាមួយព្រឹទ្ធសភា រដ្ឋសភា និងអធិការកិច្ច បានលើកឡើងថា អ្នកវិនិយោគចិន និងហុងកុង នឹងទទួលបានព័ត៌មានពីសក្តានុពល និងអាចរកដៃគូក្នុងស្រុក ដើម្បីវិនិយោគក្នុងវិស័យជាច្រើន ដែលទាក់ទងនឹងក្របខ័ណ្ឌ « គំនិតផ្តួចផ្តើមខ្សែក្រវាត់មួយ វិថីមួយ» ដែលអាចហុចឱកាសដ៏ល្អសម្រាប់អនាគត ។
លោកជំទាវថ្លែងថា ៖« វេទិកានេះជាគំនិតផ្តួចផ្តើមឡើងដោយលោកប្រធានាធិបតីចិន ស៊ី ជិងពីន កាលពីឆ្នាំ២០១៣ ដែលបានក្លាយជាគម្រោងមួយដ៏ធំ និងមានសក្តានុពលដើម្បីជំរុញ និងបង្កើតផ្លូវពាណិជ្ជកម្មថ្មី ការតភ្ជាប់ និងឱកាសធុរកិច្ចជាមួយប្រទេសចិន ដែលឆ្លងកាត់ប្រទេសជាង៦០ក្នុងទ្វីបអាស៊ី អឺរ៉ុប មជ្ឈិមបូព៌៌ា និងអាហ្វ្រិក » ។
លោកជំទាវបន្ដថា ៖« គម្រោងនេះនឹងដើរតួនាទីដ៏សំខាន់ក្នុងការតភ្ជាប់ប្រទេសចិនជាមួយប្រទេសជាច្រើនក្នុងតំបន់ និងអន្តរទ្វីប និងជំរុញការអភិវឌ្ឍ និងសមាហរណកម្មសេដ្ឋកិច្ចក្នុងតំបន់ ជាពិសេសពាណិជ្ជកម្ម ហិរញ្ញវត្ថុ ដឹកជញ្ជូន ទេសចរណ៍ និងវិនិយោគ។ លើសពីនេះទៀត គម្រោងនេះនឹងលើកកម្ពស់កិច្ចសហប្រតិបត្តិការ និងទំនាក់ទំងរវាងស្ថាប័ននិងស្ថាប័ន រវាងប្រជាជននិងប្រជាជនក្នុងតំបន់ និងពិភពលោក » ។
លោកជំទាវបន្ថែមថា តាមរយៈការប្តេជ្ញាចិត្តខាងនយោបាយ និងមធ្យោបាយផ្សេងៗ ជាពិសេសមូលនិធិផ្លូវសូត្រ និងធនាគារវិនិយោគហេដ្ឋារចនាសម្ព័ន្ធឤស៊ី (Asian Infrastructure Investment Bank, AIIB) គម្រោងដ៏ធំនោះពិតជាទទួលបានជោគជ័យ និងផ្តល់ផលប្រយោជន៍ដ៏ធំធេងក្នុងពេលអនាគត ។
បច្ចុប្បន្ននេះ ក្រោមការដឹកនាំដ៏ត្រឹមត្រូវ និងភ្លឺស្វាងរបស់គណបក្សកុំមុយនិស្តចិន សាធារណរដ្ឋប្រជាមានិតចិនកំពុងឈានចូលទៅក្នុងសម័យថ្មីនៃឧស្សាហូបនីយកម្ម និងទំនើបភាវូបនីយកម្ម ប្រកបដោយការអភិវឌ្ឍលើគ្រប់វិស័យ ។ ប្រទេសចិនកាន់តែដើរតួនាទីយ៉ាងសំខាន់ក្នុងការចូលរួមអភិវឌ្ឍន៍ពិភពលោក តាមរយៈការពង្រឹងទំនាក់ទំនងអន្តរជាតិ ផ្តល់ជំនួយឥតសំណង និងកម្ចីឥណទានដល់ប្រទេសក្រីក្រ ជំរុញការវិនិយោគ ពាណិជ្ជកម្ម និងទេសចរណ៍ ព្រមទាំងពង្រឹង និងថែរក្សាសន្តិសុខ និងសន្តិភាពក្នុងពិភពលោក ។ កម្ពុជា និងចិន ធ្លាប់មានប្រវត្តិទំនាក់ទំនងរាប់អានគ្នាអស់កាលដ៏យូរយារមកហើយ ។
លោកជំទាវគូសបញ្ជាក់ថា ៖« បច្ចុប្បន្ន រដ្ឋាភិបាលនៃប្រទេសទាំងពីរបានសហការគ្នាយ៉ាងជិតស្និទ្ធលើគ្រប់វិស័យ និងបានផ្លាស់ប្តូរទស្សនកិច្ចកំពូលជាប្រចាំ ។ កម្ពុជាតែងតែប្រកាន់ខ្ជាប់នូវគោលការណ៍ «ចិនតែមួយ» ចំណែកចិនក៏តែងតែគាំទ្រ និងគោរពនូវឯករាជ្យភាពរបស់កម្ពុជា ។ ចិនជាប្រទេសផ្តល់ជំនួយឥតសំណងធំជាងគេរបស់កម្ពុជា និងជាប្រភពទេសចរ និងវិនិយោគបរទេសដ៏ធំបំផុតរបស់កម្ពុជាផងដែរ » ។
លោកជំទាវកិត្តិសង្គហបណ្ឌិតបានលើកឡើងទៀតថា គម្រោង « គំនិតផ្តួចផ្តើមខ្សែក្រវាត់មួយ វិថីមួយ » បានអនុវត្ត និងជះឥទ្ធិពលជាវិជ្ជមាននៅកម្ពុជាជាបណ្តើរៗ ប្រកបដោយកិច្ចសហប្រតិបត្តិការឈ្នះ-ឈ្នះ ។ កម្ពុជារំពឹងថា នឹងទទួលបានផលប្រយោជន៍កាន់តែច្រើនថែមទៀតក្នុងពេលអនាគត តាមរយៈការតភ្ជាប់កាន់តែច្រើនជាមួយចិន និងប្រទេសនានាក្នុងតំបន់ ក្នុងគម្រោងអភិវឌ្ឍន៍ផ្លូវដែក ផ្លូវគោក ផ្លូវទឹក និងអាកាស កំពង់ផែ ថាមពល និងហេដ្ឋារចនាសម្ព័ន្ធរូបវ័ន្តផ្សេងទៀតនៅកម្ពុជា ។
ព្រះរាជាណាចក្រកម្ពុជា ដែលកំពុងមានកំណើនសេដ្ឋកិច្ចខ្ពស់ និងស្ថិតស្ថេរក្នុងរង្វង់៧%ក្នុងមួយឆ្នាំ ក្នុងរយៈពេលជាង២០ឆ្នាំចុងក្រោយនេះ បានប្រែក្លាយពីសមរភូមិទៅជាទីផ្សារ ពីប្រទេសដែលខ្ទេចខ្ទាំដោយសារសង្គ្រាម ទៅជាប្រទេសដែលមានការរីកចម្រើនលើគ្រប់វិស័យ និងពីប្រទេសដែលមានការអភិវឌ្ឍតិចបំផុត ឬក្រីក្របំផុត ដែលមានចំណូលទាប ទៅជាប្រទេសដែលមានចំណូលមធ្យមកម្រិតទាប និងក្លាយជាទីផ្សារមួយដ៏ទាក់ទាញសម្រាប់ទេសចរ និងអ្នកវិនិយោគពីគ្រប់ប្រទេស ជាពិសេសអ្នកវិនិយោគចិន ក្នុងនោះមានហុងកុងផងដែរ ។
ជាក់ស្តែង យើងឃើញមានការវិនិយោគពីបរទេសយ៉ាងច្រើន ជាពិសេសពីប្រទេសចិន កំពុងហូរចូលក្នុងប្រទេសកម្ពុជា ជាពិសេសប៉ូលសេដ្ឋកិច្ចធំៗ ដូចជា រាជធានីភ្នំពេញ ខេត្តសៀមរាប និងខេត្តព្រះសីហនុ ដែលធ្វើប្រទេសកម្ពុជាបានប្រែក្លាយមុខមាត់យ៉ាងឆាប់រហ័ស ។ ជាមួយនឹងភាពទាក់ទាញនៃធនធានធម្មជាតិ ពលកម្មវ័យក្មេង និងច្បាប់វិនិយោគដ៏អំណោយផលសម្រាប់ធុរកិច្ច រាជរដ្ឋាភិបាលកម្ពុជាបាននិងកំពុងតែទាក់ទាញ និងស្វាគមន៍អ្នកវិនិយោគ ដោយមិនប្រកាន់ថា មកពីប្រទេសណាឡើយ ។ ដោយឡែក អ្នកវិនិយោគចិនកំពុងតែទទួលបានការគាំទ្រពីរដ្ឋាភិបាលនៃប្រទេសទាំងពីរ ។
ក្រោមគំនិតផ្ដួចផ្ដើមនៃគម្រោងខ្សែក្រវាត់ មួយ ផ្លូវមួយនេះ បានផ្ដល់សារប្រយោជន៍ជាច្រើនដល់កម្ពុជា ដោយជំរុញឲ្យមានសន្ទុះពាណិជ្ជកម្មរវាងប្រទេសទាំងពីរ ដែលទំហំពាណិជ្ជកម្មចិន និងកម្ពុជាកាលពីឆ្នាំ២០១៦ មានទំហំដល់៤.៨០០លានដុល្លារអាមេរិក ។ លើសពីនេះ គិតត្រឹមឆ្នាំ២០១៦ ការវិនិយោគរបស់ចិនមកកម្ពុជា មានចំនួន៥.១០០លានដុល្លារអាមេរិក ដោយភាគច្រើនវិនិយោគលើវិស័យសំណង់ វាយនភ័ណ្ឌ និងអគ្គិសនី ។
យោងតាមរបាយការណ៍របស់ធនាគារជាតិនៃកម្ពុជា បានបញ្ជាក់ថា ប្រទេសចិនជាដៃគូនាំទំនិញចូលកម្ពុជាលំដាប់លេខ១ ចាប់ពីឆ្នាំ១៩៩៨មក ហើយប្រទេសចិន ក៏ជាទីផ្សារនាំអង្ករចេញធំបំផុតរបស់កម្ពុជាផងដែរ ។ កាលពីឆ្នាំ២០១៦ ចិនបាននាំចូលមកកម្ពុជា ក្នុងទំហំទឹកប្រាក់៤.៥៥០លានដុល្លារអាមេរិក ប្រមាណជា៣៦,៩%នៃការនាំចូលសរុប ។ ចំណែកឯទំហំទឹកប្រាក់ដែលកម្ពុជានាំចេញទៅចិនវិញ មានចំនួនត្រឹមតែ៦០៩លានដុល្លារអាមេរិកប៉ុណ្ណោះ ស្មើនឹង៦%នៃការនាំចេញសរុប ៕
ចែករំលែកព័តមាននេះ