អាមេរិក ៖ តាមប្រភពព័ត៌មាន Oddity Central បានឲ្យដឹងថា ស្ត្រីម្នាក់ដែលជាគ្រូបង្រៀនសំណេរនៅមហាវិទ្យាល័យ ហ៊ានជះលុយ១៩០០០ដុល្លារ ដើម្បីប្តូរតម្រងនោមឲ្យសត្វឆ្មាដ៏ចំណាស់របស់នាង។
អ្នកគ្រូសាស្ត្រាចារ្យ Betsy Boyd មិនមែនជាអ្នកមានអីទេ ហើយប្តីរបស់អ្នកគ្រូក៏មិនមែនជាអ្នកធ្វើការរកលុយបានច្រើនអីដែរ។ តែនេះមកពីទឹកចិត្តស្រឡាញ់សត្វឆ្មារបស់ពួកគេពេក ទើបហ៊ានចំណាយប្រាក់ ដែលពួកគេសន្សំសម្រាប់ទិញរថយន្តថ្មី មកបន្តជីវិតរបស់សត្វឆ្មាបែបនេះ។ សត្វឆ្មាដែលមានម្ចាស់ស្រឡាញ់ខ្លាំងយ៉ាងនេះ មានឈ្មោះ Stanley។ វាមានជំងឺខូចតម្រងនោម ហើយពេទ្យប្រមើលថា វានឹងរស់បានតែ៣ខែទៀតទេ។
ទាំងគ្រួសារ និងគ្រូពេទ្យសុទ្ធតែមិនគាំទ្រនឹងការសម្រេចចិត្តវះកាត់ ព្រោះពួកគេគិតថា វាជាការចំណាយប្រាក់ឥតប្រយោជន៍។ នេះដោយសារតែ Stanley មានអាយុចាស់ខ្លាំងណាស់ទៅហើយ (១៧ឆ្នាំ)។ បើទោះបីជារួចផុតពីសេចក្តីស្លាប់នៅពេលនេះ មិនយូរទេនឹងអស់អាយុដដែល ព្រោះឆ្មាជាទូទៅរស់បានពី១៣ឆ្នាំទៅ១៧ឆ្នាំប៉ុណ្ណោះ។
ទោះបីជាមានការពន្យល់យ៉ាងណាក៏ដោយ ក៏ Betsy យកឆ្មារបស់នាងទៅមន្ទីរពេទ្យសត្វនៅទីក្រុង Philadelphia ដែរ។ នៅទីនោះ Stanley បានទទួលការវះកាត់បានដោយជោគជ័យ។ ប្រាក់ដែលត្រូវចំណាយគឺ១៩.០០០ដុល្លារ។
មូលហេតុដែលធ្វើឲ្យអ្នកគ្រូសាស្ត្រាចារ្យមួយរូបនេះ ហ៊ានចំណាយច្រើនម្លឹងៗលើសត្វឆ្មា គឺមកពីទឹកចិត្តស្រឡាញ់កាត់មិនបាន ទោះបីជាវះហើយត្រូវស្លាប់នៅថ្ងៃខាងមុខដដែល ក៏នាងនៅតែមិនខ្លាចនឹងចំណាយដែរ៕
ចែករំលែកព័តមាននេះ