រាជធានីភ្នំពេញ ៖ ផ្លែគូលែនព្រៃ និងផ្លែសិរមាន់ សុទ្ធជាប្រភេទផ្លែឈើកម្រមួយដែលដើមរបស់វាមានដុះតែនៅតាមព្រៃជ្រៅៗនៅខេត្តមួយចំនួនដូចជា សៀមរាប កោះកុង និងកំពង់ឆ្នាំងជាដើម ។ ផ្លែឈើទាំងនេះ មានតាមរដូវកាល ដោយក្នុងមួយឆ្នាំយើងអាចរកទិញមកទទួលទានបានតែម្តងប៉ុណ្ណោះ ។
គួរបញ្ជាក់ថា ផ្លែឈើទាំង២ប្រភេទខាងលើនេះមានរសជាតិមិនដូចគ្នាទេ ដោយផ្លែគូលែនព្រៃ ឬអ្នកខ្លះហៅថាផ្លែគូលែនខ្ទើយនោះ មានរសជាតិផ្អែមលាយចត់ ស្រដៀងនឹងផ្លែគូលែនធម្មតា ។ ចំណែកឯផ្លែសិរមានា់មានរសជាតិជូរ និងខ្លះទៀតជូរអែម តែឆ្ងាញ់មិនចាញ់ផ្លែឈើ ដែលគេដាំនៅក្នុងស្រុកទេ ។
ស្ត្រីម្នាក់ឈ្មោះ លឿង ច្រឹប អាយុ៤២ឆ្នាំ ដែលជាអ្នកលក់ផ្លែគូលែនព្រៃ និងផ្លែសិរមាន់នៅតាមមហាវិថីព្រះមុនីវង្ស ក្បែរទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា និយាយថា គាត់មានទីលំនៅក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ ។ រាល់ថ្ងៃនេះប្តីប្រពន្ធគាត់លក់ផ្លែគូលែនព្រៃ និងផ្លែសិរមាន់ដែលបងប្អូនទិញពីអ្នកភូមិជាអ្នកដើរព្រៃផ្ញើពីខេត្តសៀមរាប និងខេត្តកំពង់ឆ្នាំង យកមកឲ្យលក់នៅភ្នំពេញ។
ស្ត្រីរូបនេះនិយាយទៀតថា ផ្លែគូលែនព្រៃដែលអ្នកនៅតាមខេត្តខ្លះហៅថា ផ្លែគូលែនខ្ទើយនោះ មានរសជាតិផ្អែមលាយចត់តិចៗ តែឆ្ងាញ់មិនចាញ់ផ្លែគូលែនធម្មតាឡើយ ហើយផ្លែគូលែនព្រៃនេះកម្រនឹងមានជាប្រចាំណាស់ ជួនកាល២ទៅ៣ឆ្នាំ ឬក៏ឈានដល់៤ឆ្នាំទើបមានម្តងក៏មានដែរ។ ចំណែកឯផ្លែសិរមាន់ ដែលអ្នកស្រុកខ្លះទៀត ហៅថាផ្លែរោទិ៍នោះ មានរសជាតិជូរតែខ្លះក៏មានរសជាតិជូរអែមដែរ ហើយវាមានរៀងរាល់ឆ្នាំ
ជាប្រចាំតែម្តង ។
ផ្លែគូលែនព្រៃឬផ្លែគូលែនខ្ទើយនេះ គាត់លក់២៥.០០០រៀលក្នុង១គីឡូក្រាម ចំណែកឯផ្លែសិរមាន់ឬផ្លែរោទ៍ គាត់លក់១៨.០០០រៀលក្នុង១គីឡូក្រាម និងអាចចុះថ្លៃបន្តិចបន្តួចទៀតទៅតាមការតថ្លៃរបស់អ្នកទិញ ។ ផ្លែឈើទាំង២ប្រភេទដែលគាត់យកមកលក់នេះ គឺជាផ្លែឈើដែលបងប្អូនគាត់ទទួលទិញពីបងប្អូនប្រជាពលរដ្ឋជាអ្នកដើរព្រៃមួយចំនួននៅខេត្តសៀមរាប ខេត្តកោះកុង និងខេត្តកំពង់ឆ្នាំង ។
គាត់បន្តថា ក្នុងមួយថ្ងៃៗគាត់អាចលក់ផ្លែឈើទាំង២មុខនេះអស់ចាប់ពី៤០ទៅជាង៥០គីឡូក្រាមសម្រាប់ថ្ងៃលក់ដាច់ខ្លាំង តែបើថ្ងៃណាមិនសូវដាច់គាត់លក់អស់តែ២០ទៅ៣០គីឡូក្រាមប៉ុណ្ណោះ ។ អ្នកទិញភាគច្រើនគឺជាជនជាតិខ្មែរយើង ដែលពួកគាត់ធ្វើដំណើរនៅតាមផ្លូវបានឃើញ និងនាំគ្នាឈប់ម៉ូតូ រថយន្ត រកទិញទាំងផ្លែគូលែនព្រៃ និងផ្លែសិរមាន់ មិនសូវដាច់ឡើយដោយខ្លះទិញកន្លះគីឡូក្រាម ១គីឡូក្រាម និង២គីឡូក្រាមក៏មាន ។
ពួកគាត់ចូលចិត្តនាំគ្នាទិញយកទៅហូបណាស់ព្រោះផ្លែឈើទាំងនេះជាផ្លែឈើព្រៃ ដើមដុះតែក្នុងព្រៃជ្រៅនិងព្រៃធំៗ ជាពិសេសជាផ្លែឈើធម្មជាតិសុទ្ធសាធមិនមានជាតិគីមីឡើយ ដោយមានតែមួយឆ្នាំម្តងទៅតាមរដូវកាលប៉ុណ្ណោះ។
ក្រៅពីផ្លែគូលែនព្រៃនិងផ្លែសិរមាន់ ដែលជាប្រភេទផ្លែឈើមានដុះតែតាមព្រៃភ្នំនេះដែរ នៅក្នុងរាជធានីភ្នំពេញ គេក៏សង្កេតឃើញថា មានផ្លែឈើព្រៃតាមរដូវកាលផ្សេងទៀតដូចជា ផ្លែ គុយជាដើមក៏ត្រូវបានគេយកមកដាក់លក់តាមជាហូរហែដែរ ៕
ចែករំលែកព័តមាននេះ