ខេត្តមណ្ឌលគិរី ៖ គ្រូបង្រៀនជនជាតិដើមភាគតិចស្ទៀងម្នាក់ បានស្លាប់ភ្លាមៗនៅកន្លែងកើតហេតុក្រោយជួបគ្រោះថ្នាក់ចរាចរណ៏រវាងម៉ូតូនឹងរថយន្តកាលពីវេលាម៉ោង៩និង១០នាទីព្រឹក ថ្ងៃទី២២ ខែមេសា ឆ្នាំ២០១៨ ចំណុចមុខស្ថានីយ៍លក់ប្រេងឥន្ធនៈតេលាចន្លោះគីឡូម៉ែត្រលេខ ៦០ និងគីឡូម៉ែត្រលេខ ៦១ ស្ថិតនៅភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី ។
លោក ស៊ុន ប៊ុនធឿន អធិការនគរបាលស្រុកកែវសីមាបានឲ្យដឹងថា មានករណីគ្រោះថ្នាក់ចរាចររវាងម៉ូតូ និងរថយន្តក្នុងទិសដៅបញ្ច្រាស់ទិសគ្នាពីលិចទៅកើត ។ អ្នកបើកបរម៉ូតូឈ្មោះ ចេង ប៊ុនលី ភេទប្រុស អាយុ៣២ឆ្នាំ ជនជាតិស្ទៀង មុខរបរគ្រូបង្រៀន ។
លោកអធិការបន្តថា ម៉ូតូធ្វើដំណើរពីកើតទៅលិចបត់ឆ្វេងក៏ប៉ះជាមួយរថយន្តបណ្ដាលឲ្យបុកប៉ើងស្លាប់ភ្លាមៗនៅកន្លែងកើតហេតុ ។ជនរងគ្រោះជិះម៉ូតូម៉ាកវ៉េវ ពណ៌ក្រហម គ្មានផ្លាកលេខ បច្ចុប្បន្នមានទីលំនៅភូមិស្រែខ្ទុម ឃុំស្រែខ្ទុម ស្រុកកែវសីមា ។ ចំណែករថយន្តពាក់ផ្លាកលេខ ភ្នំពេញ ២J-៨៥៧៣ ពណ៌ទឹកប្រាក់ អ្នកបើកបររត់គេចខ្លួនបាត់ ៕
ចែករំលែកព័តមាននេះ