ខេត្តព្រៃវែង ៖ បុរសម្នាក់បានឡើងលើដើមម្ជូរអំពិលចង.កសម្លាប់ខ្លួនបណ្តាលឱ្យស្លាប់បាត់បង់ជីវិត និងបង្កឱ្យមានការភ្ញាក់ផ្អើលដល់អ្នកស្រុកនាំគ្នាចោមរោមមើលទាំងហួសចិត្ត ។ ហេតុការណ៌ភ្ញាក់ផ្អើលនេះបានកើតឡើងកាលពីវេលាម៉ោង៦ព្រឹក ថ្ងៃទី២២ ខែមេសា ឆ្នាំ២០១៨ នេះនៅចំណុចទួលព្រៃដំបង ដែលស្ថិតក្នុងភូមិចារ ឃុំរំលេច ស្រុកស៊ីធរកណ្តាល ខេត្តព្រៃវែង ។ បុរសដែលចង.កសម្លាប់ខ្លួននេះត្រូវបានគេស្គាល់ថាឈ្មោះ អ៊ន់ ជ្រីវ អាយុ៣៨ឆ្នាំ មានទីលំនៅក្នុងភូមិកើតហេតុ ។
ប្រភពព័ត៌មានពីស្ត្រីម្នាក់ឈ្មោះ ហ៊ាប ញ៉ អាយុ៣២ឆ្នាំ ដែលមានផ្ទះនៅក្បែរកន្លែងកើតហេតុបានឱ្យដឹងថា នៅព្រឹកកើតហេតុនោះពេលដែលរូបគាត់កំពុងដើរទៅរកកន្លែងបត់ជើងនៅគុម្ពោតព្រៃខាងកើតផ្ទះក៏ស្រាប់តែឃើញសាកសពជនរងគ្រោះបានចង.កនៅលើដើមអំពិលស្លាប់បាត់ទៅហើយ ដោយប្រើខ្សែលីឡុងពណ៌ខ្មៅចងរឹត.កខ្លួនឯងឃើញបែបនេះគាត់ក៏រាយការណ៌ប្រាប់សមត្ថកិច្ច ចុះទៅពិនិត្យកន្លែងកើតហេតុតែម្តង ។
តាមការពិនិត្យលើសាកសពសមត្ថកិច្ចបានឱ្យដឹងថា នៅលើដងខ្លួននៃសពគឺពុំឃើញមានស្លាកស្នាមជាំ ឬមុខរបួសអ្វីដែលបញ្ជាក់ថា ជាអំពើឃាតកម្មនោះទេ ជាមួយគ្នានេះដោយក្រុមគ្រួសារនៃសពបានអះអាងថា ជនរងគ្រោះមានជម្ងឺសរសៃរប្រសាទផងនោះ ទើបសមត្ថកិច្ចសន្និដ្ឋានថា ការធ្វើអត្តឃាតនេះគឺដោយសារតែជម្ងឺសរសៃរប្រសាទរើឡើង ឬអាចមកពីជនរងគ្រោះខូចចិត្តខ្លួនឯងមានជម្ងឺទើបគិតខ្លីហើយធ្វើអត្តឃាតខ្លួនឯងតែម្តង ៕
ចែករំលែកព័តមាននេះ