ខេត្តត្បូងឃ្មុំ ៖ ដេប៉ូលក់ក្រួសខ្សាច់ចំនួន០២កន្លែងនៅទល់មុខសាលាបឋមសិក្សាទន្លេបិទ ក្នុងឃុំទន្លេបិទ ស្រុកត្បូងឃ្មុំ នាពេលកន្លងមកត្រូវបានស្ថាប័នជំនាញមានមន្ទីររ៉ែ និងថាមពលខេត្ត មន្ទីរបរិស្ថានខេត្ត អាជ្ញាធរមូលដ្ឋាន ហៅឲ្យមកស្តាប់ការណែនាំ…
ខេត្តត្បូងឃ្មុំ ៖ ដេប៉ូលក់ក្រួសខ្សាច់ចំនួន០២កន្លែងនៅទល់មុខសាលាបឋមសិក្សាទន្លេបិទ ក្នុងឃុំទន្លេបិទ ស្រុកត្បូងឃ្មុំ នាពេលកន្លងមកត្រូវបានស្ថាប័នជំនាញមានមន្ទីររ៉ែ និងថាមពលខេត្ត មន្ទីរបរិស្ថានខេត្ត អាជ្ញាធរមូលដ្ឋាន ហៅឲ្យមកស្តាប់ការណែនាំ និងបានធ្វើកិច្ចសន្យាយល់ព្រមចាក់បេតុងឲ្យស្អាត និងពំនូកខ្សាច់ថយពីផ្លូវបេតុងផងដែរ តែម្ចាស់ទីតាំងខាងលើនេះហាក់បីដូចជាផ្គើនដោយមិនបាននាំគ្នាគោរពតាមនោះទេហើយក្នុងពេលខាងមុខគណៈកម្មការចម្រុះនឹងត្រៀមចុះបិទបណ្តោះអាសន្ន ។
លោក ភិន ឈុន មេឃុំទន្លេបិទមានប្រសាសន៏ឲ្យដឹងនៅព្រឹកថ្ងៃទី០៨ ខែមេសា ឆ្នាំ២០១៨ ថាកន្លងមកនេះមានប្រជាពលរដ្ឋជិត១០០គ្រួសារ រស់នៅក្នុងឃុំទន្លេបិទបាននាំគ្នាផ្តិតមេដៃលើលិខិតស្នើសុំទៅលោកអភិបាលខេត្តឲ្យមានវិធានការជាមួយនឹងក្រុមរថយន្តដឹកក្រួស ខ្សាច់ ចេញពីដេប៉ូជាច្រើនកន្លែងដោយមិនបានគ្របឲ្យបានត្រឹមត្រូវធ្វើឲ្យខ្សាច់ជ្រុះរាយប៉ាយតាមផ្លូវបេតុង និងប៉ើងចូលផ្ទះជាដើម ។
លោកមេឃុំទន្លេបិទប្រាប់បន្តថា ដេប៉ូលក់ក្រួសខ្សាច់ចាប់ពីក្រោមស្ពានគីហ្ស៊ុណាមកដល់ត្រង់ចំណុចមុខវិទ្យាល័យទន្លេបិទក្នុងនោះមានតែ២កន្លែងទេ ដែលមើលទៅយ៉ាប់ជាងគេនោះគឺត្រង់មុខសាលាបឋមសិក្សាទន្លេបិទតែម្តង ។ មានតែវិធានការផាកពិន័យឲ្យចាស់ដៃនោះទេ ទើបម្ចាស់ដេប៉ូរាងចាល និងចេះរៀបចំកន្លែងរបស់ខ្លួនឲ្យបានសមរម្យមិនបង្កផលប៉ះពាល់បរិស្ថាន ៕
ចែករំលែកព័តមាននេះ