រាជធានីភ្នំពេញ ៖ រថយន្តម៉ាកឡិចស៊ីស RX-300 មួយគ្រឿងបានបើកបោះពួយជ្រុលទៅបុកក្បាលរបាំងថ្មពុះចែកទ្រូងផ្លូវមួយកន្លែងបណ្ដាលឲ្យក្រពឹតរួញមុខខូចខាតទាំងស្រុង ។ ហេតុការណ៍នោះបានកើតឡើង កាលពីវេលាម៉ោង១១ព្រឹក ថ្ងៃទី៦ ខែមេសា ឆ្នាំ២០១៨ នៅលើកំណាត់មហាវិថីសហព័ន្ធរុស្ស៊ី ត្រង់ចំណុចមុខអាកាសយានដ្ឋានអន្តរជាតិភ្នំពេញ ភូមិក្បាលដំរី សង្កាត់កាកាប២ ខណ្ឌពោធិ៍សែនជ័យ ។
នគរបាលបានឲ្យដឹងថា រថយន្តឡិចស៊ីស RX-300 មួយគ្រឿងនេះ ពណ៍ទឹកមាស ពាក់ផ្លាកលេខ ភ្នំពេញ ២O-៤១២៨ ហើយអ្នកបើកបរមិនត្រូវបានស្គាល់អត្តសញ្ញាណឡើយ ព្រោះភ្លាមៗនោះបានចាកចេញទៅបាត់មិនបានស្ថិតនៅកន្លែងកើតហេតុនោះទេ ។
នៅមុនពេលកើតហេតុខាងលើរថយន្តនេះបានបើកបរធ្វើដំណើរក្នុងទិសដៅពីលិចទៅកើតលុះទៅដល់ត្រង់ចំណុចកើតហេតុនោះមិនមាននរណាបានចាប់អារម្មណ៍ថា មានបញ្ហាអ្វីកើតឡើងទេ ទើបមានគ្រោះថ្នាក់បែបនេះ ។
ប៉ុន្តែតាមការសន្និដ្ឋានសង្ស័យថា អ្នកបើបរបានបើកជែងរថយន្តផ្សេងទៀតដែលនៅខាងមុខខ្លួន ឬក៏អាចបើកឆ្លងផ្លូវដោយខ្វះការប្រុងប្រយ័ត្ន ក៏បានបុកក្បាលរបាំងថ្មពុះចែកទ្រូងផ្លូវពេញទំហឹងបណ្ដាលឲ្យក្រពឹតរួញខូចខាតទាំងស្រុង និងជាប់ជាមួយរបាំងថ្មនោះ ហើយពោងសុវត្ថិភាពរបស់រថយន្តនេះបានផ្ទុះឡើង២គ្រាប់តែម្ដងទើបអ្នកបើកបរគ្មានគ្រោះថ្នាក់ ហើយក្រោយពេលកើតហេតុបានចាកចេញពីទីនោះបាត់ស្រមោលចោលរថយន្ត ។ បន្ទាប់មកនគរបាលបានចុះទៅកាន់ស្ទូចយករថយន្តខាងលើទៅរក្សាទុករង់ចាំឲ្យម្ចាស់ចូលខ្លួនទៅដោះស្រាយការខូចខាតរបាំងថ្មពុះចែកទ្រូងផ្លូវនោះនៅពេលក្រោយ ៕
ចែករំលែកព័តមាននេះ