ខេត្តបាត់ដំបង ៖ សំណុំរឿងក្មេងប្រុសម្នាក់ស្លាប់ ដោយសារម៉ាស៊ីនច្រូតស្រូវកិនដែលត្រូវលោកអធិការនគរបាលស្រុកថ្មគោល សម្ងំដោះស្រាយបញ្ចប់ក្រៅប្រព័ន្ធច្បាប់ស្ងាត់ៗត្រូវបានបែកធ្លាយកាលពីថ្ងៃទី១៤ មករា ២០១៣ ក្រោយពីមន្ត្រីនានា និងប្រជាពលរដ្ឋទម្លាយរឿងនេះ ព្រោះតែពួកគេមិនសប្បាយចិត្តនឹងលោកអធិការដែលទាមទារប្រាក់ពីភាគីជនរងគ្រោះ និងភាគីបង្កគ្មានមេត្តាក្រោយពីចរចាបញ្ចប់រឿង ។
ប្រភពព័ត៌មានបានឱ្យដឹងថា ក្មេងប្រុសម្នាក់ឈ្មោះឈូក ណន់ អាយុ១៣ឆ្នាំ ត្រូវម៉ាស៊ីនច្រូតស្រូវកិនចំក្បាលបណ្តាលឱ្យស្លាប់ កាលពីវេលាម៉ោង៩ព្រឹកថ្ងៃទី១៣ មករា នៅកណ្តាលវាលស្រែ ដែលស្ថិតក្នុងភូមិជ្រោយអម្ពរ ឃុំបន្សាយត្រែង ស្រុកថ្មគោល ។ ប្រភពនេះមិនបានបញ្ជាក់ប្រាប់អំពីឈ្មោះម្ចាស់ម៉ាស៊ីនច្រូតស្រូវនោះទេ តែបានប្រាប់ថា ម្ចាស់ម៉ាស៊ីននោះរស់នៅក្នុងភូមិ-ឃុំខាងលើនេះដែរ ។
មន្ត្រីម្នាក់ដែលសុំមិនប្រាប់ឈ្មោះបានទម្លាយរឿងនេះថា លោកអធិការស្រុកថ្មគោល បានព្យាយាមសម្របសម្រួលបញ្ចប់រឿងនេះដោយស្ងាត់ៗ ។ បន្ទាប់ពីមានការជួយបញ្ចុះបញ្ចូលពីសមត្ថកិច្ច ភាគីបង្ក (ភាគីម៉ាស៊ីនច្រូត) បានយល់ព្រមបង់សំណង៣ម៉ឺនបាត ជូនទៅភាគីរងគ្រោះដើម្បីបញ្ចប់រឿង។ ក្រោយពីប្រគល់ប្រាក់សំណងជូនភាគីជនរងគ្រោះ ស្រាប់តែលោកអធិការបញ្ជាឱ្យដកហូតប្រាក់នេះពីភាគីជនរងគ្រោះចំនួន៤.៥០០បាត និងបានទាមទារប្រាក់ពីភាគីបង្កចំនួន៦០០ដុល្លារទៀត ជាថ្នូរមិនបញ្ជូនសំណុំរឿងទៅតុលាការ ។ ទោះបែបណា កោះសន្តិភាពមិនអាចទំនាក់ទំនងសុំការបំភ្លឺបានទេ ជុំវិញរឿងអាស្រូវនេះពីលោកយឹម វិចិត្រ អធិការនគរបាលស្រុកថ្មគោល នៅរសៀលថ្ងៃទី១៥ មករា ២០១៣ នេះ ៕
ចែករំលែកព័តមាននេះ