រាជធានីភ្នំពេញ ៖ បុរសម្នាក់មួម៉ៅក្ដៅក្រហាយក្នុងចិត្តព្រោះតែបញ្ហាផ្សេងៗនៅក្នុងគ្រួសារ ក៏បាន ទៅផឹកស្រាស្រវឹងស្រឿងៗទើបត្រលប់ចូលផ្ទះ ហើយបានមានទំនាស់ជាមួយប្រពន្ធរបស់ខ្លួនយ៉ាងខ្លាំង និងស្ទើរតែក្លាយទៅជាហិង្សាវាយតប់ប្រពន្ធទៅហើយ។ ដែលជាហេតុបង្កឲ្យមានការភ្ញាក់ផ្អើលដល់អ្នក ជិតខាង ហើយខណៈនោះដោយសារតែខ្លាចមានហិង្សាកើតឡើងទើបអ្នកជិតខាង បានរាយការណ៍ជូន នគរបាលចុះទៅអន្តរាគមន៍ឃាត់ឲ្យមានការស្ងប់ស្ងាត់។ ប៉ុន្តែពេលចុះទៅដល់បែរជាធ្វើឲ្យកម្លាំង នគរបាលព្រលឹងចុងសក់ព្រោះបុរសនោះបញ្ចេញចរឹតខ្លាំងដូចតោដោយបានទាញដាវប្រុងកាប់តដៃ។ ប៉ុន្តែជាសំណាងរបស់នគរបាល បុរសនោះរអិលជើងដួលរបូតដាវពីដៃ ក៏ត្រូវនគរបាលស្ទុះទៅជាន់ដាវ ជាប់ រួចចាប់ខ្លួននាំយកទៅសាកសួរនៅប៉ុស្តិ៍តែម្ដង។
ហេតុការណ៍នោះបានបង្កឲ្យមានការភ្ញាក់ផ្អើល ឡើងកាលពីវេលាម៉ោង៥ និង៥៥នាទីល្ងាច ថ្ងៃទី២៩ ខែមីនា ឆ្នាំ២០១៨ នៅចំណុចផ្ទះជួលមួយ កន្លែងស្ថិតនៅខាងក្រោយរោងចក្រកាត់ដេរ ឃ្យូ អឹម អាយ នៅក្នុងភូមិត្រពាំងពោធិ៍ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។ នគរបាលបានឲ្យដឹងថា បុរសដែលត្រូវចាប់ខ្លួនម្នាក់នេះឈ្មោះ សូ ឡេងហុង អាយុ៤០ឆ្នាំ មានប្រពន្ធឈ្មោះ ម៉េង ចាន់តេង អាយុ៣២ឆ្នាំ ហើយអ្នកទាំងពីរនាក់នោះមាន ទីលំនៅអចិន្ត្រៃយ៍នៅក្នុងស្រុកស្រីសន្ធរ ខេត្តកំពង់ចាម និងបានមកស្នាក់នៅផ្ទះជួលក្នុងចំណុចកើតហេតុ ខាងលើ។ ប្រភពដដែលបានបន្តទៀតថា បុរសនេះមានអារម្មណ៍មួម៉ៅក្ដៅក្រហាយក្នុងចិត្តព្រោះតែមាន បញ្ហាខ្លះៗនៅក្នុងគ្រួសារ ប៉ុន្តែមិនបានរកដំណោះស្រាយដោយសន្តិវិធីនោះឡើយ។
ដោយឡែកនៅមុនពេលកើតហេតុបុរសខាងលើបានទៅផឹកស្រានៅខាងក្រៅលុះពេលស្រវឹងស្រឿងៗបានត្រលប់ចូលផ្ទះ ហើយបានមានទំនាស់ជាមួយប្រពន្ធ។ ខណៈនោះបុរសខាងលើបានកាន់ដាវនៅក្នុងដៃ គំរាមប្រពន្ធថែមទៀត ហើយដោយសារតែខ្លាចមានអំពើហិង្សា កើតឡើងប្រជាពលរដ្ឋបានរាយការណ៍ ជូននគរបាលចុះទៅជួយអន្តរាគមន៍ ហើយពេលទៅដល់ស្រាប់តែបុរសនេះបានទាញដាវគំរាមកាប់ លើកម្លាំងនគរបាល។ ប៉ុន្តែចៃដន្យបានរអិលជើងដួលជ្រុះដាវពីដៃ ហើយនគរបាលបានស្ទុះទៅជាន់ដាវជាប់ និងចាប់ខ្លួនបាននាំទៅសាកសួរ ដើម្បីកសាងសំណុំរឿងនៅប៉ុស្តិ៍តែម្ដង ប៉ុន្តែក្រោយពេលធ្វើការអប់រំណែនាំ និងធ្វើកិច្ចសន្យារួចនគរបាលបានដោះលែងឲ្យត្រលប់ទៅវិញហើយ៕
https://youtu.be/Pa4gOhIlaq8
ចែករំលែកព័តមាននេះ