ខេត្តកំពង់ធំ ៖ ជិះម៉ូតូឆ្លងថ្នល់មិនប្រយ័ត្នត្រូវរថយន្តបុកស្លាប់ ឧប្បត្តិហេតុនេះបានកើតឡើងកាលពីយប់ថ្ងៃទី២៨ ខែមីនា ឆ្នាំ២០១៨ ស្ថិតនៅលើបណ្តោយ ផ្លូវជាតិលេខ៦ ត្រង់ចំណុចភូមិសានគរ(ខ) ឃុំសានគរ ស្រុកកំពង់ស្វាយ ខេត្តកំពង់ធំ ។
លោកវរសេនីយ៍ត្រី យន់ ឆៃយាន អធិការរងនគរបាលស្រុកកំពង់ស្វាយទទួលខាងសណ្តាប់ធ្នាប់ និងចរាចរណ៍បានឲ្យដឹងថា បើយោងតាមការបញ្ជាក់ពីសាក្សីដែលបានឃើញនៅកន្លែងកើតហេតុប្រាប់ថា ករណីចរាចរណ៍ខាងលើនេះដំបូងគេឃើញម៉ូតូហុងដាម៉ាកគុប ពណ៍ទឹកប្រាក់ ពាក់ផ្លាកលេខ ដ.១៤២៩ភ.ព១ បើកបរដោយឈ្មោះ កៅ គី ភេទប្រុស អាយុ៤៥ឆ្នាំ នៅភូមិ-ឃុំកើតហេតុខាងលើបានស្លាប់នៅនឹងកន្លែងកើតហេតុ (គ្មានមួកសុវិត្ថភាព) ដោយត្រូវបានរថយន្ត highlander ពណ៌ទឹកប្រាក់ ផ្លាកលេខ ២AQ-១៥៣៦ បើកបរទិសដៅពីលិចទៅកើតដោយឈ្មោះ សាង សុខណាក់ ភេទប្រុស អាយុ២៥ឆ្នាំ នៅភូមិ៣ ឃុំល្វា ស្រុកចំការលើ ខេត្តកំពង់ចាម បុកយ៉ាងពេញទំហឹង បណ្តាលឲ្យស្លាប់នៅនឹងកន្លែង ខណៈជនរងគ្រោះបានជិះម៉ូតូឆ្ងថ្នល់មិនបានប្រុងប្រយ័ត្ន បន្ទាប់ពីកើតហេតុអ្នកបើកបររថយន្តបានចុះរត់គេចខ្លួនពីកន្លែងកើតហេតុ ។
ករណីគ្រោះថ្នាក់ចរាចរណ៍ខាងលើនេះបានបង្កឡើងដោយសារម៉ូតូបើកបរឆ្លងកាត់ផ្លូវខ្វះការប្រុងប្រយ័ត្នរួមផ្សំជាមួយនឹងរថយន្តបើកលឿនក្រោយពេលកើតហេតុវត្ថុតាងត្រូវបាននាំយកទៅរក្សាទុកនៅអធិការស្រុកដើម្បីដោះស្រាយតាមនីតិវិធីច្បាប់ ៕
ចែករំលែកព័តមាននេះ