ខេត្តបាត់ដំបង ៖ ប្រភពពីសមត្ថកិច្ចបានឱ្យដឹងថា ជនមិនស្គាល់មុខ២នាក់ក្នុងឯកសណ្ឋានកងសន្តិសុខប្រដាប់ដោយកាំភ្លើងAK ស្វាយបត់ថ្មីសន្លាងមួយដើម បានស្ទាក់ភ្ជង់យុវជនម្នាក់នៅតាមដងផ្លូវ ហើយចាប់វាយខ្នោះដៃម្ខាងជាប់ដើមឈើ រួចប្លន់យកម៉ូតូស៊េរីទំនើបមួយគ្រឿងជិះគេចខ្លួនបាត់ដោយសុវត្ថិភាព កាលពីវេលាម៉ោងជិត១២ថ្ងៃត្រង់ ថ្ងៃទី៨ មករា នៅលើកំណាត់ផ្លូវស្ងាត់មួយកន្លែងក្នុងភូមិគ្រួស ឃុំអន្លង់រុន ស្រុកថ្មគោល ។
លោកហៀង ប៊ុនថា នាយផ្នែកព្រហ្មទណ្ឌស្រុកថ្មគោលបានឱ្យដឹងថា ជនរងគ្រោះដែលត្រូវគេប្លន់យកម៉ូតូនេះឈ្មោះជឿន ស្រស់ ភេទប្រុស អាយុ២០ឆ្នាំ នៅភូមិអន្លង់រុន ឃុំជ្រៃ ស្រុកថ្មគោល និងម៉ូតូដែលត្រូវគេប្លន់នោះម៉ាកហុងដាឌ្រីមសេ១២៥ ស៊េរី២០១២ គ្មានស្លាកលេខទេ ។ លោកប៊ុនថា បញ្ជាក់ថាជនរងគ្រោះត្រូវក្រុមខ្មាន់កាំភ្លើងមានគ្នា២នាក់ប្រើប្រាស់កាំភ្លើងAK ស្វាយបត់ភ្ជង់ រួចចាប់វាយខ្នោះដៃម្ខាងជាប់នឹងដើមអាកាស្យានៅក្បែរផ្លូវ ហើយប្លន់យកម៉ូតូនោះជិះគេចខ្លួនបាត់ស្រមោល ។ ប៉ុន្តែប្រហែលជាងកន្លះម៉ោងក្រោយមកទើបមានអ្នកដំណើរប្រទះឃើញជួយអន្តរាគមន៍ និងរាយការណ៍មកសមត្ថកិច្ច ។
ជនរងគ្រោះឈ្មោះជឿន ស្រស់ បានប្រាប់សមត្ថកិច្ចថា ក្រុមចោរ២នាក់នោះប្រដាប់ដោយកាំភ្លើងAK ស្វាយបត់ថ្មីសន្លាងក្នុងឯកសណ្ឋានពណ៌ខៀវ ដូចកងសន្តិសុខបានជិះម៉ូតូមកកៀរឱ្យខ្លួនឈប់ រួចភ្ជង់តែម្តង ។ យុវជនរូបនេះបន្តថា គ្រានោះគ្នាវាម្នាក់បានទាញខ្នោះពីចង្កេះវាយដៃខ្លួនម្ខាងជាប់នឹងដើមអាកាស្យានៅក្បែរផ្លូវដែលស្ថិតនៅកន្លែងស្ងាត់ រួចពួកវាយកម៉ូតូខ្លួនជិះយ៉ាងលឿនគេចបាត់ទៅ ។ រីឯខ្លួនដែលដៃម្ខាងជាប់ខ្នោះ និងដើមឈើគ្មានវិធីដោះស្រាយឡើយ ។ ជឿន ស្រស់ បញ្ជាក់ថា ប្រហែលជាកន្លះម៉ោងក្រោយទើបមានអ្នកដំណើរឆ្លងកាត់ហើយក៏ស្រែកហៅឱ្យគេជួយអន្តរាគមន៍ ជួយកាប់ដើមឈើទើបអាចដោះចេញបាន និងទូរស័ព្ទប្រាប់សមត្ថកិច្ចតែម្តងទៅ ។
លោកហៀង ប៊ុនថា នាយផ្នែកព្រហ្មទណ្ឌស្រុកថ្មគោលដដែលបញ្ជាក់ថា សមត្ថកិច្ចបានចុះទៅដល់ចំណុចនោះក្រោយកើតហេតុជាងកន្លះម៉ោង ព្រោះគ្មានអ្នកផ្តល់ដំណឹងនេះភ្លាមៗទេដោយសារជនរងគ្រោះត្រូវជនល្មើសចាប់វាយខ្នោះជាប់ដើមឈើមិនឱ្យរត់រកជំនួយបាន និងជាកន្លែងស្ងាត់ទៀត ។ លោកបញ្ជាក់ថា ជនរងគ្រោះបានបាត់បង់ម៉ូតូមួយគ្រឿងប្រាក់២ម៉ឺនរៀល និងទូរស័ព្ទដៃមួយគ្រឿង តែខ្មាន់កាំភ្លើងមិនបានវាយដំ ឬបាញ់គំរាមទេ ។ សមត្ថកិច្ចកំពុងស្រាវជ្រាវកំណត់មុខសញ្ញាខ្មាន់កាំភ្លើងអាការឯកសណ្ឋានសន្តិសុខទាំង២នាក់ខាងលើនេះហើយ បើទោះជាមិនទាន់មានតម្រុយណាមួយក្តី ៕
ចែករំលែកព័តមាននេះ