ពណ៌ និងវត្ថុផ្សេងៗនៅលើដំបូលផ្ទះ គឺបង្ហាញពីភាពស្រស់ស្អាត និងភាពទាន់សម័យរបស់លំនៅឋាន ។ លំនៅឋានថ្មីៗបានជ្រើសរើសប្រើប្រាស់វត្ថុ និងធ្វើដំបូលជាច្រើនម៉ូដខុសៗគ្នាទៅតាមចំណង់ចំណូលចិត្តរបស់ម្ចាស់ផ្ទះ ខណៈដំបូល និងពិដាន គឺជាចំណុចសំខាន់ខាងស្ថាបត្យកម្ម…
ពណ៌ និងវត្ថុផ្សេងៗនៅលើដំបូលផ្ទះ គឺបង្ហាញពីភាពស្រស់ស្អាត និងភាពទាន់សម័យរបស់លំនៅឋាន ។ លំនៅឋានថ្មីៗបានជ្រើសរើសប្រើប្រាស់វត្ថុ និងធ្វើដំបូលជាច្រើនម៉ូដខុសៗគ្នាទៅតាមចំណង់ចំណូលចិត្តរបស់ម្ចាស់ផ្ទះ ខណៈដំបូល និងពិដាន គឺជាចំណុចសំខាន់ខាងស្ថាបត្យកម្ម ។ ប៉ុន្តែមិនថា វាមានពណ៌ស្រស់ ឬចាស់ក្រម៉ៅនោះទេ សម្រាប់អ្នកដែលមានជំនឿលើហុងស៊ុយ អាចនឹងត្រូវពិចារណាពីភាពសមស្រប និងអត្ថន័យរបស់ពណ៌ដំបូលផ្សេងៗ ដើម្បីរស់នៅត្រជាក់ត្រជុំ សុខដុមរមនា និងមានទ្រព្យសម្បតិ្តហូរចូលហូរហៀរ ។
ដើម្បីជាចំណេះដឹងខ្លះៗទាក់ទងនឹងពណ៌ដំបូលនេះ សារព័ត៌មានកោះសន្ដិភាព ទំព័រអចលនទ្រព្យ សូមលើកយកពណ៌ដំបូលដែលស័ក្ដិសមមួយចំនួនមកបង្ហាញជូនដូចខាងក្រោមនេះ ៖
១-ដំបូលពណ៌ខៀវ ៖
តាមហុងស៊ុយប្រាប់ថា ពណ៌ខៀវជាសញ្ញារបស់ធាតុដី ហើយយើងអាចប្រើប្រាស់ពណ៌ខៀវ ដែលបង្ហាញពីធាតុនេះជាមួយដំបូលផ្ទះ ឈើ ។ ពណ៌នេះចាត់ទុកថា គឺជាពណ៌ត្រូវតាមហុងស៊ុយចូលចិត្តប្រើ ហើយក៏សូមណែនាំសម្រាប់ការយកមកប្រើជាពណ៌ដំបូល ព្រោះជឿថា វានឹងធ្វើឲ្យមានសំណាងល្អ សុខភាពល្អ មានភាពគង់វង្ស ព្រមទាំងជាពណ៌ប្រហាក់ប្រហែលនឹងបរិយាកាសផងដែរ ។
២-ដំបូលពណ៌តោ្នត ៖
ជាពណ៌ដែលមើលទៅលេចធ្លោ មានស្នេហ៍ ស្ងប់ស្ងាត់ និងរីករាយ ។ យើងអាចជ្រើសរើសបានទាំងពណ៌ត្នោតខ្ចី និងពណ៌ត្នោតក្រម៉ៅ។ ពណ៌ដំបូលផ្ទះលាយជាមួយពណ៌មាស ឬលោហៈ បើប្រើប្រាស់វត្ថុដែលមានពណ៌ទាំងនេះមកតុបតែងផ្នែកខាងក្រៅ ក៏រឹតតែធ្វើឲ្យផ្ទះដែលមានដំបូលពណ៌ត្នោតនេះ មើលទៅគួរឲ្យចាប់អារម្មណ៍កាន់តែខ្លាំងឡើង ។
៣-ដំបូលពណ៌ក្រហម ៖
ពណ៌ក្រហម គឺជាការសម្គាល់របស់ធាតុភ្លើង មានទាំងក្តីអន្តរាយ និងកម្លាំងនៃភាពច្នៃប្រឌិត។ វាជាពណ៌មួយទៀតដែលទទួលបានការពេញនិយមក្នុងការយកមកកែច្នៃខាងផ្នែកស្ថាបត្យកម្ម ។ ពណ៌ក្រហមដែលនឹងយកមកប្រើក្នុងការធ្វើដំបូលនោះ គឺអាចជ្រើសរើសបានទាំងពណ៌ក្រហមភ្លឺ ពណ៌ក្រហមព្រឿង ក្រហមត្នោត និងក្រហមក្រម៉ៅ។
៤-ដំបូលពណ៌ផ្ទៃមេឃ និងពណ៌ខ្មៅ ៖
ពណ៌ទាំងពីរនេះ គឺជាលក្ខណៈសម្គាល់របស់ធាតុទឹក ។ វាជាពណ៌ដែលអាចបង្កើតថាមពលវិជ្ជមាននៅជុំវិញផ្ទះ, បន្ថែមភាពគង់វង្ស និងនាំយកសំណាងល្អចូលមកក្នុងផ្ទះ ។ យើងក៏អាចជ្រើសរើសប្រើប្រាស់ពណ៌ប្រផេះចាស់បានដូចគ្នា ។
ទោះបីយ៉ាងណាក្ដី នេះគ្រាន់តែជាចំណេះដឹងមួយផ្នែកនៃជំនឿលើអរូបីប៉ុណ្ណោះ ។ ចំណែកកត្តាដែលសំខាន់គឺអាស្រ័យលើបុគ្គល ឬក្រុមគ្រួសារនីមួយៗត្រូវចេះកសាងសុភមង្គលដោយខ្លួនឯង ទើបជារឿងចាំបាច់ ៕
ចែករំលែកព័តមាននេះ