ខេត្តបន្ទាយមានជ័យ ៖ ក្រុមក្មេងទំនើងចំនួន២៦នាក់ ត្រូវបានកម្លាំងកងរាជអាវុធហត្ថក្រុងប៉ោយប៉ែត ធ្វើការឃាត់ខ្លួននៅចំណុចកាស៊ីណូផ្កាយ៥ កាលពីវេលាអធ្រាត្រម៉ោង០១និង០០នាទីយប់ ឈានចូលថ្ងៃទី២៣ ខែមីនា ឆ្នាំ២០១៨ ។
លោកវរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែត បានឲ្យដឹងថា ក្រុមក្មេងទំនើងដែលកម្លាំងរបស់លោកឃាត់ខ្លួននោះពួកគេបានប្រមូលផ្តុំគ្នាមានចំនួនបួនក្រុម ប្រដាប់ដោយដំបងដែកទីប និងដាវសាំម៉ូរ៉ៃជាប់ដៃ មួយចំនួនដាច់ដោយឡែកពីគ្នា ក្នុងគោលបំណងប្រុងធ្វើសកម្មភាពវាយកាប់ចាក់គ្នា ដែលជាបញ្ហាធ្វើឲ្យមានភាពអនាធិបតេយ្យដល់សង្គមផងដែរ ។ ក៏ត្រូវបានកម្លាំងល្បាតរបស់លោកប្រទះឃើញមានសកម្មភាពមិនប្រក្តីក៏ធ្វើការឃាត់ខ្លួនយកមកអប់រំណែនាំតែម្តងទៅ ។
លោកមេបញ្ជាការក្រុងប៉ោយប៉ែត បានបញ្ជាក់ឲ្យដឹងបន្ថែមទៀតថា ក្រុមក្មេងទំនើងចំនួន២៦នាក់ ដែលកម្លាំងរបស់លោកឃាត់ខ្លួនយកមកសួរនាំនៅទីបញ្ជាការក្រុងរួចហើយ ។ បានធ្វើការអប់រំណែនាំហៅជាងមកឲ្យកាត់សក់ឲ្យខ្លីគ្រប់ៗគ្នា រួចហៅអាណាព្យាបាលមកធ្វើកិច្ចសន្យាធានាយកពួកគេទៅវិញផងដែរ ៕
ចែករំលែកព័តមាននេះ