សិស្ស-និស្សិតជាង៣.០០០នាក់ ចូលរួមបោះជំរំអន្តរជាតិនៅកម្ពុជាលើកទី៨
- ភ្នំពេញ
រាជធានីភ្នំពេញ ៖ អង្គការសម្ព័ន្ធយុវជនអន្តរជាតិ (IYF) បានសហការជាមួយ ក្រសួងអប់រំ យុវជន និងកីឡា និងសាកលវិទ្យាល័យ ប៊ែលធី…
រាជធានីភ្នំពេញ ៖ អង្គការសម្ព័ន្ធយុវជនអន្តរជាតិ (IYF) បានសហការជាមួយ ក្រសួងអប់រំ យុវជន និងកីឡា និងសាកលវិទ្យាល័យ ប៊ែលធី អន្តរជាតិ រៀបចំបោះជំរំអន្តរជាតិ (World Camp) នៅកម្ពុជា ដោយមានសិស្ស-និស្សិត ចូលរួមចំនួនជាង ៣.០០០នាក់ ក្នុងនោះសិស្ស-និស្សិត ប៊ែលធី ចំនួនជាង ១.៣០០នាក់ចូលរួមផងដែរ។ ការបោះជំរំនេះ ក្រោមអធិបតីភាព លោក ស៊ាន បូរ៉ាត រដ្ឋលេខាធិការ និងជាតំណាងឯកឧត្តមបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា ក្រោមប្រធានបទ “ការអប់រំចិត្តយុវជនឲ្យមានភាពជាអ្នកដឹកនាំប្រកបដោយសីលធម៌ និងគុណធម៌” ដែលបានប្រព្រឹត្តទៅចាប់ពីថ្ងៃទី២២-២៤ ខែមីនា ឆ្នាំ២០១៨ នៅសាលមហោស្រពកោះពេជ្រ។ កម្មវិធីនេះរៀបចំឡើងក្នុងគោលបំណង អប់រំចិត្តយុវជនឲ្យប្រព្រឹត្តតែអំពើល្អ និងក្លាយខ្លួនជាអ្នកដឹកនាំ នាពេលអនាគត ប្រកបដោយសីលធម៌ និងគុណធម៌។ ការបោះជំរំនេះ ក៏មានការអញ្ជើញចូលរួមពីវាគ្មិន ល្បីៗ រួមមាន លោកបណ្ឌិត បាក់ អុកស៊ូ ស្ថាបនិកអង្គការសម្ព័ន្ធយុវជនអន្តរជាតិ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា លោក លី ឆេង សាកលវិទ្យាធិការ សាកលវិទ្យាល័យ ប៊ែលធី អន្តរជាតិ និងវាគ្មិនល្បីៗជាច្រើននាក់ទៀត។
ក្នុងឱកាសនោះដែរ លោក លី ឆេង បានលើកឡើងថា ការបោះជំរំនេះ ក្នុងគោលបំណង៤គឺ៖ ១-ការអប់រំចិត្ត ដែលជួយដល់យុវជនទាំង អស់ឲ្យស្គាល់ខ្លួនឯង ហើយចេះស្រលាញ់ខ្លួនឯង ស្រលាញ់គ្រួសារ និងចេះស្រលាញ់ជាតិ មាតុភូមិរបស់ខ្លួន។ ផ្តើមពីនោះ ក្នុងនាមខ្មែរដូចគ្នា គប្បីរួមគ្នាលើកស្ទួយវប្បធម៌ ប្រពៃណី និងលើកស្ទួយកិត្តិយសជាតិខ្លួនឯង។ ទន្ទឹមនោះត្រូវចេះគោរពច្បាប់រដ្ឋ ច្បាប់ធម្មជាតិ គោរពសាសនា រួមទាំងគោរពគោលការណ៍ផ្សេងៗទៀត ដែលមានចែងក្នុងរដ្ឋធម្មនុញ្ញ នៃព្រះរាជាណាចក្រកម្ពុជា ។ ២-គឺត្រូវចេះរស់នៅ និងធ្វើការជាក្រុម ដើម្បីដកស្រង់បទពិសោធន៍ពីគ្នាទៅវិញទៅមក។ ៣-ត្រូវរៀនធ្វើជាថ្នាក់ដឹកនាំ មុនពេលក្លាយខ្លួនជាថ្នាក់ដឹកនាំ ព្រោះនេះជាកត្តាសំខាន់បំផុត ខណៈដែលយើងត្រូវហាត់ពត់លត់ដំខ្លួនឲ្យហើយក្នុងពេលកំពុងសិក្សា។ ៤-គឺទាំងអស់គ្នាត្រូវត្រៀមខ្លួន ដើម្បីក្លាយជាទំពាំងស្នងឫស្សីដ៏ល្អសម្រាប់ជាតិ ព្រោះថា បើទំពាំងមិនល្អនោះ ពេលទៅបន្តវេនក៏វាមិនអាចល្អបាននោះឡើយ។
ក្នុងឱកាសនោះដែរ លោកបណ្ឌិត បាក់ អុកស៊ូ គ្រូជំនាញផ្នែកអប់រំចិត្ត បានមានប្រសាសន៍ថា ការអប់រំស្មារតី និងចិត្តគំនិត ពិតជាមានសារៈសំខាន់ណាស់សម្រាប់យុវជនកម្ពុជា ដើម្បីយល់ពីអត្ថន័យពិតនៃជីវិត ចេះផ្លាស់ប្តូរផ្នត់គំនិត រៀនទទួលយកនូវគំនិតរ បស់អ្នកដទៃ និងបើកចិត្តឲ្យទូលាយក្នុងការទំនាក់ទំនង ដើម្បីរស់នៅចុះសម្រុងក្នុងសង្គម។ ក្នុងពិធីបើក លោក ស៊ាន បូរ៉ាត បានមានប្រសាសន៍ថា ក្នុងនាមក្រសួងអប់រំ យុវជន និងកីឡា សូមកោតសរសើរ និងថ្លែងអំណរគុណ ចំពោះលោកបណ្ឌិត បាក់ អុកស៊ូ ស្ថាបនិកអង្គការសម្ព័ន្ធយុវជនអន្តរជាតិ មកពីប្រទេសកូរ៉េ និងលោកលី ឆេង សាកលវិទ្យាធិការ សាកលវិទ្យាល័យ ប៊ែលធី អន្តរជាតិ ដែលបានសហការរៀបចំកម្មវិធីដ៏មានសារៈសំខាន់នេះឡើង។ក្នុងឱកាសនោះដែរលោក ស៊ាន បូរ៉ាត បានមានប្រសាសន៍ថា ការពង្រឹងគុណភាពអប់រំ គឺជាគ្រឹះដ៏រឹងមាំ សម្រាប់ឲ្យយុវជន របស់យើងមានចំណេះដឹងពិតប្រាកដ មានសីលធម៌ល្អ មានគុណធម៌ និងគតិបណ្ឌិត អាចចេះពិចារណា រកហេតុនឹងផលឲ្យឃើញ នេះជាចំណុចដ៏សំខាន់ណាស់។
ហើយខ្ញុំគិតថាវាគ្មិនដល់សំខាន់ៗ ជាតិ-អន្ដរជាតិ នឹងមកបង្ហាញអំពីរបៀបនៃប្រធានបទ ហើយពិតជាបានផ្ដល់ឱកាសដល់ពិតប្រាកដ សម្រាប់ប្អួនៗ និងក្មួយៗ ក្លាយទៅជាជន ដែលមានចំណេះដឹងតាមរយៈការសិក្សានេះ ពីវាគ្មិនជាតិ-អន្ដរជាតិ របស់យើង។ លោក ស៊ាន បូរ៉ាត បានបន្តថា ប្រសិនបើយុវជនខ្វះសីលធម៌ ដើរខុសទិស ហើយទៅរកគោលដៅដែលគេអត់ចង់បាន សង្គមមិនទទួលស្គាល់ នេះហើយជាបរិបទរបស់សង្គម ដែលយើងកំពុងធ្វើកិច្ចការងារនេះ ដើម្បីអប់រំយុវជន។ យុវជនគឺជាក្រដាសដ៏សស្អាត ប្រសិនបើយើងអូសទាញគេទៅរកផ្លូវល្អ ពួកគេនឹងក្លាយទៅជាជន ដែលមានភាពប្រសព្វ មានភាពទៅឆ្លាត ហើយអាចបណ្ដុះចិត្តគិនិត តាមរយៈការផ្ដល់នូវចំណេះដឹងដល់ពួកគេគ្រប់ៗគ្នា។ លោកបានបន្តថា ដើម្បីឲ្យប្អូនៗក្មួយៗ ក្លាយទៅជាជន ដែលមានសក្ដានុពល ក្នុងការចូលរួមចំណែក ជាមួយរាជរដ្ឋាភិបាល ដើម្បីបន្ដវេនក្នុងការដឹកនាំប្រទេសជាតិទៅថ្ងៃអនាគត គោលការណ៍ដល់សំខាន់របស់រាជរដ្ឋាភិបាល ក្នុងការកសាងធនធានមនុស្ស ចាប់ពីមត្តេយ្យសិក្សា រហូតដល់ឧត្តមសិក្សា៕
ចែករំលែកព័តមាននេះ