រាជធានីភ្នំពេញ ៖ ឯកឧត្តមអនុប្រធានរដ្ឋសភានៃសហព័ន្ធរុស្ស៊ីសន្យាថា នឹងជំរុញឱ្យមានជើងហោះហើរត្រង់រវាងកម្ពុជា-រុស្ស៊ី ។ នេះបើយោងតាមផេកទូរទស្សន៍ជាតិកម្ពជា បានប្រកាស នាថ្ងៃទី១៧ ខែកញ្ញា ឆ្នាំ២០២៥…
រាជធានីភ្នំពេញ ៖ ឯកឧត្តមអនុប្រធានរដ្ឋសភានៃសហព័ន្ធរុស្ស៊ីសន្យាថា នឹងជំរុញឱ្យមានជើងហោះហើរត្រង់រវាងកម្ពុជា-រុស្ស៊ី ។ នេះបើយោងតាមផេកទូរទស្សន៍ជាតិកម្ពជា បានប្រកាស នាថ្ងៃទី១៧ ខែកញ្ញា ឆ្នាំ២០២៥ ។
ឆ្លៀតក្នុងឱកាសចូលរួមមហាសន្និបាតអន្តរសភាអាស៊ាន លើកទី៤៦ នៅទីក្រុងគូឡាឡាំពួ ប្រទេសម៉ាឡេស៊ី សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានជួបពិភាក្សាការងារជាមួយ ឯកឧត្ដម KARA-OOL Shalban អនុប្រធានរដ្ឋសភានៃសហព័ន្ធរុស្ស៊ី (ឌូម៉ា)ដើម្បីពង្រឹងពង្រីកទំនាក់ទំនង រដ្ឋសភាប្រទេសទាំងពីរ ឱ្យកាន់តែរឹងមាំ ជិតស្និទ្ធ និងស៊ីជម្រៅបន្ថែមទៀត ។
នៅក្នុងឱកាសនោះ សម្តេចប្រធានរដ្ឋសភា បានថ្លែងអំណរគុណរុស្ស៊ី ដែលតាំងពីអតីតសហភាពសូវៀត បានចូលរួមគាំទ្រដល់ការស្តារ និងអភិវឌ្ឍន៍សង្គមកម្ពុជាឡើងវិញ ក្រោយពីថ្ងៃទី៧ មករា ឆ្នាំ១៩៧៩ រហូតមកដល់ពេលនេះ ។ ឆ្នាំ២០២៥នេះ ជាខួបគម្រប់៦៩ឆ្នាំ នៃការបង្កើតទំនាក់ទំនងការទូតរវាងប្រទេសទាំងពីរ ហើយឆ្នាំ២០២៦ នឹងឈានដល់គម្រប់ខួបទី៧០ឆ្នាំ ។ ដូចនេះ ប្រទេសទាំងពីរ គួររៀបចំបង្កើតព្រឹត្តិការណ៍រួមគ្នាអ្វីមួយ ដើម្បីអបអរសាទរនូវសមិទ្ធផលគួរជាទីមោទនៈជាច្រើន ដែលកើតចេញពីចំណង មិត្តភាព ទំនាក់ទំនងដ៏ល្អ យូរអង្វែង និងភាពជាដៃគូនៃប្រទេសទាំងពីរ ។
ឯកឧត្ដម KARA-OOL Shalban បានគាំទ្រប្រសាសន៍លើកឡើងរបស់សម្តេចប្រធានរដ្ឋសភា និងបានវាយតម្លៃខ្ពស់ចំពោះទំនាក់ទំនងដ៏ល្អរវាងប្រទេសទាំងពីរ ដោយបានគូសបញ្ជាក់ថា ក្នុងឱកាសខួប៧០ឆ្នាំ នៃចំណងមិត្តភាពនេះ ប្រទេសទាំងពីរត្រូវតែពង្រឹងពង្រីកទំនាក់ទំនងគ្នាឱ្យកាន់តែជិតស្និទ្ធថែមទៀត ឯកឧត្តមបានសន្យាថា នឹងខិតខំជំរុញឱ្យមានការជើងហោះហើរត្រង់រវាងកម្ពុជា និងរុស្ស៊ី ដើម្បីងាយស្រួលដល់ការភ្ជាប់ទំនាក់ទំនងប្រជាជន និងប្រជាជន និងបានអបអរសាទរចំពោះការគាំទ្រគ្នាទៅវិញទៅមករវាងសភាប្រទេសទាំងពីរ នៅលើវេទិកាអន្តរជាតិនានា ហើយកម្ពុជា និងរុស្ស៊ី ក៏បានសិក្សាបទពិសោធន៍ពីគ្នាទៅវិញទៅមកជាច្រើនវិស័យដែរ នៅក្នុងនោះមានការបោះឆ្នោតជាដើម ។
ជាចុងបញ្ចប់ សម្តេចបានស្នើដល់រុស្ស៊ីជួយជំរុញការវិនិយោគ ពាណិជ្ជកម្ម និងទេសចរណ៍ប្រទេសទាំងពីរឱ្យមានកំណើនបន្តទៀត ។ នៅក្នុងនោះ សម្តេចក៏បានស្នើដល់រុស្ស៊ី បន្តផ្តល់អាហារូបករណ៍ដល់និស្សិតកម្ពុជា ទៅសិក្សានៅសហព័ន្ធរុស្ស៊ីឱ្យបានកាន់តែច្រើនបន្ថែមទៀត ដើម្បីរួមចំណែកអភិវឌ្ឍមូលធនមនុស្សរបស់កម្ពុជា ស្របតាមយុទ្ធសាស្ត្របញ្ចកោណដំណាក់កាលទី១ ដែលផ្តោតលើមនុស្ស ជាកត្តាអាទិភាពខ្ពស់បំផុត ។
ថ្នាក់ដឹកនាំសភាប្រទេសទាំងពីរបានសន្យាថា បន្តរក្សាការផ្លាស់ប្តូរទស្សនកិច្ច គាំទ្រគ្នាទៅវិញទៅមក និងការពិគ្រោះយោបល់កម្រិតខ្ពស់ ។ ការពង្រឹងចំណងមិត្តភាពទាំងនេះ នឹងជួយជំរុញការយល់ដឹងគ្នាទៅវិញទៅមកកសាងទំនុកចិត្ត ដែលជាមូលដ្ឋានគ្រឹះសម្រាប់កិច្ចសហប្រតិបត្តិការផ្នែកនីតិប្បញ្ញត្តិកាន់តែរឹងមាំ និងស៊ីជម្រៅ ៕
ចែករំលែកព័តមាននេះ