ខេត្តក្រចេះ ៖ ក្មេងស្រីអាយុ៤ឆ្នាំម្នាក់បានឆេះរោលខ្លោចខ្លួនស្លាប់នៅលើផ្ទះ ខណៈកំពុងដេកមើលទូរទស្សន៍ជាមួយឪពុកម្តាយ ហើយត្រូវរន្ទះបាញ់ កាលពីយប់ថ្ងៃទី២០ មីនា ។ ក្រៅពីកូនស្រីដែលស្លាប់ភ្លាមនៅក្នុងគ្រោះធម្មជាតិរន្ទះបាញ់ ខណៈមានភ្លៀងកក់ខែដើមឆ្នាំនេះ ស្ត្រីជាម្តាយក៏រងគ្រោះចំជើងដែរ តែមិនធ្ងន់ពេកទេ ។
មន្ត្រីនគរបាលស្រុកចិត្របុរីនិយាយថា គ្រួសារដែលរងគ្រោះដោយរន្ទះបាញ់នេះ ជាកសិកររស់នៅក្នុង
ភូមិស្រែមាស ឃុំថ្មី ស្រុកចិត្របុរី ដែលជាតំបន់ដាច់ស្រយាលមួយ។ ស្ត្រីរងគ្រោះជាម្តាយឈ្មោះ ជឿន សៃ
អាយុ២៩ឆ្នាំឱ្យដឹងថា នៅយប់ថ្ងៃកើតហេតុនោះ ខណៈមេឃកំពុងភ្លៀងខ្លាំង និងមានផ្គរន្ទះផង គាត់កំពុងដេកមើលទូរទស្សន៍ជុំគ្នានៅលើផ្ទះ ។ ខណៈនោះស្រាប់តែមានរន្ទះបាញ់មកចំផ្ទះរបស់គាត់លាន់កក្រើកដី បណ្តាលឲ្យកូនស្រីពៅរបស់គាត់ស្លាប់ ក្នុងចំណោមកូនប្រុសស្រី៣នាក់ ។
មន្ត្រីអាជ្ញាធរខេត្តបានចាត់ទុកថា ករណីរន្ទះបាញ់ បណ្តាលឲ្យមានមនុស្សស្លាប់នេះ គឺជាគ្រោះធម្មជាតិមួយនៅដើមឆ្នាំ២០១៨នេះ ។
ចែករំលែកព័តមាននេះ