ខេត្តកំពត ៖ មានករណីគ្រោះថ្នាក់ចរាចរណ៍ដ៏កម្រមួយបានកើតឡើងក្នុងភូមិតែមួយ យប់តែមួយ បណ្តាលឲ្យមានមនុស្សស្លាប់២នាក់យ៉ាងអាណោចអាធ័ម។ ហេតុការណ៍នោះ ត្រូវបានសមត្ថកិច្ចឲ្យដឹងថា ករណីទី១- នៅវេលាម៉ោ១១ និង២៤នាទីយប់ ថ្ងៃទី១៩ ខែមីនា ឆ្នាំ២០១៨ មានហេតុការណ៍គ្រោះថ្នាក់ចរាចរណ៍មួយកើតឡើង នៅលើផ្លូវលំចូលវត្តពោធិវង្ស ស្ថិតក្នុងភូមិត្រពាំងព្រីង ឃុំត្រពាំងព្រីង ស្រុកទឹកឈូ បង្កឡើងដោយបុរសម្នាក់ស្រវឹងស្រា បើកម៉ូតូម៉ាកវ៉េវបុកនឹងបង្កាន់ដៃស្ពានប្រឡាយចិន បណ្តាលឲ្យធ្លាក់ក្នុងទឹកប្រឡាយស្លាប់ភ្លាមៗនៅកន្លែងកើតហេតុ។
សមត្ថកិច្ចបន្តទៀតថា ជនរងគ្រោះឈ្មោះ ណាំង វ៉ន ភេទប្រុស អាយុ៣២ឆ្នាំ មានទីលំនៅភូមិបុសញិញ ឃុំកូនសត្វ ស្រុកទឹកឈូ។ ករណីទី២-ស្ត្រីចំណាស់ម្នាក់មានជំងឺសរសៃប្រសាទ បានទៅដេកលើផ្លូវរថភ្លើង ហើយត្រូវរថភ្លើងកិនដាច់ ជាពីរកំណាត់ស្លាប់យ៉ាងអាណោចអាធ័មបំផុត កាលពីវេលាម៉ោង១រំលងអាធ្រាត្រ ឈានចូលថ្ងៃទី២០ ខែមីនា ឆ្នាំ២០១៨ នៅលើផ្លូវរថភ្លើងស្ថិតក្នុងភូមិត្រពាំងព្រីង ឃុំត្រពាំងព្រីង ស្រុកទឹកឈូ។ សមត្ថកិច្ចបានឲ្យដឹងថា ស្ត្រីរងគ្រោះមានឈ្មោះ ឈិត ផេង ភេទស្រី អាយុ៧៨ឆ្នាំ មានទីលំនៅភូមិភូមិត្រពាំងព្រីងខាងត្បូង ឃុំត្រពាំងព្រីង ស្រុកទឹកឈូ។
ប្រភពព័ត៌មានបានឲ្យដឹងថា ស្ត្រីរងគ្រោះបានចេញពីផ្ទះពេលល្ងាច ហើយកូនៗបានបាត់មិនឃើញមកផ្ទះ ក៏នាំគ្នាដើររកដែរ តែរកមិនឃើញ លុះព្រឹកឡើងទើបមានអ្នកដំណើរក្នុងភូមិឃើញសាកសពស្ត្រីចំណាស់រូបនេះ ត្រូវរថភ្លើងកិនដាច់ជាពីរកំណាត់ស្លាប់យ៉ាងអាណោចអាធ័មតាំងម៉ោង១រំលងអាធ្រាត្រ ដែលមានរថភ្លើងមួយខ្សែ ចេញពីភ្នំពេញឆ្ពោះទៅកាន់ខេត្តព្រះស៊ីហនុ។ ក្រោយពីពិនិត្យសាកសពទាំងពីរករណីក្នុងយប់តែមួយ ក្នុងឃុំតែមួយរួចមក សមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅតាមផ្ទះរៀងៗខ្លួន៕
ចែករំលែកព័តមាននេះ