ខេត្តសៀមរាប ៖ លោកជំទាវ គួយ ណាលីន ឃឹមប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងសហការីបានអញ្ជើញចុះជួបសំណេះសំណាល និង ប្រគល់ផ្ទះមនុស្សធម៌ទី៤៨…
ខេត្តសៀមរាប ៖ លោកជំទាវ គួយ ណាលីន ឃឹមប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងសហការីបានអញ្ជើញចុះជួបសំណេះសំណាល និង ប្រគល់ផ្ទះមនុស្សធម៌ទី៤៨ និងផ្ទះមនុស្សធម៌ទី៤៩ ដែលផ្ដួចផ្ដើមដោយលោកបណ្ឌិត ឃឹម ប៊ុនសុង ប្រធានគណៈកម្មាធិការសាខាកាកបាទក្រហមកម្ពុជាខេត្តជូនដល់គ្រួសារចាស់ជរាទីទ័លក្រគ្មានទីពឹង និងគ្រួសារស្ត្រីមេម៉ាយទីទ័លក្រ នៅឃុំដូនពេង និងឃុំចារឈូក ស្រុកអង្គរជុំ ខេត្តសៀមរាបនាថ្ងៃទី១៩ ខែមីនា ឆ្នាំ២០១៨ ។
ផ្ទះទាំង២ខ្នងនេះមានទំហំ៥ម៉ែត្រគុណ៦ម៉ែត្រ ធ្វើពីឈើប្រក់ស័ង្កសី ភ្លីធំ ក្រាលក្ដារជញ្ជាំងក្ដារ តម្កល់លើជើងតាង កម្ពស់១,៨០ម៉ែត្រ ។
ផ្ទះមនុស្សធម៌ទី៤៨ ត្រូវបានប្រគល់ជូនគ្រួសារអ៊ុំប្រុស ឆាយ ឈឿន អាយុ៦០ឆ្នាំ (អតីតយោធាស្រុកវ៉ារិន) និងភរិយាឈ្មោះ ហម នំ អាយុ៦២ឆ្នាំ មានជំងឺប្រចាំកាយរស់នៅភូមិបត់ ឃុំដូនពេង ស្រុកអង្គរជុំ ខេត្តសៀមរាប ។ បច្ចុប្បន្នដើរស៊ីឈ្នួលគេ និងបោយល្ពាក់ធ្វើឈ្នាងលក់ គ្រាន់បានកម្រៃ ទ្រទ្រង់ជីវភាពប្រចាំថ្ងៃ ។
ផ្ទះមនុស្សធម៌ទី៤៩ ត្រូវបានប្រគល់ជូនគ្រួសារប្អូនស្រី ធឿន រ៉ាម អាយុ៤៧ឆ្នាំ ជាស្ត្រីមេម៉ាយទីទ័លក្រ និងមានកូនស្រីមា្នក់អាយុ២០ឆ្នាំ រស់នៅភូមិដូនស្វា ឃុំចារឈូក ស្រុកអង្គរជុំ ខេត្តសៀមរាប ។ បច្ចុប្បន្នដើរលក់នំបញ្ចុក គ្រាន់បានកម្រៃទ្រទ្រង់ជីវភាពប្រចាំថ្ងៃ ។
ក្នុងឱកាសនោះលោកជំទាវ គួយ ណាលីន ឃឹមប៊ុនសុង មានប្រសាសន៍ពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលតែងតែព្រួយបារម្ភ និងយកចិត្តទុកដាក់ចំពោះប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាឡើយ ។
លោកជំទាវក៏បានបញ្ជាក់ថា ដោយមើលឃើញពីទុក្ខលំបាករបស់ក្រុមគ្រួសារអ៊ុំប្រុស អ៊ុំស្រី និងប្អូនស្រីទាំងពីរគ្រួសារនេះហើយ ទើបសាខាកាកបាទក្រហមកម្ពុជាខេត្តសៀមរាប សម្រេចសាងសង់ផ្ទះជូនគ្រួសារជូន ។ ម្យ៉ាងទៀតក៏ជាការបង្ហាញនូវការយកចិត្តទុកដាក់ ចំពោះប្រជាពលរដ្ឋគ្រប់រូបរបស់ប្រមុខរាជរដ្ឋាភិបាល ពីសំណាក់ថ្នាក់ដឹកនាំ សំខាន់កាកបាទក្រហមកម្ពុជា ដូចដែលប្រធានបទបានលើកឡើងថា កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នា គឺមិនទុកនរណាម្នាក់ចោលឡើយ ហើយទីណាមានទុក្ខលំបាកទីនោះមានកាកបាទក្រហមកម្ពុជា ។
លោកជំទាវក៏បានធ្វើការសំណូមពរដល់គ្រួសារទាំងពីរ ឲ្យត្រូវចេះថែរក្សាលំនៅដ្ឋានថ្មី និងសុខភាពរបស់ខ្លួន ព្រមទាំងធ្វើការដាំដុះដំណាំរួមផ្សំក្នុងការទ្រទ្រង់ជីវភាពក្នុងក្រុមគ្រួសារផងដែរ ។
លោកជំទាវ គួយណាលីន ឃឹម ប៊ុនសុង ក៏បានធ្វើការក្រើនរំលឹកផងដែរថា ក្នុងរដូវក្តៅនេះ ត្រូវមានការថែរក្សានូវសុខភាព សំខាន់ចំពោះបញ្ហាភ្លើងផ្សែង ដោយពេលនេះជារដូវប្រាំង ដែលធ្វើឲ្យមានការហួតហែង និងងាយរងនូវគ្រោះមហន្តរាយផ្សេងៗកើតឡើង ។ លោកជំទាវក៏បានសង្កត់ធ្ងន់ចំពោះ បញ្ហាសុខភាពមាតា ទារក និង ស្ត្រីមានផ្ទៃពោះ ក៏ដូចប្រជាពលរដ្ឋទូទៅ ត្រូវបងប្អូនមានការប្រុងប្រយ័ត្ន ។ លោកជំទាវក៏បានធ្វើការអរព្រះគុណ ចំពោះព្រះតេជគុណ ព្រះអនុគណស្រុកអង្គរជុំ ដែលតែងតែ និមន្តចូលរួមនូវរាល់ព្រះសកម្មភាពមនុស្សធម៌ នៅក្នុងស្រុកអង្គរជុំ ដោយបានប្រទាននូវទេយ្យទានមួយចំនួនដល់បងប្អូនប្រជាពលរដ្ឋទីទ័លក្រ ។
សូមបញ្ជាក់ផងដែរថា អំណោយមនុស្សធម៌បន្ថែមក្នុង១គ្រួសារមាន ៖ -មុង១ -ភួយ១ -សារុង១ -ក្រមា១ -កន្ទេល១ -អង្ករ៥០គីឡូ ក្រាម -មី១កេស -ត្រីខ១យួរ ទឹកត្រី១យួរ សម្ភារៈផ្ទះបាយមួយចំនួន និងថវិកា២០ម៉ឺនរៀល ។ សម្រាប់លោកតា លោកយាយ ដែលអញ្ជើញចូលរួមម្នាក់ៗទទួលបានថវិកា១ម៉ឺនរៀលផងដែរ ៕
ចែករំលែកព័តមាននេះ