ប្រទេសតួកគី-ប្រទេសស៊ីរី ៖ ទង់ជាតិតួកគីកាលពីថ្ងៃទី១៨ មីនា ត្រូវដោតនៅទីក្រុងស៊ីរី AFRINE ក្រោយការវាយលុករយៈពេលជិត២ខែរបស់កងទ័ពតួកគី និងពួកឧទ្ទាមស៊ីរីជាសម្ព័ន្ធមិត្តដែលនោះជាការសម្រេចបំណងរបស់ប្រធានាធិបតីតួកគី លោករីស៊ីប តៃយីបអ័រដូហ្គាន…
ប្រទេសតួកគី-ប្រទេសស៊ីរី ៖ ទង់ជាតិតួកគីកាលពីថ្ងៃទី១៨ មីនា ត្រូវដោតនៅទីក្រុងស៊ីរី AFRINE ក្រោយការវាយលុករយៈពេលជិត២ខែរបស់កងទ័ពតួកគី និងពួកឧទ្ទាមស៊ីរីជាសម្ព័ន្ធមិត្តដែលនោះជាការសម្រេចបំណងរបស់ប្រធានាធិបតីតួកគី លោករីស៊ីប តៃយីបអ័រដូហ្គាន ក្នុងការកម្ចាត់ពួកជីវពលឃើតចេញពីតំបន់ព្រំដែននេះ ។ ក្រុងអង់ការ៉ាចាត់ទុកពួកជីវពលឃើតនេះថាជាពួកភេរវករ ។
ពួកឃើតស៊ីរី បានបញ្ចេញប្រតិកម្មដោយសន្យាធ្វើការប្រយុទ្ធដើម្បីរំដោះតំបន់ AFRINE ទាំងមូលមកវិញ ។ តំបន់ទីក្រុងឃើតនេះចាប់តាំងពីថ្ងៃទី២០ មករា មក ជាគោលដៅនៃការវាយលុករបស់តួកគី ក្នុងគោលបំណងកម្ចាត់កងឯកភាពការពារប្រជាជន YPG ចេញពីទីនោះ ។ ក្រុមជីវពលឃើតនេះត្រូវបានក្រុងអង់ការ៉ា ចាត់ទុកជាការគំរាមកំហែងមួយដល់ព្រំដែនរបស់ខ្លួន ខណៈក្រុមនេះជាសម្ព័ន្ធមិត្តរបស់អាមេរិកក្នុងការតស៊ូប្រឆាំងពួកជីហាដក្រុមរដ្ឋអ៊ិស្លាម ។
រយៈពេលប៉ុន្មានថ្ងៃចុងក្រោយនេះ ការវាយរុលទៅមុខយ៉ាងលឿនឆ្ពោះទៅកណ្តាលក្រុង AFRINE របស់កងទ័ពតួកគី និងពួកឧទ្ទាមស៊ីរីជាសម្ព័ន្ធមិត្តនាំឱ្យមានការត់ភៀសខ្លួនរបស់ជនស៊ីវិលច្រើនពាន់នាក់ ដែលការរត់ភៀសច្រើនបែបនេះ ក៏កំពុងកើតមានដែរលើរណសិរ្សមួយទៀតនៃជម្លោះនៅស៊ីរី គឺនៅតំបន់ GHOUTA ខាងកើតក្បែរក្រុងដាម៉ាស់ ដែលទីនោះកងទ័ពស៊ីរីវាយដណ្តើមយកបានជាង៨០%រួចហើយ ។
កាលពីថ្ងៃទី១៨ មីនា ប៉ុន្មានម៉ោងក្រោយលុកចូលដល់ក្នុងទីក្រុង AFRINE កងទ័ពតួកគីបានដាក់ពង្រាយក្នុងគ្រប់សង្កាត់នៃទីក្រុងនេះ ដោយបាញ់ទៅលើអាកាសជាការអបអរសាទរ និងដោយដើរហែក្បួន ។ កងទាហានតួកគីបានលើកទង់ជាតិតួកគីលើអគារសាធារណៈ ។
ក្រោយត្រូវវាយកម្ចាត់ពីតំបន់ក្រុង AFRINE រដ្ឋបាលមូលដ្ឋានឃើតនៃតំបន់ក្រុងនេះ បានសន្យាថា ការតស៊ូនៅ AFRINE នឹងបន្តទៀត រហូតដល់រំដោះយកវិញបាន ។
អង្គការសិទ្ធិមនុស្សស៊ីរី OSDH មានប្រភពព័ត៌មានច្រើនក្នុងប្រទេសគូសបញ្ជាក់ថា យុទ្ធជនឃើតជាង១.៥០០នាក់ បានត្រូវស្លាប់ ហើយពួកឧទ្ទាមស៊ីរីជាសម្ព័ន្ធមិត្តតួកគី៤០០នាក់ក៏ត្រូវស្លាប់ដែរតាំងពីចាប់ផ្តើមការវាយលុកមក ។ ចំណែកកងទ័ពតួកគីរៀបរាប់ពីទាហានរបស់ខ្លួនស្លាប់៤៦នាក់ ។
តួកគីបានបដិសេធថា ពុំវាយប្រហារសំដៅប្រជាជនឡើយ ក៏ប៉ុន្តែ OSDH វាយតម្លៃថា ជនស៊ីវិលជាង២៨០នាក់ស្លាប់ តាំងពីចាប់វាយលុកមក ។ ម្យ៉ាងទៀតប្រឈមមុខនឹងការវាយរុលទៅមុខរបស់កងទ័ពតួកគីមនុស្សជិត២៥០.០០០នាក់បានរត់ភៀសខ្លួនចេញពីទីក្រុង AFRINE ពីថ្ងៃទី១៤ មីនា មកសំដៅទៅកាន់បណ្តាតំបន់កាន់កាប់ដោយពួកឃើត ឬបណ្តាតំបន់កាន់កាប់របស់របបស៊ីរី ។ ក្នុងទីក្រុង AFRINE នៅសល់ប្រជាជនតែប៉ុន្មានពាន់នាក់ប៉ុណ្ណោះ ។ នាថ្ងៃទី១៨ មីនា យុទ្ធជនស៊ីរីស្និទ្ធតួកគី១៣នាក់ បានត្រូវស្លាប់ ដោយសារការផ្ទុះគ្រាប់មីនពេលធ្វើប្រតិបត្តិការបោសសម្អាតនៅក្រុង AFRINE ៕
ចែករំលែកព័តមាននេះ