ទីក្រុងប៉ារីស៖ ប្រធានាធិបតីចិន លោកស៊ីជីនពីង បានធ្វើដំណើរទៅដល់ទីក្រុងប៉ារីស ប្រទេសបារាំងហើយ ហើយជាផ្នែក១នៃទស្សនកិច្ចជាផ្លូវការបីថ្ងៃនៅទ្វីបអឺរ៉ុប។ ទស្សនកិច្ចនេះធ្វើឡើងស្របពេលដែលទ្វីបអឺរ៉ុបមិនទាន់មូលមតិគ្នាថាត្រូវចាត់ការបែបណានៅចំពោះមុខនៃការពង្រីកឥទ្ធិពលរបស់ប្រទេសចិននៅលើឆាកអន្តរជាតិ និងនៅចំពោះមុខនៃការប្រកួតយកស្លាប់រស់កាន់តែខ្លាំងរវាងចិន និងអាមេរិក។ សង្គ្រាមត្រជាក់ចិន-អាមេរិកកុំសង្ឃឹមថាចប់។ វាទើបតែចាប់ផ្ដើមប៉ុណ្ណោះ។
ក្រុមហ៊ុនផលិតរថយន្តនៅអឺរ៉ុបចាប់ផ្ដើមបាត់បង់ទីផ្សារយ៉ាងសន្ធឹកនៅចំពោះមុខនៃការបញ្ចេញលក់រថយន្តអគ្គិសនីរបស់ប្រទេសចិនយ៉ាងគគ្រឹកគគ្រេង។ ឡានចិនកំពុងវាយលុកទីផ្សារពិភពលោកយ៉ាងខ្លាំង គ្មាននរណាអាចទប់ជាប់ទេ។ ងាកទៅវិស័យនយោបាយ ក្រុមអ្នកការទូតកំពុងខ្វាយខ្វល់នឹងករណីសង្ស័យថាប្រទេសចិនបញ្ជូនភ្នាក់ងារចារកម្មរបស់ខ្លួនបង្កប់នៅទ្វីបអឺរ៉ុប។ ជាក់ស្ដែង ទើបតែកន្លងផុតទៅ១សប្ដាហ៍មុននេះ អាល្លឺម៉ង់ និងអង់គ្លេសចាប់ឃុំខ្លួនជនសង្ស័យបាន១ចំនួន។
បញ្ហានៅលើពិភពលោកកាន់តែស្មុគស្មាញ និងចាក់ស្រេះគ្នាយ៉ាងខ្លាំង។ ប្រទេសចិនបន្តផ្ដល់គ្រឿងបរិក្ខារ និងគ្រឿងអេឡិចត្រូនិចទៅឱ្យរុស្ស៊ីសម្រាប់ផ្សំផលិតអាវុធ។ នេះបើយោងតាមរបាយករណ៍របស់ទីភ្នាក់ការអាមេរិក។ ទិដ្ឋភាពនេះធ្វើឱ្យចុះខ្សោយដល់កិច្ចខិតខំប្រឹងប្រែងរបស់បស្ចិមប្រទេស ជាពិសេសអឺរ៉ុបដែលចង់ឃើញរុស្ស៊ីចាញ់សង្គ្រាមឱ្យបានឆាប់។ ម៉្យាងទៀត អឺរ៉ុបបារម្ភថាបើពួកគេមិនអាចបញ្ឈប់សកម្មភាពរបស់រុស្ស៊ីត្រឹមអ៊ុយក្រែនទេ រុស្ស៊ីនឹងជម្រុលដំណើរទៅមុខទៀត។
ទោះជាមានបញ្ហាចម្រូងចម្រាសយ៉ាងណាក្ដី ប៉ុន្តែផលប្រយោជន៍សេដ្ឋកិច្ចរវាងចិន និងអឺរ៉ុបនៅតែសំខាន់ និងមានទំហំធំដែលគេមិនអាចទាត់គ្នាចោលបានឡើយ។ គេប៉ាន់ស្មានថាទំហំពាណិជ្ជកម្មទ្វេភាគីរវាងចិន និងអឺរ៉ុបមាន២,៣ពាន់លានដុល្លារក្នុងមួយថ្ងៃៗ។ លោកស៊ីជីនពីងទំនងជាបានតាំងចិត្តយ៉ាងមុតមាំថាលោកត្រូវតែខិតខំកសាងទំនាក់ទំនងឡើងវិញ និងពង្រឹងទំនាក់ទំនងនេះឱ្យបានខ្លាំងក្លាជាមួយថ្នាក់ដឹកនាំអឺរ៉ុបបន្ទាប់ពីខានជួបគ្នាជាច្រើនឆ្នាំដោយសារបញ្ហាកូវីដ១៩។
លោកស៊ីជីនពីងដាក់ជើងជាន់ដីទ្វីបអឺរ៉ុបលើកនេះមុនគេគឺប្រទេសបារាំង។ ប្រធានាធិបតីបារំាង លោកម៉ាក្រុង ចង់ឃើញសហភាពអឺរ៉ុបមានភាពឯករាជ្យ-ម្ចាស់ការលើវិស័យសេដ្ឋកិច្ច និងការពារជាតិ។ លោកមិនចង់ពឹងផ្អែកទៅលើប្រទេសមហាអំណាចដទៃជាអ្នកការពារទេ។ តាំងពីយូរមកហើយ លោកម៉ាក្រុងចង់បង្កើតកងទ័ពអឺរ៉ុបដែលឯករាជ្យពីអង្គការណាតូ។
បន្ទាប់ពីចាកចេញពីប្រទេសបារាំង លោកស៊ីជីនពីងនឹងបន្តដំណើរទៅប្រទេសស៊ែប៊ី និងហុងគ្រីទៀត។ ប្រទេសទាំង២នេះត្រូវគេមើលឃើញថាជាសមាជិកសហភាពអឺរ៉ុបដែលមានទំនាក់ទំនងល្អជាមួយប្រទេសចិន និងក៏មានទំនាក់ទំនងល្អជាមួយលោកពូទីនផងដែរ។ ប្រទេសទាំងពីរទទួលបានការវិនិយោគពីប្រទេសចិនច្រើនគួរសមដែរកាលពីពេលកន្លងមក។
ទីក្រុងវ៉ាស៊ីនតោនតាមដានទស្សនកិច្ចរបស់លោកស៊ីជីនពីងដោយយកចិត្តទុកដាក់ព្រោះអាមេរិកបារម្ភថាសហភាពអឺរ៉ុបអាចនឹងផ្លាស់ប្ដូរនយោបាយការបរទេសសំខាន់ៗរបស់ខ្លួន។ ជាមួយគ្នានេះ អឺរ៉ុបនៅមិនទាន់ច្បាស់ថាតើអាមេរិកនឹងបន្តឧបត្ថម្ភ-គាំទ្រខ្លួនកម្រិតណាទេ។ នាយករដ្ឋមន្ត្រីបារាំងបានទៅទទួលស្វាគមន៍លោកស៊ីជីនពីងដល់ព្រលានយន្តហោះ។
បន្ទាប់មកនៅថ្ងៃចន្ទសប្ដាហ៍នេះ លោកម៉ាក្រុងនឹងទទួលស្វាគមន៍លោកស៊ីជីនពីងជាផ្លូវការ។ លោកទាំង២នឹងជួបពិភាក្សាការងារជាមួយប្រធានគណៈកម្មការអឺរ៉ុប លោកស្រីឡីយេន (Leyen)។ គេរំពឹងថានៅក្នុងកិច្ចជំនួបត្រីភាគីនោះ លោកស្រី និងលោកម៉ាក្រុងនឹងទី១-ជំរុញឱ្យប្រទេសចិនប្រកាន់គោលការណ៍រកស៊ីដោយស្មើភាព និងយុត្តិធម៌ និងទី២-ស្នើសុំឱ្យចិនប្រើប្រាស់ឥទ្ធិពលរបស់ខ្លួននិយាយជាមួយរុស្ស៊ីដើម្បីបិទបញ្ចប់សង្គ្រាមអ៊ុយក្រែនកាន់តែឆាប់តាមដែលអាចធ្វើទៅបាន។
សូមរំលឹកថាកាលពីរដូវស្លឹកឈើជ្រុះឆ្នាំ២០២៣ សហភាពអឺរ៉ុបចាប់ផ្ដើមបើកការស៊ើបអង្កេតក្រុមហ៊ុនរបស់ចិន ហើយអាចនឹងចាប់ផ្ដើមដំឡើងពន្ធគយលើរថយន្តអគ្គិសនីចិនដែលនាំចូលសហភាពអឺរ៉ុប។ នៅក្នុងបញ្ហាអ៊ុយក្រែន ប្រទេសចិនតែងតែប្រកាសថាខ្លួនប្រកាន់គោលជំហរអព្យាក្រឹត្យ-ឥតលម្អៀង ហើយចិនពុំដែលប្រកាសថ្កោលទោសរុស្ស៊ីពីបទឈ្លានពានអ៊ុយក្រែនម្ដងណាទេ។ ប្រទេសចិនចាត់ទុកសង្គ្រាមអ៊ុយក្រែនជាវិបត្តិ មិនមែនជាសង្គ្រាមឈ្លានពានទេ។ ក្រុមបស្ចិមប្រទេសទទួលស្គាល់ថាចិនមិនបានផ្ដល់អាវុធទៅឱ្យរុស្ស៊ីពិតមែន។ ប៉ុន្តែចិនជួយផ្ដល់គ្រឿងផ្សំសម្រាប់ពន្លឿនការផលិតអាវុធរបស់រុស្ស៊ី៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ