តើអ្នកកំពុងប្រឈមនឹងភាពតានតឹងនិងស្ត្រេសក្នុងជីវិតប្រចាំថ្ងៃមែនទេ? កុំបារម្ភ! ការប្រើប្រាស់ក្លិនក្រអូបពីធម្មជាតិអាចជាដំណោះស្រាយដ៏សាមញ្ញនិងមានប្រសិទ្ធភាពដើម្បីបន្ធូរអារម្មណ៍របស់អ្នក។ ការស្រូបក្លិនប្រេងក្រអូបពីធម្មជាតិមួយចំនួនអាចជះឥទ្ធិពលផ្ទាល់ទៅលើប្រព័ន្ធសរសៃប្រសាទ ជួយឱ្យចិត្តស្ងប់និងកាត់បន្ថយភាពតានតឹង។
ខាងក្រោមនេះជាប្រភេទក្លិនរុក្ខជាតិ ៤ ប្រភេទដែលអ្នកអាចសាកល្បង៖
១. ផ្កាឡាវេនឌើ
ក្លិនផ្កាឡាវេនឌើ គឺល្បីល្បាញបំផុតសម្រាប់ការបន្ធូរអារម្មណ៍។ គ្រាន់តែស្រូបក្លិនវាបន្តិចបន្តួច ក៏អាចជួយឱ្យអ្នកមានអារម្មណ៍ធូរស្រាល និងគេងលក់ស្រួលបានដែរ។ អ្នកអាចប្រើប្រេងផ្កាឡាវេនឌើដោយដាក់ក្នុងចង្កៀងអប់ក្លិន ឬលាបលើកដៃ មុនពេលចូលគេង។
២. ជីរអង្កាម
ក្លិនជីរអង្កាមមានលក្ខណៈស្រស់ស្រាយ និងត្រជាក់ ដែលអាចជួយជំរុញអារម្មណ៍និងបង្កើនការផ្ដោតអារម្មណ៍។ នៅពេលអ្នកមានអារម្មណ៍នឿយហត់ ឬតានតឹង ក្លិននេះអាចជួយឱ្យខួរក្បាលរបស់អ្នកភ្ញាក់ឡើងវិញ។ ការហិតក្លិនជីរអង្កាមអាចជួយកាត់បន្ថយការឈឺក្បាលដែលបណ្ដាលមកពីស្ត្រេសផងដែរ។
៣. ក្រូចឆ្មារ
ក្លិនក្រូចឆ្មារមានលក្ខណៈស្រស់ថ្លា និងជួយឱ្យអារម្មណ៍ល្អ។ វាមានប្រសិទ្ធភាពក្នុងការកាត់បន្ថយភាពភ័យខ្លាច និងធ្វើឱ្យអារម្មណ៍រីករាយឡើងវិញ។ អ្នកអាចប្រើប្រេងក្រូចឆ្មារ ឬគ្រាន់តែហិតក្លិនសំបកក្រូចឆ្មារស្រស់ក៏បាន។
៤. ផ្កាម្លិះ
ផ្កាម្លិះមិនត្រឹមតែមានក្លិនក្រអូបគួរឱ្យចង់ហិតប៉ុណ្ណោះទេ តែវាក៏អាចជួយឱ្យអ្នកមានអារម្មណ៍ស្ងប់និងបន្ធូរអារម្មណ៍តានតឹងផងដែរ។ ក្លិនផ្កាម្លិះត្រូវបានគេប្រើប្រាស់ជាយូរមកហើយដើម្បីជួយដោះស្រាយបញ្ហាដំណេក និងកាត់បន្ថយការថប់បារម្ភ។
ចំណាំ៖ ការហិតក្លិនទាំងនេះគ្រាន់តែជាជំនួយមួយផ្នែកប៉ុណ្ណោះ។ ដើម្បីទទួលបានសុខភាពផ្លូវចិត្តល្អ លោកអ្នកគួរតែអនុវត្តការហាត់ប្រាណ ការគេងឱ្យបានគ្រប់គ្រាន់ និងការញ៉ាំអាហារដែលមានតុល្យភាពផងដែរ៕
ចែករំលែកព័តមាននេះ