សូម​បងប្អូន​ប្រជាពលរដ្ឋ គោរព​ច្បាប់​ចរាចរណ៍​ទាំងអស់​គ្នា


ខេត្តកំពង់ឆ្នាំង ៖ អភិបាលរង​ខេត្តកំពង់ឆ្នាំង ឯកឧត្តម អៀង វុ​ធ បាន​អំពាវនាវ​ដល់​បងប្អូន​ប្រជាពលរដ្ឋ សូម​គោរព​ច្បាប់​ចរាចរណ៍​ទាំងអស់​គ្នា ដើម្បី​កាត់​បន្ថយ​អត្រា​គ្រោះថ្នាក់​ចរាចរណ៍​ឲ្យ​កាន់តែ នៅ​កម្រិត​ទាប ពិសេស​អ្នក​ជិះ​ម៉ូតូ ត្រូវ​ពាក់មួក​សុវត្ថិភាព​។ មាន​ប្រសាសន៍​បែប​នេះ នៅ​ក្នុង​យុទ្ធនាការ ផ្សព្វផ្សាយ​ច្បាប់​ចរាចរណ៍ និង​ចែក​មួក​សុ​ត្ថិ​ភាព នៅ​ព្រឹក​ថ្ងៃ​ទី​១៦ ខែមីនា ឆ្នាំ​២០១៨ នៅ​មុខ​សាលាស្រុក​ជល​គី​រី ដោយ​មាន​កម្លាំង​សមត្ថកិច្ច និង​មន្ត្រី​ជំនាញ​ជា​ច្រើន​រូប​ទៀត​។ ឯកឧត្តម អភិបាលរង ខេត្តកំពង់ឆ្នាំង បាន​បន្ត​ថា សូម​បងប្អូន​ប្រជាពលរដ្ឋ​ចាំ​ថា ពេល​ចេញដំណើរ​ដោយ​ជិះ​ម៉ូតូ ទោះ​ជិត​ឬ​ឆ្ងាយ​ត្រូវ​ពាក់មួក​សុវត្ថិភាព ព្រោះថា ពាក់មួក​សុវត្ថិភាព វា​នឹង​ជួយ​សម្រាល​ពី​ការ​រង របួសធ្ងន់​មក​ស្រាល បើ​យើង​ជួប​គ្រោះថ្នាក់​ចរាចរណ៍​ដោយ​ចៃដន្យ​ណាមួយ​។ ថ្ងៃនេះ​សមត្ថកិច្ច និង មន្ត្រី​ជំនាញ បាន​ចុះ​ផ្សព្វផ្សាយ​អប់រំ ដល់​បងប្អូន​ប្រជាពលរដ្ឋ ដោយ​ចាប់​ផាកពិន័យ ចំនួន​១​ម៉ឺន​៥​ពាន់​រៀល តែ​បាន​ឲ្យ​មួក​សុវត្ថិភាព​ទៅ​បងប្អូន​វិញ​នូវ​មួក​ចំនួន​១​។

ប៉ុន្តែ​ថ្ងៃក្រោយ បងប្អូន​ជិះ​ម៉ូតូ​មិន​ពាក់មួក​សុវត្ថិភាព សមត្ថកិច្ច​ចាប់​បាន​គឺ​ឲ្យ​បងប្អូន​ទៅ​ទិញ​មួក ដោយ​ខ្លួនឯង​មក​ពាក់​ត្រឹមត្រូវ ហើយ​ទើប​ឲ្យ​ម៉ូតូ​បងប្អូន​ត្រឡប់​ទៅ​ផ្ទះ​វិញ​។ ជាមួយ​គ្នា​ដែរ ក្នុង​នាម​អាជ្ញាធរ​ខេត្ត និង​ក្នុង​នាម​អនុ​គណៈកម្មការ​សុវត្ថិភាព ចរាចរណ៍​ផ្លូវគោក​ខេត្ត សូម​អំពាវនាវ ឲ្យ​ប្រជាពលរដ្ឋ មន្ត្រីរាជការ កងកម្លាំង ប្រដាប់​អាវុធ រួម​ទាំង​សិស្សានុសិស្ស សូម​ចូលរួម​គោរព​ច្បាប់ ចរាចរណ៍ និង​សូម​ពាក់មួក​គ្រប់​គ្នា ពេល​ជិះ​ម៉ូតូ​។ ម្យ៉ាងវិញទៀត នៅ​ពេល​បើកបរ សូម​ប្រកាន់ខ្ជាប់​នូវ​ក្រមសីលធម៌ ចេះ​យោគយល់​អធ្យាស្រ័យ​គ្នា​ទៅ​វិញ​ទៅ​មក មិន​ត្រូវ​បាន​បើកបរ​ហួស​ល្បឿន​កំណត់ មិន​ត្រូវ​បើកបរ​ក្រោម​ឥទ្ធិពល​ជាតិ​ស្រវឹង មិន​ត្រូវ​បើកបរ​ដោយ​ការ​ប្រើប្រាស់​គ្រឿងញៀន និង​មិន​ត្រូវ​បើកបរ​ក្នុង​ស្ថានភាព​ងោកងុយ​ជាដើម​។

សូម​បើកបរ​ឲ្យ​បាន​ត្រឹមត្រូវ តាម​ច្បាប់​កំណត់ ត្រូវ​ពាក់មួក​សុវត្ថិភាព គ្រប់ពេល​សម្រាប់​អ្នក​ជិះ​ម៉ូតូ ,​ត្រូវ​ពាក់​ខ្យែ​ក្រ​វ៉ា​ត់ សម្រាប់​អ្នកបើកបរ​យាន្ត , ត្រូវ​បើកបរ​ដោយ​ប្រកាន់​ស្តាំ , និង​ត្រូវ​បើកបរ​ដោយ​ការ​ប្រុង​ប្រយ័ត្ន​។ លោក កែវ ពៅ ប្រធាន​មន្ទីរ​សាធារណៈការ និង​ដឹក​ជញ្ជូន​ខេត្ត​បាន​ឲ្យ​ដឹង​ថា នេះ​ជា​ការ​អប់រំ និង​ផ្សព្វផ្សាយ​ច្បាប់​ចរាចរណ៍ លើក​ទី​៨​ហើយ ដែល​ធ្វើ​នៅ​ស្រុក​ជល​គី​រី​នេះ​ដោយ​ត្រូវ​ចែក​មួក​ចំនួន​១០០​។ ជាមួយ​គ្នា​នេះ​លោក​បាន​រំ​ឮ​ក​ដែរ យោង​របាយការណ៍​របស់​អនុ​គណៈកម្មការ​សុវត្ថិភាព ចរាចរណ៍​ផ្លូវគោក​ខេត្ត បាន​បញ្ជាក់​ថា អត្រា​គ្រោះថ្នាក់​ចរាចរណ៍​ក្នុង​ខេត្តកំពង់ឆ្នាំង ក្នុង​ឆ្នាំ​២០១៧ កន្លង​ទៅ​នេះ បាន​កើតឡើង​ចំនួន​៨៨​ករណី បើ​ប្រៀបធៀប​ឆ្នាំ​ចាស់​បាន​កាត់​បន្ថយ​១០​ករណី​។ បង្ក​ឲ្យ​មនុស្ស​ស្លាប់​ចំនួន​៤០​នាក់ បាន​ថយ​ចុះ ១០​នាក់ និង​ធ្វើ​ឲ្យ​មនុស្ស​រង​របួស​ចំនួន​១៥៣​នាក់ បាន​កាត់​បន្ថយ​៣០​នាក់​៕

Facebook Google Twitter Email

ចរាចរណ៍

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ