រាជធានីភ្នំពេញ ៖ កម្លាំងនគរបាលនាយកដ្ឋានព្រហ្មទណ្ឌ ក្រសួងមហាផ្ទៃ នៅថ្ងៃទី១៥ ខែមីនា ឆ្នាំ២០១៨ បានចាប់ខ្លួនបុរសជនជាតិម៉ាឡេស៊ីម្នាក់ ពាក់ព័ន្ធករណីឆបោកប្រាក់ជាង២លានដុល្លារ អាមេរិក ពីជនជាតិជប៉ុនចំនួន២៩នាក់ ក្រោមរូបភាពវិនិយោគខ្យល់ នៅខេត្តកំពត និងខេត្តកំពង់ស្ពឺ រួចបញ្ជូនមកតុលាការដើម្បីចាត់ការតាមច្បាប់។ រហូតមកដល់ល្ងាចថ្ងៃទី១៦ ខែមីនា លោកស្រី ស៊ឺ វណ្ណនី ព្រះរាជអាជ្ញារងអមសាលាដំបូងរាជធានីភ្នំពេញ បានដោះលែងបុរសជនជាតិម៉ាឡេស៊ី ឲ្យមានសេរីភាពវិញ។ ចំពោះមូលហេតុនៃការដោះលែងនេះមិនមានប្រភពណាបញ្ជាក់ឲ្យដឹងនោះទេ ព្រោះលោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានទៅបំពេញ បេសកកម្មនៅក្រៅប្រទេស។
បុរសជនជាតិម៉ាឡេស៊ី រូបនេះឈ្មោះ WOO KEE MUN ហៅ WOO CLEMENT អាយុ៤៦ឆ្នាំ ស្នាក់នៅផ្ទះលេខ១២/១១ ផ្លូវ៥៩៨ សង្កាត់ឃ្មួញ ខណ្ឌសែនសុខ រាជធានីភ្នំពេញ បានត្រូវសមត្ថកិច្ចឃាត់ខ្លួនតាមដីកាបញ្ជាឱ្យចូល របស់លោកស្រី ស៊ឺ វណ្ណនី ព្រះរាជអាជ្ញារងអមសាលាដំបូងរាជធានីភ្នំពេញនៅក្នុងភោជនីយដ្ឋាន តាយម៉េង ក្នុងរាជធានីភ្នំពេញ។ សមត្ថកិច្ចបានបញ្ជាក់ថា កាលពីអំឡុងឆ្នាំ២០១៣-២០១៤ ជនសង្ស័យ បានទាក់ទងជនជាតិជប៉ុន ចំនួន២៩នាក់ ដោយកុហកថា ខ្លួនមានដីសម្រាប់ដាំម្រេច នៅឃុំត្រពាំងក្តារ ស្រុកដងទង់ ខេត្តកំពត, មានដីសម្រាប់ដាំដំឡូង និងដើមអាកាស្សា នៅឃុំក្រាំងដង្វាយ ស្រុកភ្នំស្រួច ខេត្តកំពង់ស្ពឺ និងមានដីសម្រាប់ដាំស្វាយ នៅខេត្តកំពង់ស្ពឺ តែតាមការពិត ពេលទទួលប្រាក់ពីជនរងគ្រោះរួចហើយ គឺគេចខ្លួនរហូត ពោលគ្មានដីសម្រាប់ការវិនិយោគទាំងនេះឡើយ។
ជនសង្ស័យបានប្រើប្រាស់លិខិត ឆ្លងដែន ចំនួន៤ ដើម្បីងាយស្រួលដើរហើរ និងប្រើរួបភាពឆបោក។ ក្រៅពីជនជាតិជប៉ុនខាងលើនេះ ក៏មានជនជាតិម៉ាឡេស៊ី និងជនជាតិសឹង្ហបុរីប្រមាណ១០នាក់ទៀត ដែលបានចាញ់បោកជនសង្ស័យ រូបនេះ តែពួកគេមិនទាន់មកដាក់ពាក្យបណ្តឹង។ មន្ត្រីនគរបាលបានចាត់ទុកថា នេះជារូបភាពបោកអន្តរជាតិមួយ និងបានធ្វើឲ្យក្រុមវិនិយោគិនអន្តរជាតិខ្លាច ចំពោះការមករកស៊ីនៅក្នុងស្រុកខ្មែរ។ ក្រោយពីសាកសួរនៅរសៀលថ្ងៃទី១៦ មីនា នេះ តំណាងអយ្យការសាលាដំបូងរាជធានីភ្នំពេញ បានធ្វើការដោះលែងជនជាតិម៉ាឡេស៊ីនោះឲ្យទៅផ្ទះវិញ ធ្វើឲ្យដើមបណ្តឹង២៩នាក់ និងមេធាវីការពារក្តីស្រឡាំងកាំង៕
ចែករំលែកព័តមាននេះ