រាជធានីភ្នំពេញ ៖ បុរសជនជាតិចិនម្នាក់មានមុខរបរធ្វើជាចុងភៅមិនសូវកាក់កប ក៏បែកគំនិតធ្វើចោរគាស់ផ្ទះ មួយកន្លែងនៅក្នុងបុរីប៉េង ហួត លួចបានម៉ូតូ១គ្រឿងនិងទូរស័ព្ទដៃ១គ្រឿង បន្ទាប់មកជិះយកទៅលក់យកលុយដើរស៊ីចាយអស់ ។លុះ១សប្ដាហ៍ក្រោយមកញ៉ាមបានចេញធ្វើសកម្មភាពបន្តទៀត ហើយក៏អស់លក្ខណ៍…
រាជធានីភ្នំពេញ ៖ បុរសជនជាតិចិនម្នាក់មានមុខរបរធ្វើជាចុងភៅមិនសូវកាក់កប ក៏បែកគំនិតធ្វើចោរគាស់ផ្ទះ មួយកន្លែងនៅក្នុងបុរីប៉េង ហួត លួចបានម៉ូតូ១គ្រឿងនិងទូរស័ព្ទដៃ១គ្រឿង បន្ទាប់មកជិះយកទៅលក់យកលុយដើរស៊ីចាយអស់ ។លុះ១សប្ដាហ៍ក្រោយមកញ៉ាមបានចេញធ្វើសកម្មភាពបន្តទៀត ហើយក៏អស់លក្ខណ៍ ត្រូវបានកម្លាំងនគរបាលប៉ុស្តិ៍ជើងឯកនិងនគរបាលខណ្ឌដង្កោ ដឹកនាំដោយលោកវរៈសេីយ៍ឯកជឹម សុីថា អធិការនគរបាលខណ្ឌដង្កោឃាត់ខ្លួនបាន ។
បើយោងតាមកាមេរ៉ាសុវត្ថិភាព ហេតុការណ៍ខាងលើនោះ បានកើតឡើងម៉ោង១និង៣៨នាទីព្រឹកថ្ងៃទី៨ ខែមីនា ឆ្នាំ២០២៦ នៅចំណុចផ្ទះលេខ៥២ ផ្លូវលេខ១១ បុរីប៉េង ហួត ស្ថិតនៅក្នុងភូមិព្រៃថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
បុរសជាជនសង្ស័យរូបនោះឈ្មោះលូ ជៀន (LIU JIAN ) អាយុ៤៣ឆ្នាំមុខរបរចុងភៅ ស្នាក់នៅផ្ទះលេខ៦១ ផ្លូវM១១ បុរីប៉េង ហួត ភូមិព្រែថ្លឹង សង្កាត់ជើងឯក ។ ចំណែកជនរងគ្រោះឈ្មោះហង្ស ធីតា ភេទស្រី អាយុ៥៥ឆ្នាំ មុខរបរលក់ដូរ ស្នាក់នៅផ្ទះលេខ៥២ ផ្លូវលេខ១១ ដែលជាទីតាំងកើតហេតុខាងលើ ។ ផ្ទះរបស់គាត់បានរងការគាស់ទម្លុះទម្លាយទ្វារក្រោយចំហៀងខាងនិងបានបាត់បង់ម៉ូតូ១គ្រឿងម៉ាកHonda Zoomer-X ពណ៍ខ្មៅ ពាក់ស្លាកលេខភ្នំពេញ1IL-1521 និងទូរស័ព្ទដៃម៉ាកVivo១គ្រឿង ។
នគរបាលបានប្រាប់ឲ្យដឹងថា នៅថ្ងៃទី១ ខែកុម្ភៈ ឆ្នាំ២០២៦ មុនពេលកើតហេតុជាង១ខែ ស្ត្រីជាម្ចាស់ផ្ទះខាងលើបានចាកចេញពីផ្ទះទៅកាន់ក្រៅប្រទេស ប៉ុន្តែពុំដឹងថាគាត់ទៅប្រទេសណាមួយនោះទេ ។ ដោយគាត់បានទុកម៉ូតូនិងទូរស័ព្ទដៃនៅក្នុងផ្ទះខាងលើ ហើយបានចាក់សោទ្វារផ្ទះត្រឹមត្រូវ មិនតែប៉ុណ្ណោះស្ត្រីរូបក៏បានផ្ដាំផ្ញើរឲ្យក្មួយប្រុសរបស់គាត់ម្នាក់ទៀតឈ្មោះជួ ប៉េងហាក់ អាយុ៤៤ឆ្នាំឲ្យជួយមើលផ្ទះឲ្យគាត់ផងដែរ ។
នគរបាលបានប្រាប់ឲ្យដឹងបន្តទៀតថា លុះដល់វេលាម៉ោង១រសៀល ថ្ងៃទី១០ ខែមីនា ឆ្នាំ២០២៦ អ្នកជិតខាងបានខលទៅប្រាប់គាត់ដែលកំពុងនៅក្រៅប្រទេសនោះថា ផ្ទះរបស់គាត់មានស្នាមគាស់ទម្លុះទម្លាយ ទើបស្ត្រីម្ចាស់ផ្ទះខាងលើខលទៅប្រាប់ក្មួយប្រុសរបស់គាត់ឈ្មោះជួ ប៉េងហាក់ឲ្យទៅមើល ។ លុះក្មួយប្រុសទៅដល់ ក៏ឃើញមានស្នាមគាស់ផ្ទះមែន និងបាត់ម៉ូតូ១គ្រឿងខាងលើ ព្រមទាំងទូរស័ព្ទដៃផងដែរ ទើបបុរសជាក្មួយខលប្រាប់សន្តិសុខយាមបុរីឲ្យទៅពិនិត្យមើល និងឆែកាមេរ៉ាសុវត្ថិភាព ។ ខណៈនះក៏បានឃើញជនសង្ស័យជនជាតិចិនឈ្មោះលូ ជៀននោះជាអ្នកធ្វើសកម្មភាពគាស់ផ្ទះផ្នែកខាងក្រោយចូលលួចយកម៉ូតូនិងទូរស័ព្ទទៅបាត់ ។
សមត្ថកិច្ចបានប្រាប់បន្ថែមថា បន្ទាប់មកបុរសជាក្មួយប្រុសរូបនោះក៏បានប្ដឹងនគរបាលប៉ុស្តិ៍ជើងឯក ហើយលោកវរៈសេនីយ៍ឯកជឹម សុីថា អធិការនគរបាលខណ្ឌដង្កោ បានដឹកនាំនិងបញ្ជាកម្លាំងនគរបលប៉ុស្តិ៍ជើងឯក និងនគរបាលខណ្ឌ ចុះធ្វើការស្រាវជ្រាវ ដុតដៃដុតជើង ។ លុះដល់វេលាម៉ោង១និង៣០នាទីយប់ ថ្ងៃទី១៥ ខែមីនា ១សប្ដាហ៍ក្រោយពេលកើតហេតុ ស្រាប់តែជនសង្ស័យចេញធ្វើសកម្មភាពនៅក្នុងបុរីប៉េង ហួតដដែលនោះម្ដងទៀត ក៏ត្រូវបានកម្លាំងនគរបាលខាងលើធ្វើការឃាត់ខ្លួនបាន ។
បគរបាលបានបញ្ជាប្រាប់បន្ថែមទៀតថា បន្ទាប់មកបាននាំទៅសាកសួរនិងកសាងសំណុំរឿងចាត់ការតាមច្បាប់ ហើយជនសង្ស័យបានសារភាពថា ខ្លួនពិតជាបានធ្វើសកម្មភាពគាស់ផ្ទះខាងលើលួចបានម៉ូតូនិងទូរស័ព្ទមែន ។ ក្រោយពេលលួចបាន ខ្លួនបានយកទៅលក់ឲ្យបុរសជនជាតិចិនដូចគ្នាមិនស្គាល់អត្តសញ្ញាម្នាក់បានប្រាក់ចំនួន២៤០ដុល្លារ រួចយកលុយទៅសុីចាយអស់ហើយ ៕
ចែករំលែកព័តមាននេះ