រាជធានីភ្នំពេញ ៖ អ្នកទទួលបញ្ចាំរបស់នៅកាស៊ីណូណាហ្គាម្នាក់ បានត្រូវក្រុមចោរប្លន់ប្រដាប់អាវុធ២នាក់ មិនស្គាល់អត្តសញ្ញាណបាញ់ប្រហារចំនួន២គ្រាប់ ប្លន់យកកាបូបដែលមានលុយក្នុងនោះជិត៣ម៉ឺនដុល្លារទៅបាត់ដោយសុវត្ថិភាព កាលពីវេលាម៉ោង៨ និង១៥នាទីយប់ថ្ងៃទី២ មករា ២០១៣ នៅចំណុចមុខផ្ទះលេខ៧៨ ផ្លូវបេតុង ក្រុមទី១២ ភូមិព្រែកតាគង់៣ សង្កាត់ចាក់អង្រែលើ ខណ្ឌមានជ័យ ។
ស្ត្រីដែលត្រូវចោរបាញ់ប្រហារឈ្មោះសយ គន្ធា អាយុ៣១ឆ្នាំ មានទីលំនៅចំណុចកើតហេតុ បានរងរបួសចំក្បាលជង្គង់មួយគ្រាប់ ត្រូវបានគេបញ្ជូនទៅសង្គ្រោះនៅមន្ទីរពេទ្យកាល់ម៉ែត ។ តាមប្រភពព័ត៌មានបានឱ្យដឹងថា មុនពេលកើតហេតុស្ត្រីឈ្មោះសយ គន្ធា បានជិះរថយន្តឡិចស៊ីស RX330 ពណ៌ស ជាមួយប្តីធ្វើដំណើរចេញពីកាស៊ីណូណាហ្គា លុះមកដល់មុខផ្ទះបុរសជាប្តីបានឈប់រថយន្តបំណងបើកចូលផ្ទះ តែខណៈនោះស្ត្រីជាប្រពន្ធឈ្មោះសយ គន្ធា បានចុះពីរថយន្តបំណងជួយរ៉ីយ៉ែឡានប្តីចូលផ្ទះ ដោយស្ពាយកាបូបប្រាក់ជាប់ខ្លួន ស្រាប់តែលេចមុខជនប្រដាប់អាវុធមួយក្រុមមានគ្នា២នាក់ ជិះម៉ូតូម៉ាកឌ្រីមសេ១២៥ ពណ៌ខ្មៅ ស៊េរី២០០៨មួយគ្រឿង មកដល់ធ្វើសកម្មភាពភ្ជង់បាញ់ប្រហារចំនួន២គ្រាប់ ដណ្តើមយកកាបូបប្រាក់ពីស្ត្រីរងគ្រោះរួចឡើងជិះម៉ូតូបក្សពួកគេដែលបញ្ឆេះចាំជាស្រេចគេចខ្លួនបាត់ដោយសុវត្ថិភាព ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង ៕
ចែករំលែកព័តមាននេះ