រាជធានីភ្នំពេញ ៖ នៅពេលនិយាយដល់ខោអាវ និងស្បែកជើងជជុះ ប្រជាពលរដ្ឋក្មេងចាស់ ជាពិសេសអ្នកនៅភ្នំពេញ តែងនាំគ្នាសំដៅទៅផ្សារបឹងកេងកង ដែលជាផ្សារអីវ៉ាន់ជជុះដ៏ពេញនិយម ព្រោះអ្នកជាវលើកឡើងថា ខោអាវ…
រាជធានីភ្នំពេញ ៖ នៅពេលនិយាយដល់ខោអាវ និងស្បែកជើងជជុះ ប្រជាពលរដ្ឋក្មេងចាស់ ជាពិសេសអ្នកនៅភ្នំពេញ តែងនាំគ្នាសំដៅទៅផ្សារបឹងកេងកង ដែលជាផ្សារអីវ៉ាន់ជជុះដ៏ពេញនិយម ព្រោះអ្នកជាវលើកឡើងថា ខោអាវ និងស្បែកជើងជជុះ គឺនៅតែថ្មីស្អាតៗ និងមានគុណភាពខ្ពស់ មិនចាញ់ខោអាវថ្មីតាមហាង និងតាមផ្សារផ្សេងទៀតឡើយ ។
ទោះបីយ៉ាងនេះក្ដី ក្រុមអាជីវករបានត្អូញត្អែរយ៉ាងខ្លាំងថា ៖« ការលក់ដូររាល់ថ្ងៃ មិនសូវដាច់ដូចកាលពីប៉ុន្មានឆ្នាំមុនឡើយ ដោយសារតែមានអ្នកលក់នៅតាមផ្លូវសាធារណៈកាន់តែច្រើនឡើងៗ » ។
អ្នកស្រី អឿន គង់ អាយុ៤៥ឆ្នាំ បានរៀបរាប់ថា អ្នកស្រីបានចាប់មុខរបរលក់ស្បែកជើងជជុះនៅក្នុងផ្សារបឹងកេងកងនេះ អស់រយៈពេល៥ឆ្នាំហើយ ដោយមានលក់ដូចជា ប្រភេទស្បែកជើងប៊ូ ប៉ាតា និងកាបូបស្ពាយសម្រាប់បុរសៗ ។ ការលក់របស់គាត់សព្វថ្ងៃនេះ ហាក់ដូចជាស្ងាត់ភ្ញៀវយ៉ាងខ្លាំង និងលក់ដាច់ដោយថ្ងៃ មានន័យថា ថ្ងៃខ្លះក៏លក់ដាច់ និងថ្ងៃខ្លះ គ្មានភ្ញៀវតែម្តង សឹងតែរកលុយបង់ថ្លៃតូបមិនចង់បាន ។ បើធៀបនឹងកាលពី២ទៅ៣ឆ្នាំមុន គឺខុសគ្នាយ៉ាងខ្លាំង ។
អ្នកស្រីបន្តថា ថ្វីដ្បិតតែជាអីវ៉ាន់ជជុះ តែសុទ្ធសឹងជាអីវ៉ាន់ល្អ និងមានគុណភាព ហើយតម្លៃវិញក៏ធូរថ្លៃសមរម្យដែរ គឺមានចាប់ពី១២ដុល្លារដល់១៧ដុល្លារ ទៅតាមរបស់ល្អឬមិនសូវល្អ ។
ដូចគ្នានេះដែរ ម្ចាស់តូបម្នាក់ទៀតដែលប្រកបរបរនេះរយៈពេល១០ឆ្នាំមកហើយនោះ បាននិយាយដែរថា អ្នកស្រីបានជួលតូបជាប់គ្នាចំនួន២ដាក់លក់ខោអាវជជុះ ដោយតូប១ត្រូវជួលក្នុងតម្លៃ៤០០ដុល្លារ ។
អ្នកស្រីបានបន្តថា ការលក់ខោអាវជជុះពេលនេះ គឺខុសប្លែកយ៉ាងខ្លាំងជាងកាលពី៣ទៅ៤ឆ្នាំមុន ដោយសារតែស្ងាត់មិនសូវមានភ្ញៀវមកទិញ ។
អ្នកស្រីនិយាយថា ៖« ការលក់ដូររាល់ថ្ងៃនេះ មិនថាឡើយថ្ងៃបុណ្យ ឬថ្ងៃធម្មតាទេ គឺលក់ដាច់មួយៗតែប៉ុណ្ណោះ ស្ទើរតែរកលុយបង់ថ្លៃឈ្នួលតូបលែងចង់បានទៅហើយ មិនថាតែខ្ញុំទេ អាជីវករដទៃទៀតក៏ដូចគ្នាដែរ » ។
អ្នកស្រីបានកត់សម្គាល់ថា ៖« រាល់ថ្ងៃនេះ ការលក់ខោអាវជជុះរបស់ខ្ញុំមានការថយចុះយ៉ាងខ្លាំង ដោយសារតែមានអ្នកលក់ខោអាវថ្មីៗ និងខោអាវជជុះជាច្រើននៅតាមទីសាធារណៈ ដោយមានអ្នកខ្លះដាក់លក់នៅតាមផ្លូវក៏មាន និងដើរលក់ចល័តតាមរ៉ឺម៉កម៉ូតូក៏មាន ។ ពេលនេះ អ្នកទិញមានចំនួនកាន់តែថយទៅៗ និងស្ទើរតែមិនមានទៅហើយសម្រាប់ហាងរបស់ខ្ញុំ » ។
លោក អ៊ុក ច័ន្ទឆៃយុទ្ធ ជាបុគ្គលិកបម្រើការងារនៅក្នុងធនាគារមួយបានឲ្យដឹងថា នៅពេលទំនេរ លោកតែងមកកាន់ផ្សារបឹងកេងកងនេះ ដើម្បីរកមើលនិងទិញខោអាវជជុះ ដោយសារតែវានៅមានគុណភាពល្អច្រើន ។
លោកបន្តថា ៖« ប្រភេទខោអាវជជុះនៅទីនេះ វាស្អាតៗ មានគុណភាពខ្ពស់ និងមានតម្លៃថោកសមរម្យសម្រាប់ខ្ញុំទិញយកទៅប្រើប្រាស់ ដោយមិនចាញ់ខោអាវថ្មីៗដែលគេលក់នៅតាមតូបក្នុងផ្សារ និងហាងធំនោះប៉ុន្មានទេ » ។
លោកបានបញ្ជាក់ថា អីវ៉ាន់ជជុះក្នុងផ្សារបឹងកេងកងនេះ គឺនៅតែមានគុណភាពល្អ មិនថាខោឬអាវ សូម្បីតែសម្ភារជជុះផ្សេងទៀត ក៏នៅល្អដែរ ហើយជជុះខ្លះ តម្លៃវាលើសខោអាវតាមហាងក៏មានដែរ ។
ខោអាវមួយទឹក ឬក៏ខោអាវជជុះនេះ គឺនៅមានការពេញនិយមយ៉ាងខ្លាំងពីសំណាក់មនុស្សទូទៅ ដោយមិនប្រកាន់ថា ជាអ្នកមានធនធានតិចតួច ឬក៏អ្នកដែលមានទ្រព្យសម្បត្តិច្រើននោះទេ ដែលទិញយកទៅស្លៀកឬប្រើប្រាស់ ព្រោះវាជារបស់ល្អ និងស្អាត។ មិនតែប៉ុណ្ណោះ វាថែមទាំងមានគុណភាពខ្ពស់ និងតម្លៃសមរម្យផងដែរ ។
ការលក់ធ្លាក់ចុះនេះ ក្រុមអាជីវករផ្សារបឹងកេងកងមើលឃើញថា ដោយសារមានកំណើននៃការលក់ចល័តតាមរ៉ឺម៉កម៉ូតូ, ការបើកហាងលក់ខោអាវកាន់តែច្រើនឡើងៗ ក៏ដូចជាការកើនឡើងនូវការលក់តាមអនឡាញ ដែលរួមចំណែកដល់ការធ្លាក់ចុះនៃការលក់នៅផ្សារបឹងកេងកងនេះ ៕
ចែករំលែកព័តមាននេះ