ខេត្តសៀមរាប ៖ មគ្គុទេ្ទសក៍ទេសចរណ៍បានដើរតួយ៉ាងសំខាន់ក្នុងវិស័យទេសចរណ៍ បើគ្មានមគ្គុទ្ទេសក៍ទេសចរណ៍ទេ ប្រៀបដូច «អញ្ជើញភ្ញៀវមកលេងផ្ទះ តែម្ចាស់ផ្ទះមិននៅ » ។ ដូច្នេះ មគ្គុទេ្ទសក៍ទេសចរណ៍បានដើរតួនាទីស្នូលក្នុងការអធិប្បាយអំពីវប្បធម៌ អរិយធម៌ ប្រវត្តិសាស្ត្រ និងប្រពៃណី ទំនៀមទម្លាប់របស់ប្រទេសខ្លួន ប្រកបដោយការជក់ចិត្ត ដិតអារម្មណ៍ ហើយធ្វើឲ្យភ្ញៀវទេសចរចង់មកទស្សនាម្តងទៀត ពិសេសមកពីក្នុងតំបន់អាស៊ាន ចិន ជប៉ុន និងកូរ៉េ រួមទាំងជាតិសាសន៍ដទៃទៀត ដែលជាចលករជំរុញឲ្យមានល្បឿនអភិវឌ្ឍន៍សេដ្ឋកិច្ច សង្គមក្នុងតំបន់អាស៊ាន ក៏ដូចជា ចិន ជប៉ុន និងកូរ៉េ ។ នេះជាការថ្លែងរបស់លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ ។
លោករដ្ឋមន្ត្រីថ្លែងបែបនេះ ធ្វើឡើងក្នុង ពិធីបើកសន្និសីទអាស៊ានបូកបី ស្តីពីការបក ស្រាយបេតិកភណ្ឌវប្បធម៌ និងធម្មជាតិឆ្ពោះ ទៅកាន់មគ្គុទេ្ទសក៍ប្រកបដោយគុណភាព និងធ្វើឲ្យទេសចរពេញចិត្ត និងកិច្ចប្រជុំពិសេសអាស៊ាន-រុស្ស៊ី ស្តីពីការបូកសរុបវគ្គបណ្តុះបណ្តាលភាសារុស្សុីសម្រាប់មគ្គុទេ្ទសក៍ទេសចរណ៍អាស៊ាន និងការកំណត់យុទ្ធសាស្ត្រអភិវឌ្ឍន៍ធនធានមនុស្សទេសចរណ៍អាស៊ាននាពេលអនាគត ចាប់ពីថ្ងៃទី៦-៩ ខែមីនា ឆ្នាំ២០១៨ នៅសណ្ឋាគារសុខាល័យ ខេត្តសៀមរាប ក្រោមកិច្ចសហការរវាងក្រសួងទេសចរណ៍ ក្រសួងវប្បធម៌ និងវិចិត្រសិល្បៈ អង្គការUNESCO សាកលវិទ្យាល័យ USC លេខាធិការដ្ឋានអាស៊ាន និងសាកលវិទ្យាល័យរដ្ឋរុស្សុីផ្នែកទេសចរណ៍ និងសេវាកម្ម ។
លោកបណ្ឌិត ថោង ខុន ថ្លែងបន្តថា ដើម្បីទ្រទ្រង់ចីរភាពនៃកំណើនទេសចរណ៍ និងអភិវឌ្ឍន៍ទេសចរណ៍ មគ្គុទេ្ទសក៍ទេសចរណ៍ជាផ្នែកមួយដ៏សំខាន់មិនអាចខ្វះបាន ហេតុនេះតំបន់អាស៊ាន បានផ្តោតជាសំខាន់លើការពង្រឹងគុណភាព សេវាកម្ម និងផលិតផល ដោយត្រូវរៀបចំយុទ្ធសាស្ត្រពិពិធកម្មផលិតផលក្នុងប្រទេសរៀងៗខ្លួន ។ ដើម្បីធានាបាននូវគុណភាពអាស៊ានបានរៀបចំឲ្យមានស្តង់ដាទេសចរណ៍ជាច្រើនក្នុងគោលដៅពង្រឹងគុណភាពឲ្យភ្ញៀវទេសចរពេញចិត្ត ។
លោករដ្ឋមន្ត្រីថ្លែងថា ៖« អាស៊ាន គឺជាគោលដៅទេសចរណ៍លំដាប់ពិភពលោករួចហើយ ហេតុនេះ យើងមិនអាចនៅស្ងៀមបានទេ យើងត្រូវបន្តសេវាកម្ម ដើម្បីឆ្លើយតបទៅនឹងសេចក្តីរំពឹងទុករបស់ភ្ញៀវទេសចរ » ។ លោកបញ្ជាក់ថា នៅឆ្នាំ២០១៧កន្លងមកកម្ពុជាទទួលបានទេសចរអន្តរជាតិជាង៥,៦លាននាក់ កើនឡើងជិត១២% បើប្រៀបធៀបទៅនឹងឆ្នាំ២០១៦ ក្នុងចំណោមនោះទេសចរចិនមានចំនួន១,២លាននាក់ កើនឡើង៤៥,៩% ទេសចរជប៉ុន ចំនួនជាង២០ម៉ឺននាក់ កើនឡើង៦,២% និងទេសចរកូរ៉េ ចំនួនជាង៣៤ម៉ឺននាក់ ថយចុះ ៣,៤%។
បច្ចុប្បន្នវិស័យទេសចរណ៍បានបង្កើតការងារដោយផ្ទាល់ចំនួន៦០ម៉ឺននាក់ និងដោយប្រយោលរាប់ពាន់នាក់ផ្សេងទៀត។ ស្របពេលជាមួយគ្នានេះ កម្ពុជាបានផ្តល់ឱកាសដល់វិនិយោគិនបរទេស រួមទាំងចិន ជប៉ុន និងកូរ៉េ ដើម្បីធ្វើការអភិវឌ្ឍលើវិស័យហេដ្ឋារចនាសម្ព័ន្ធ ដែលមាននិរន្តរភាពជាមួយនឹងវិស័យទេសចរណ៍ រួមទាំងផ្នែកសណ្ឋាគារ សម្បទាទេសចរណ៍ និងសេវាកម្ម ។
លោករដ្ឋមន្ត្រីមានសុទិដ្ឋិនិយមថា នៅឆ្នាំ២០១៨នេះ នឹងទទួលបានទេសចរអន្តរជាតិ ចំនួនជាង៦លាននាក់ និងទទួលទេសចរអន្តរជាតិ ចំនួនជាង៧លាននាក់ នៅឆ្នាំ២០២០ ក្នុងនោះទេសចរជនជាតិចិនយ៉ាងតិចចំនួន២លាននាក់ ។
ដោយឡែកនៅឆ្នាំ២០១៧ តំបន់អាស៊ានទទួលបានទេសចរអន្តរជាតិចំនួនប្រមាណ១២៥លាននាក់ ក្នុងនោះចំនួនជាង៤២% ជាទេសចរក្នុងតំបន់អាស៊ានខ្លួនឯង កើនឡើង៨,៤% ទទួលបានប្រាក់ចំណូលចំនួន៩៣ពាន់លានដុល្លារសហរដ្ឋអាមេរិក ។ ជាពិសេសនៅក្នុងឆ្នាំ២០១៧ សម្រាប់ប្រទេសអាស៊ានបូកបី (ចិន ជប៉ុន និងកូរ៉េ) ទទួលបានទេសចរអន្តរជាតិ១៧៥លាននាក់ កើនឡើង៦,៧% ប្រៀបធៀបនឹងឆ្នាំ២០១៦ ។
គួររំឭកថា រាជរដ្ឋាភិបាលកម្ពុជាបានកំណត់យកវិស័យទេសចរណ៍ជាវិស័យស្នូល និងអាទិភាពមួយសម្រាប់ទ្រទ្រង់កំណើនសេដ្ឋកិច្ចជាតិ ក៏ដូចជាអភិវឌ្ឍន៍សង្គម ស្របពេលវិស័យមួយនេះ បានផ្ដល់ចំណូលរាប់ពាន់លានដុល្លារអាមេរិក ក្នុង១ឆ្នាំដល់ប្រទេសកម្ពុជា ។
នៅក្នុងពិធីបូកសរុបការងាររបស់ក្រសួងទេសចរណ៍ លោក ហោ ណាំហុង ឧបនាយករដ្ឋមន្ត្រី បានឲ្យដឹងថា ទេសចរណ៍ត្រូវបានចាត់ទុកថា ជាវិស័យអាទិភាពមួយក្នុងយុទ្ធសាស្ត្ររបស់រាជរដ្ឋាភិបាលកម្ពុជា ដែលវិស័យនេះបានរួមចំណែកដល់ការអភិវឌ្ឍសេដ្ឋកិច្ច និងផ្ដល់ការងារយ៉ាងច្រើនដល់ពលរដ្ឋ ដើម្បីទទួលបានប្រាក់ចំណូលសម្រាប់ផ្គត់ផ្គង់គ្រួសារ ។ ដូច្នេះក្រសួងទេសចរណ៍គួរតែមានវិធានការមួយចំនួន ដើម្បីត្រៀមទទួលភ្ញៀវទេសចរដែលកើនឡើងពីមួយឆ្នាំទៅមួយឆ្នាំ ជាពិសេសភ្ញៀវទេសចរចិន ដែលនឹងកើនឡើងដល់២លាននាក់ក្នុងឆ្នាំ២០២០, ទេសចរអន្តរជាតិ៦,១លាននាក់នៅឆ្នាំ២០១៨, ៧លាននាក់ក្នុងឆ្នាំ២០២០ និង១៥លាននាក់ក្នុងឆ្នាំ២០៣០ ។ ទន្ទឹមនឹងការកើនឡើងនៃទេសចរមកពីប្រទេសនានា ការបណ្តុះបណ្តាលមគ្គុទ្ទេសក៍ទេសចរណ៍ ក៏ត្រូវយកចិត្តទុកដាក់ទាំងភាសា ទាំងការយល់ដឹងពីប្រវត្តិសាស្ត្ររបស់កម្ពុជាឲ្យបានច្បាស់លាស់ ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី យល់ឃើញថា ៖« បើចង់ឲ្យទេសចរមកទស្សនានៅស្រុកយើងកាន់តែច្រើន យើងត្រូវរៀបចំសណ្ដាប់ធ្នាប់ ទាំងចរាចរណ៍ និងអនាម័យនៅតាមទីសាធារណៈនានាតាមដងផ្លូវ ជាពិសេស គួរតែរៀបចំឱ្យមានផ្លូវសម្រាប់អ្នកថ្មើរជើងនៅតំបន់ដែលមានទេសចរធ្វើដំណើរច្រើន សូមកុំយកចិញ្ចើមផ្លូវធ្វើអាជីវកម្ម » ។
លោកបញ្ជាក់ថា កង្វះអនាម័យ និងការគ្រប់គ្រងសំរាមមិនបានល្អ គឺជាបញ្ហាមួយដែលរារាំងដល់ទេសចរក្នុងប្រទេសកម្ពុជា ព្រោះគ្មានភ្ញៀវទេសចរណាចង់មកលេងនៅប្រទេសមិនស្អាត ប្រទេសដែលងាកទៅណា ក៏ឃើញតែសំរាម ហើយក៏គ្មានទេសចរណាមួយចង់ទៅទស្សនាតំបន់សំរាមដែរ ។ ដូចនេះ ដើម្បីឲ្យភ្ញៀវមកទស្សនាកាន់តែច្រើន អាជ្ញាធរក្រោមៗគួរតែរៀបចំទុកដាក់សំរាមឲ្យបានល្អ ថែរក្សាអនាម័យគ្រប់ទីកន្លែង មិនថាតែតំបន់នៅតាមផ្លូវនានាទេ សូម្បីនៅផ្ទះក៏ត្រូវរៀបចំឲ្យបានស្អាតល្អដែរ ៕
ចែករំលែកព័តមាននេះ