ខេត្តបាត់ដំបង ៖ ស្រ្តីមេម៉ាយវ័យជាង៤០ឆ្នាំម្នាក់ត្រូវឃាតករសម្លាប់រួចសែងទៅញាត់ចូលក្នុងពាងទឹកក្រោយផ្ទះ ដែលហេតុការណ៍នេះបង្កឱ្យមានការឆោឡោ កាលពីវេលាម៉ោង៥និង២០នាទីព្រឹកថ្ងៃទី២៨ ធ្នូ នៅក្នុងភូមិអូរតាគាំ៣ សង្កាត់ទូលតាឯក ក្រុងបាត់ដំបង ។ សមត្ថកិច្ចសង្ស័យថា ជាអំពើឃាតកម្ម ជារឿងគំនុំដែលជនប្រព្រឹត្តមានគ្នាយ៉ាងតិច២នាក់ ។ ជាមួយគ្នាជនសង្ស័យ២នាក់ត្រូវបានសមត្ថកិច្ចឃាត់ខ្លួនបណ្ដោះអាសន្នដើម្បីសួរនាំផងដែរ ទាក់ទិននឹងការសម្លាប់ដ៏ឃោរឃៅនេះ ។
មន្ត្រីសមត្ថកិច្ចនិយាយថា ស្រ្តីរងគ្រោះឈ្មោះទូច សូភី ហៅម៉ៅ អាយុ៤៣ឆ្នាំជាស្រ្តីមេម៉ាយកូន២នាក់ ។ ស្រ្តីរងគ្រោះត្រូវក្រុមជនដៃដល់វាយសម្លាប់នឹងដំបងដងស្នូកឃ័ររួចសែងយកទៅទម្លាក់ចូលក្នុងពាងទឹកបណ្ដាលឲ្យស្លាប់ ខណៈដែលគាត់ក្រោកពីព្រលឹមបើកទ្វារឲ្យម្ដាយចេញទៅវត្ត ។ មន្រ្តីជំនាញបញ្ជាក់ថា ឃាតករអាចរៀបចំគម្រោងការពិឃាតទុកជាមុន ។ លុះមានឱកាសក៏ឆ្មក់ចូលទៅសម្លាប់ក្នុងបរិវេណផ្ទះទាំងព្រលឹមអុរតែម្ដង ។
កូនស្រីរបស់ជនរងគ្រោះឈ្មោះព្រំ កញ្ញា អាយុ១៤ឆ្នាំ បានប្រាប់សមត្ថកិច្ចថា ពេលកើតហេតុនាងមិនបានដឹងទេ ខណៈនោះ នាងនិងបងប្រុសឈ្មោះព្រំ រតនា អាយុ១៧ឆ្នាំ កំពុងដេកក្នុងបន្ទប់នៅឡើយ ។ នាងប្រាប់ថា នៅម៉ោងជាង៦ព្រឹកនោះ ពេលនាងងើបពីដំណេកបើកទ្វារចេញក្រៅ ស្រាប់តែឃើញមានស្នាមឈាម ដែលមានមួកនិងស្បែកជើងរបស់ម្ដាយរប៉ាត់រប៉ាយនៅក្នុងបរិវេណខាងមុខផ្ទះ ។ គ្រានោះនាងខំស្រែកហៅរកម្តាយ និងដើររកក៏មិនឃើញ នាងក៏ចូលទៅហៅបងប្រុសឲ្យមកជួយរកម្ដាយ នៅតែរកមិនឃើញទៀត ទើបនាងទូរស័ព្ទប្រាប់ឪពុកធំឲ្យមកជួយរកម្ដាយនាង ក៏បានប្រទះឃើញម្ដាយត្រូវគេសម្លាប់ញាត់ចូលពាងទឹកខាងក្រោយផ្ទះ ទើបមានការភ្ញាក់ផ្អើលឡើងតែម្ដង ។
ជាមួយគ្នានោះបងប្រុសរបស់ស្រ្តីរងគ្រោះបានបំភ្លឺដែរថា ក្រោយពីគាត់ទទូលបានដំណឹងដ៏អកុសលនេះភ្លាម គាត់ក៏បានមកមើលហើយឃើញស្នាមឈាមពាសពេញខាងមុខផ្ទះ ។ គាត់និយាយថា ទាំងរូបគាត់ និងក្មួយៗបានដើររកគ្រប់កន្លែងនៅជុំវិញផ្ទះ តែរកមិនឃើញលុះបន្តិចក្រោយមកមានអ្នកជិតខាងមកជួយដើររក ទើបប្រទះឃើញប្អូនស្រីត្រូវគេសម្លាប់ញាត់ចូលក្នុងពាងទឹកខាងក្រោយផ្ទះ ក្នុងស្ថានភាពទម្លាក់ក្បាលចុះក្រោម ហើយក្នុងពាងមានទឹកត្រឹមតែលិចក្បាលជនរងគ្រោះ ។ បុរសនេះបញ្ជាក់ថា គាត់បានស្រង់ប្អូនស្រីដឹកយកទៅមន្ទីរពេទ្យដែរ តែហួសពេលទៅហើយ ព្រោះប្អូនស្រីគាត់ដាច់ខ្យល់ស្លាប់តាំងពីឃាតករវាយញាត់ចូលពាងទឹកដំបូងម៉្លេះ ។ បងប្រុសស្រ្តីរងគ្រោះបញ្ជាក់ដែរថា ជារៀងរាល់ព្រឹកប្អូនស្រីគាត់តែងងើបពីព្រលឹមហាត់ប្រាណនៅក្នុងបរិវេណផ្ទះមិនដែលចេញក្រៅរបងទេ តែនៅព្រឹកកើតហេតុពេលងើបពីព្រលឹមបើកទ្វារឲ្យម្ដាយចេញទៅវត្តក៏ជួបគ្រោះថ្នាក់បែបនេះតែម្ដង ។
មន្រ្តីនគរបាលផ្នែកកោសល្យវិច័យបាននិយាយដែរថា ជនដៃដល់បានប្រើដំបងឈើ ដងស្នូកឃ័រប្រវែងជាងកន្លះម៉ែត្រវាយជនរងគ្រោះឲ្យសន្លប់នៅខាងមុខផ្ទះ រួចនាំគ្នាសែងទៅទម្លាក់ចូលក្នុងពាងទឹក ។ សពមានស្នាមជាំត្របកភ្នែក ស្នាមរបួសត្រង់កខាងឆ្វេង កញ្ចឹងកពីក្រោយ និងជាំស្មាស្ដាំ ។ មន្រ្តីជំនាញដដែលបានសន្និដ្ឋានថា បើផ្អែកលើស្នាមរបួសទាំងនេះ ជនរងគ្រោះមិនអាចស្លាប់ទេ តែអាចសន្លប់ ប៉ុន្តែគាត់បានស្លាប់ពេលត្រូវឃាតករសែងយកទៅទម្លាក់ចូលក្នុងពាងទឹក ។ នៅកន្លែងកើតហេតុសមត្ថកិច្ចបានរកឃើញដងស្នូកឃ័របាក់ជា២កំណាត់ ដែលមួយកំណាត់នៅខាងមុខផ្ទះ ឯមួយកំណាត់ទៀតរកឃើញនៅក្រៅរបងខាងក្រោយផ្ទះ ។ មានន័យថា ជនដៃដល់បានគេចតាមច្រកខាងក្រោយផ្ទះ ។
លោក ជេត វណ្ណនី ស្នងការរងខេត្តបានឲ្យដឹងដែរថា ខណៈពេលកំពុងពិនិត្យទីតាំងកើតហេតុសមត្ថកិច្ចបានឃាត់ខ្លួនបណ្ដោះអាសន្នជនសង្ស័យ២នាក់ដែលមានផ្ទះនៅក្បែរគ្នាយកទៅសាកសួរ បន្ទាប់ពីមានការសង្ស័យ ។ លោកបញ្ជាក់ថា ជនសង្ស័យទាំង២នាក់នោះ ម្នាក់ឈ្មោះវ៉ាន់ សុភារិទ្ធ ហៅប៉ុច ភេទប្រុសអាយុ២៩ឆ្នាំ ត្រូវកម្លាំងលោកនាំយកទៅសាកសួរ ។ ឯម្នាក់ទៀតឈ្មោះវ៉ាន់ សុភុំ ភេទប្រុស អាយុ២២ឆ្នាំ ត្រូវកម្លាំងកងរាជអាវុធហត្ថខេត្ត នាំយកទៅសាកសួរដែរ ទាំង២នាក់នេះជាបងប្អូនបង្កើត ដែលមានផ្ទះនៅក្បែរផ្ទះជនរងគ្រោះ ។ លោកស្នងការរងបន្តថា ការសួរនាំជនសង្ស័យទាំង២នាក់ខាងលើនេះ នៅមិនទាន់ដឹងថា តើមានការពាក់ព័ន្ធឬបែបណានោះទេ ព្រោះមន្រ្តីជំនាញកំពុងសួរនាំនៅឡើយ ហើយនេះគ្រាន់តែជាការនាំខ្លួនមកសាកសួរបណ្ដោះអាសន្នតែប៉ុណ្ណោះ ។
បើតាមការពិនិត្យលើសកម្មភាពសម្លាប់ស្រ្តីរងគ្រោះខាងលើនេះ លោក ជេត វណ្ណនី បានសន្និដ្ឋានជំហានដំបូងថា វាជាអំពើឃាតកម្មដោយគំនុំដែលក្រុមជនដៃដល់អាចមានគ្នា២នាក់ បានរៀបចំគម្រោងគិតទុកជាមុន ។ លោកបញ្ជាក់ថា ជនរងគ្រោះគ្មានបាត់បង់ទ្រព្យសម្បត្តិទេ សូម្បីតែចិញ្ជៀនដែលពាក់នៅជាប់ម្រាមដៃក៏មិនបាត់បង់ដែរ ប៉ុន្តែយើងក៏មិនទាន់ដឹងថា គ្រួសារជនរងគ្រោះធ្លាប់មានរឿងរ៉ាវជាមួយក្រុមជនដៃដល់ ឬបែបណាដែរ ។ ទោះជាយ៉ាងណា កម្លាំងជំនាញកំពុងស្រាវជ្រាវលើករណីនេះហើយ ៕
ចែករំលែកព័តមាននេះ