រាជធានីភ្នំពេញ ៖ ស្ដ្រីមានមុខរបរជាជាងអ៊ុតសក់ម្នាក់បានលង់នឹងល្បែងស៊ីសងនៅកាស៊ីណូណាហ្គាចាញ់អស់គ្រឿងអលង្ការនិងអស់ប្រាក់ចំនួន១០.១០០ដុល្លារអាមេរិក ហើយដោយសារខ្លាចប្ដីខឹងនិងលែងលះក៏បានប្រឌិតរឿងថាចោរប្លន់ រួចហើយបានទៅប្ដឹងប៉ូលិសប៉ុស្ដិ៍ផ្សារដេប៉ូទី៣ ខណ្ឌទួលគោក ដើម្បីឱ្យជួយស្រាវជ្រាវរកពួកចោរប៉ុន្ដែការប្រឌិតរឿងបែបនេះបែរជាវ័ណ្ឌ.កខ្លួនឯង និងទទួលបាននូវភាពអាម៉ាស់ទៅវិញ ។ហេតុការណ៍ដែលមិននឹកស្មានដល់នេះបានធ្វើឱ្យមានការភ្ញាក់ផ្អើលកាលពីវេលាម៉ោង៩យប់ ថ្ងៃទី២ ខែមីនា ហើយប៉ូលិសប៉ុស្ដិ៍ផ្សារដេប៉ូទី៣ និងប៉ូលិសខណ្ឌទួលគោកបានចុះទៅធ្វើការស្រាវជ្រាវជាបន្ទាន់បន្ទាប់ពីទទួលបានព័ត៌មានពីហេតុការណ៍ប្លន់នេះមកប៉ុន្ដែពេលធ្វើការស្រាវជ្រាវទៅទើបដឹងថាជារឿងប្រឌិតសោះ ។ បន្ទាប់ពីបែកធ្លាយរឿងអាស្រូវភូតកុហកនេះហើយស្ដ្រីដែលលង់នឹងល្បែងស៊ីសងរួមទាំងស្ដ្រីជាម្ដាយផងបានធ្វើលិខិតសារភាពទទួលទោសកំហុស នៅចំពោះមុខសមត្ថកិច្ចខណ្ឌទួលគោកដើម្បីឱ្យលស់លាត្រាប្រណី ។ ស្ដ្រីដែលបានភូតកុហកសមត្ថកិច្ចនេះឈ្មោះកែ ឈុនលី អាយុ៣០ឆ្នាំ ជាជាងអ៊ុតសក់និងម្ដាយឈ្មោះឈុន អ៊ឹម អាយុ៤៥ឆ្នាំ ។ អ្នកទាំងពីរស្នាក់នៅផ្ទះ ជួលលេខ១៦A ផ្លូវលេខ១១២ សង្កាត់ផ្សារដេប៉ូទី៣ ខណ្ឌទួលគោក ។
តាមព័ត៌មានឱ្យដឹងថាស្ដ្រីឈ្មោះកែវ ឈុនលី មានប្ដីជាអាជីវករលក់គ្រឿងអលង្ការនៅផ្សារថ្មី ។ ជាទម្លាប់ស្ដ្រីរូបនេះតែងតែញៀននឹងល្បែងស៊ីសងហើយបានបំផ្លិចបំផ្លាញប្រាក់ក្នុងគ្រួសាររហូតត្រូវប្ដីស្ដីបន្ទោសនិងធ្វើការអប់រំជាច្រើនលើក ច្រើនសាឱ្យឈប់លេងល្បែងព្រមទាំងឱ្យធ្វើកិច្ចសន្យាទៀតផងដោយបញ្ជាក់ថា បើនៅតែលេងល្បែងទៀតនឹងលែងលះគ្នាហើយឯកូន២នាក់ប្ដីជាអ្នកយក ។ ប្រភពព័ត៌មានដដែលបានបន្ដទៀតថា ទោះបីជាមានការអប់រំយ៉ាងណាក៏ដោយក៏ស្ដ្រីរូបនេះមិនឈប់លេងល្បែងដែរហើយនៅមុនពេលមាន រឿងភូតកុហកសមត្ថកិច្ចនេះស្ដ្រីរូបនេះបានទៅលេងល្បែងនៅកាស៊ីណូណាហ្គា រហូតចាញ់អស់គ្រឿងអលង្ការដែលក្នុងនោះមាន កងដៃមួយនិងខ្សែ.កពេជ្រ មួយខ្សែ មានតម្លៃ៥.៣០០ដុល្លារព្រមទាំងគ្រឿងអលង្ការ របស់កូនមានតម្លៃ១.០០០ដុល្លារនិងលុយ ៤.៨០០ដុល្លារ សរុបទាំងអស់១០.១០០ ដុល្លារ។ បន្ទាប់ពីចាញ់អស់គ្រឿងអលង្ការហើយស្ដ្រីរូបនេះបានរួមគំនិតគ្នាជាមួយម្ដាយរៀបចំគំរោងកុហកប្ដីដោយប្រាប់ថា ចោរប្លន់ហើយនាំគ្នាទៅប្ដឹងប៉ូលិសប៉ុស្ដិ៍ផ្សារដេប៉ូទី៣ ខណ្ឌទួលគោក ប្រាប់ថាចោរចូលប្លន់ក្នុងផ្ទះ ។ ពេលនោះសមត្ថកិច្ចបានចុះទៅធ្វើការស្រាវជ្រាវរហូតដល់ដឹងថាការពិតមិនមែនចោរប្លន់នោះទេ ។
នៅចំពោះមុខសមត្ថកិច្ចស្ដ្រីទាំង២នាក់ម្ដាយកូនបានធ្វើលិខិតសារភាពទោសកំហុសដោយឱ្យដឹងថា នៅវេលាម៉ោង៩យប់ថ្ងៃទី២ មីនា យើងខ្ញុំទាំងពីរនាក់(ឈ្មោះ ឈុន អ៊ឹម និងឈ្មោះកែវ ឈុនលី) បានមកប្ដឹងសមត្ថកិច្ចប៉ុស្ដិ៍ផ្សារដេប៉ូទី៣ ដោយអះអាងថា មានជនល្មើស២នាក់ប្រដាប់ដោយកាំភ្លើងខ្លីចំនួន២ដើម បានតាមរូបនាង (កែវ ឈុនលី)មកដល់លើផ្ទះ(ជាន់ទី១) ខណៈពេលដែលនាងធ្វើដំណើរមកពីខួបកំណើតកូនមិត្ដភក្ដិនៅឯភោជនីយដ្ឋានឡាក់គីស្ដារវិញ ។ នៅក្នុងសកម្មភាពប្លន់នោះពួកចោរបានយកអស់គ្រឿងអលង្ការនិងប្រាក់សរុប១០.១០០ ដុល្លារ ។ ក្រោយពេលកើតហេតុរូបគេបាន ហៅកូនជាងអ៊ុតសក់ចំនួន២នាក់មកធ្វើជាសាក្សី និងសុំឱ្យម្ចាស់ផ្ទះជួយធ្វើជាសាក្សីប្រាប់សមត្ថកិច្ចថាពិតជាត្រូវចោរប្លន់មែន ។ នៅក្នុងលិខិតនោះក៏បានបញ្ជាក់ថា ការប្ដឹងនោះពុំមែនជាការពិតទេ គឺប្រឌិតដើម្បីឱ្យសមត្ថកិច្ចជឿពីព្រោះលុយនិងគ្រឿងអលង្ការបានបាត់បង់ដោយសារតែចាញ់ល្បែងនៅណាហ្គាអស់ ។នៅចំពោះមុខសមត្ថកិច្ចដដែលស្ដ្រីទាំង២នាក់ម្ដាយកូនបានទទួលកំហុសទាំងស្រុងនិងសុំការអធ្យាស្រ័យពីសមត្ថកិច្ចខណ្ឌទួលគោកក៏ដូចជាអាជ្ញាធរខណ្ឌរាល់កំហុសឆ្គង ដែលបានប្រព្រឹត្ដដោយគ្មានការពិចារណា និងបានសន្យាជាមួយសមត្ថកិច្ចថាឈប់លេងល្បែងស៊ីសង លែងប្រឌិតសភាពការណ៍លែងបោកប្រាស់និងភូតកុហសមត្ថកិច្ចទៀតហើយ ។ បន្ទាប់ពីធ្វើលិខិតសារភាពកំហុសនៅចំពោះមុខសមត្ថកិច្ចរួចមកលោកហួត ចាន់យ៉ារ៉ាន់ អធិការខណ្ឌទួលគោកក៏បានធ្វើ ការណែនាំដល់ស្ដ្រីដែលឈ្លក់នឹងល្បែងនេះឱ្យឈប់លេងល្បែងស៊ីសងទៀតពីព្រោះវានាំឱ្យខាតបង់ពេលវេលាប្រាក់កាសនិងកិត្ដិយស។
ចែករំលែកព័តមាននេះ