គ.ជ.ប ៖ យុទ្ធនាការឃោសនាបោះឆ្នោតព្រឹទ្ធសភានីតិកាលទី៤រយៈពេល១៣ថ្ងៃមានភាពល្អប្រសើរ

ថ្ងៃទី ២៥ ខែ កុម្ភៈ ឆ្នាំ ២០១៨

ម៉ោង ១៥:៣២

រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ គ.ជ.ប បានអះអាងថា ក្នុងរយៈពេលធ្វើយុទ្ធនាការរឃោសនាបោះឆ្នោតព្រឹទ្ធសភា នីតិកាលទី៤ ឆ្នាំ២០១៨ របស់គណបក្សនយោបាយមានភាពល្អប្រសើរគ្មានហិង្សា និងគ្មានបណ្តឹង ។ លោក ឌឹម សុវណ្ណារុំ អ្នកនាំពាក្យ និងជាសមាជិក គ.ជ.ប បានឲ្យដឹងក្នុងកិច្ចប្រជុំថ្ងៃបញ្ចប់យុទ្ធនាការឃោសនាបោះឆ្នោតនារសៀលថ្ងៃទី២៣ ខែកុម្ភៈ ឆ្នាំ ២០១៨ នៅទីស្តីការ គ.ជ.ប ថាយុទ្ធនាការឃោសនាបោះឆ្នោតរយៈពេល១៣ថ្ងៃបានប្រព្រឹទ្ធទៅមានភាពរលូនល្អប្រសើរ គ្មានហិង្សា និងគ្មានបណ្តឹងនោះទេ ។

លោកបន្តថា ការបោះឆ្នោតជ្រើសរើសតាំងសមាជិកព្រឹទ្ធសភាជាការបោះឆ្នោតអសកលហើយមានការិយាល័យបោះឆ្នោតចំនួន៣៣ ការិយាល័យចែកចេញជា ៨ភូមិភាគ និង៨មណ្ឌល ។ ភូមិភាគទី១ នៅ ភ្នំពេញ មានការិយាល័យចំនួនមួយ, ភូមិភាគទី២មាននៅ ខេត្តកំពង់ចាម មានមួយការិយាល័យ និង ខេត្តត្បូងឃ្មុំមួយការិយាល័យ, ភូមិភាគទី៣ នៅខេត្តកណ្តាល មានមួយការិយាល័យ, ភូមិភាគទី៤មានខេត្តបាត់ដំបង មានមួយការិយាល័យ ខេត្តបន្ទាយមានជ័យ មួយការិយាល័យ ខេត្តប៉ៃលិន មួយការិយាល័យ, ភូមិភាព៥ មាននៅខេត្តកំពត មួយការរិយាល័យ ខេត្តតាកែវ មួយការិយាល័យ ខេត្តកែប មួយការិយាល័យ, ភូមិភាគទី៦ មាននៅខេត្តព្រៃវែង មួយការិយាយល័យ ខេត្តស្វាយវៀងមួយការិយាល័យ, ភូមិភាគទី៧ មាននៅខេត្តកំពង់ស្ពឺ មួយការិយាល័យ ខេត្តកំពង់ឆ្នាំ មួយការិយាល័យ ខេត្តពោធិ៍សាត់ មួយការិយាល័យ ខេត្តកោះកុង មួយការិយាល័យ ខេត្តព្រះសីហនុ មួយការិយាល័យ និងភូមិភាគទី៨ នៅខេត្តកំពង់ធំ មួយការិយាល័យ ខេត្តព្រះវិហារ មួយការិយាល័យ ខេត្តក្រចេះ មួយការិល័យ ខេត្តស្ទឹងត្រែង មួយការិយាល័យ ខេត្តរតនគិរី មួយការិយាល័យ ខេត្តមណ្ឌលគិរី មួយការិយាល័យ ។

អ្នកនាំពាក្យ គ.ជ.ប បានឲ្យដឹងទៀតថា សម្រាប់ការបោះឆ្នោតព្រឹទ្ធសភានេះដែរអ្នកសង្កេតការណ៍ជាតិនិងអ្នកសង្កេតការណ៍អន្តរជាតិដែលមានអ្នកសង្កេតការណ៍ចូលរួមចំនួន២៧៦នាក់ ។ អ្នកការណ៍អន្តរជាតិមានមកពីប្រទេសម៉ាឡេស៊ី និងជប៉ុន ។ ចំណែកអ្នកសារព័ត៌មានជាង៣០០នាក់ មកពីស្ថាប័នជាតិ និងអន្តរជាតិ ៕