រាជធានីភ្នំពេញ ៖ ប៉ុន្មានឆ្នាំចុងក្រោយនេះ អគារខុនដូ និងអាផាតមិនជាច្រើនបានដាក់ចូលទីផ្សារ ប៉ុន្តែប្រជាពលរដ្ឋមួយចំនួនមិនដឹងថា អគារមួយណាជាខុនដូ និងមួយណាជាអាផាតមិន នោះទេ ។
ថ្ងៃនេះ កោះសន្តិភាពសូមនាំយកចំណេះដឹងថ្មីនេះ មកជូនអ្នកអានបានឈ្វេងយល់ពីវិស័យថ្មី និងកំពុងតែមានភាពលេចធ្លោនេះ ។
១-អាផាតមិន ៖
នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានមានប្រសាសន៍ថា អគារអាផាតមិន ទោះជាក្នុងរូបភាពណាក៏ដោយ ក៏សំដៅដល់អគារខ្ពស់ឬទាបមានច្រើនបន្ទប់ ដែលអ្នកវិនិយោគសាងសង់ឡើងសម្រាប់ជួល និងមានប្រព័ន្ធគ្រប់គ្រងច្បាស់លាស់ ឬមានក្រុមហ៊ុនគ្រប់គ្រងអចលនទ្រព្យជំនាញជាអ្នកគ្រប់គ្រង ដើម្បីផ្តល់សេវាកម្មឲ្យអ្នកស្នាក់នៅមានអារម្មណ៍កក់ក្តៅ និងផាសុកភាព ហើយអាផាតមិន មានម្ចាស់តែម្នាក់ប៉ុណ្ណោះ គឺអ្នកវិនិយោគសាងសង់អគារនោះសម្រាប់ជួល ។
អ្នកនាងបន្ដថា នៅក្នុងអាផាតមិន មានបែងចែកជា២ផងដែរ គឺសេវាអាផាតមិន (Service Apartment) និងអាផាតមិនធម្មតា (Apartment) ។
អ្នកនាងថា ៖« សេវាអាផាតមិន គឺសំដៅដល់អាផាតមិនកម្រិត A ឬ B ដែលមានសេវាកម្មពេញលេញ ដូចជា អាងហែលទឹក កន្លែងហាត់ប្រាណ ស្ទីម សោណា ភោជនីយដ្ឋាន ឬមីនីម៉ាត និងប្រព័ន្ធអុីនធើរណេតល្បឿនលឿនជាដើម ។ ចំណែកអាផាតមិនធម្មតា សំដៅដល់អាផាតមិន ដែលអ្នកវិនិយោគមិនផ្តល់សេវាកម្មពេញលេញជូនអតិថិជនដែលចូលស្នាក់នៅ ឬជួលបន្ទប់របស់ម្ចាស់អគារនោះទេ » ។
២-អគារខុនដូ ៖
អគារខុនដូ មានសណ្ឋានដូចគ្នានឹងអាផាតមិនដែរ ប៉ុន្តែអ្នកវិនិយោគខុនដូសាងសង់ឡើងសម្រាប់លក់ផ្ទះ ឬបន្ទប់នៅក្នុងអគារនោះដល់អតិថិជន ដែលគេនិយមហៅអគារខុនដូ ជាអគារបែបសហកម្មសិទ្ធិ ដោយសារខុនដូនីមួយៗមានម្ចាស់ច្រើន និងប្រើប្រាស់សេវាកម្មរួម ជាការរស់នៅបែបសហគមន៍រួមមួយ ។
ដោយសារសម័យកាលកាន់តែរីកចម្រើន និងការប្រកួតប្រជែងគ្នាកើនឡើង បានធ្វើឲ្យអ្នកវិនិយោគខុនដូកាន់តែមានគំនិតច្នៃប្រឌិតលើគម្រោងវិនិយោគរបស់ពួកគេ ដើម្បីទាក់ទាញអ្នកទិញខុនដូរបស់ខ្លួនផង និងដើម្បីរកប្រភពចំណូលបន្ថែមផង ។
បច្ចុប្បន្ននេះ អ្នកវិនិយោគខ្លះបានសាងសង់ផ្សារទំនើប មានសេវាកម្មការិយាល័យ និងភោជនីយដ្ឋានផ្សេងៗ ដើម្បីធ្វើឲ្យគម្រោងរបស់ខ្លួនកាន់តែមានភាពទាក់ទាញផងដែរ ៕
ចែករំលែកព័តមាននេះ