រាជធានីភ្នំពេញ ៖ កម្មវិធីPropertyGuru Cambodia Property Awards ឆ្នាំ២០១៨ ជាព្រឹត្តិការណ៍ដ៏សំខាន់មួយសម្រាប់អ្នកអភិវឌ្ឍន៍វិស័យអចលនទ្រព្យនៅកម្ពុជា ដែលនឹងទទួលបានពានរង្វាន់ជាច្រើនតាមរយៈការវាយតម្លៃពីស្នាដៃឆ្នើម និងកិច្ចខិតខំប្រឹងប្រែងចូលរួមចំណែកអភិវឌ្ឍន៍សង្គមពីមួយឆ្នាំទៅមួយឆ្នាំ…
រាជធានីភ្នំពេញ ៖ កម្មវិធីPropertyGuru Cambodia Property Awards ឆ្នាំ២០១៨ ជាព្រឹត្តិការណ៍ដ៏សំខាន់មួយសម្រាប់អ្នកអភិវឌ្ឍន៍វិស័យអចលនទ្រព្យនៅកម្ពុជា ដែលនឹងទទួលបានពានរង្វាន់ជាច្រើនតាមរយៈការវាយតម្លៃពីស្នាដៃឆ្នើម និងកិច្ចខិតខំប្រឹងប្រែងចូលរួមចំណែកអភិវឌ្ឍន៍សង្គមពីមួយឆ្នាំទៅមួយឆ្នាំ ។
ព្រឹត្តិការណ៍នេះ នឹងរៀបចំឡើងនៅថ្ងៃទី១៦ មីនា ឆ្នាំ២០១៨ នៅសណ្ឋាគារសូហ្វីតែល ភ្នំពេញ ភូគីត្រា ហើយអ្នកដែលឈ្នះនូវប្រភេទពានរង្វាន់ល្អជាងគេបំផុត នឹងត្រូវបានចូលរួមប្រកួតក្នុងកម្មវិធី PropertyGuru Asia Property Awards លើកទី៨ ដែលជាវគ្គផ្តាច់ព្រ័ត្រ នឹងប្រព្រឹត្តទៅជាលើកដំបូងនៅទីក្រុងបាងកក ប្រទេសថៃ ក្នុងខែវិច្ឆិកា ឆ្នាំ២០១៨នេះ ។ នេះបើយោងតាមការលើកឡើងរបស់អ្នកគ្រប់គ្រងជាន់ខ្ពស់នៃកម្មវិធី ។
លោក Terry Blackburn ស្ថាបនិក និងជានាយកគ្រប់គ្រង PropertyGuru Asia Property Awards បានថ្លែងថា ពានរង្វាន់អចលនទ្រព្យនេះ គឺផ្ដោតយ៉ាងខ្លាំងចំពោះកិច្ចខិតខំប្រឹងប្រែងរបស់អ្នកអភិវឌ្ឍន៍កម្ពុជា ក្នុងការកែលម្អពីមួយឆ្នាំទៅមួយឆ្នាំ ជាពិសេសក្នុងផ្នែកប្រើប្រាស់អគារចម្រុះដែលកាន់តែមានប្រជាប្រិយភាពក្នុងចំណោមអ្នកវិនិយោគ និងអ្នកប្រើប្រាស់ ។
លោកបន្ដថា ៖« កម្ពុជាផ្ដល់នូវសក្តានុពលភាពជាច្រើន ហើយយើងមានមោទនភាពចំពោះអ្នកអភិវឌ្ឍន៍ក្នុងស្រុកដែលបានសម្រេចស្នាដៃ២ឆ្នាំកន្លងមកនេះ ក្នុងកម្មវិធីប្រគល់ពានរង្វាន់ ហើយយើងទទួលស្គាល់នូវការរួមចំណែករបស់ពួកគេក្នុងវិស័យនេះផងដែរ » ។
លោកបញ្ជាក់បន្ដថា ក្រុមហ៊ុនដែលជាប់ក្នុងបញ្ជីជម្រើសដំបូងនឹងត្រូវបានប្រកាសឈ្មោះសម្រាប់អ្នកឈ្នះពានរង្វាន់នៅល្ងាចថ្ងៃសុក្រ ទី១៦ ខែមីនា ឆ្នាំ២០១៨ នៅសណ្ឋាគារសូហ្វីតែល ភ្នំពេញ ភូគីត្រា ។
លោក សន សៀប ស្ថាបនិក និងនាយកក្រុមហ៊ុន Key Real Estate Co., Ltd. ដែលជាសមាជិកម្នាក់របស់គណៈកម្មការវាយតម្លៃ បានឲ្យដឹងថា វិស័យអចលនទ្រព្យនៅប្រទេសកម្ពុជាកំពុងមានភាពសកម្មយ៉ាងខ្លាំង ដោយឃើញថា មានការកើនឡើង២២%ពីមួយឆ្នាំទៅមួយឆ្នាំ ធ្វើឲ្យតម្លៃដីកើនឡើង ហើយប្រែក្លាយភ្នំពេញពីរាជធានីអគារទាប ទៅជាមជ្ឈមណ្ឌលអគារខ្ពស់ ។
លោកថ្លែងថា ៖« ឧស្សាហកម្មអចលនទ្រព្យពិតជាបានដើរតួនាទីយ៉ាងសំខាន់ក្នុងកំណើនសេដ្ឋកិច្ចកម្ពុជា ។ កាលពីឆ្នាំថ្មីៗនេះ ភ្នំពេញបានវិវត្តន៍យ៉ាងឆាប់រហ័ស ដែលទាក់ទាញអ្នកវិនិយោគធំៗមកពីជុំវិញតំបន់ដើម្បីវិនិយោគលើវិស័យអចលនទ្រព្យនៅកម្ពុជា និងក្នុងវិស័យសំណង់ ។ នៅដំណាច់ឆ្នាំ២០១៧ ប្រទេសចិនបានក្លាយជាអ្នកវិនិយោគធំជាងគេបង្អស់ បន្ទាប់មកគឺកូរ៉េ ជប៉ុន សិង្ហបុរី ថៃ ម៉ាឡេស៊ី តៃវ៉ាន់ និងប្រទេសអឺរ៉ុបផ្សេងទៀត » ។
លោកបានមានប្រសាសន៍ថា ក្រៅពីអគារខ្ពស់ៗ អចលនទ្រព្យដីធ្លីកាន់តែមានប្រជាប្រិយភាពចំពោះអ្នកទិញ ហើយមានការផ្គត់ផ្គង់ច្រើន និងតម្រូវការខ្ពស់ ។ លោកបន្ថែមថា «ក្រៅពីនេះ ឧស្សាហកម្មទាំងមូលក៏បានបង្កើតការងារកាន់តែច្រើនសម្រាប់ប្រជាជនកម្ពុជាផងដែរ » ។
គួរបញ្ជាក់ថា ព្រឹត្តិការណ៍នេះ មានពានរង្វាន់ទាំងអស់ចំនួនជាង២០ប្រភេទ និងមានលក្ខណៈពិសេសផ្សេងៗគ្នា ។ បុរី ប៉េង ហួត គ្រុប ជាអ្នកដែលបានឈ្នះ២លើករួចមកហើយនូវពានរង្វាន់អ្នកអភិវឌ្ឍន៍ល្អបំផុត ហើយឆ្នាំនេះទទួលបាន១៦កន្លែងនៅក្នុងបញ្ជីជម្រើសដំបូង ដែលមានចំនួនច្រើនជាងអ្នកអភិវឌ្ឍន៍ផ្សេងទៀត។ អ្នកអភិវឌ្ឍន៍ Greater Euro Ville ក្នុងគម្រោងប្រើប្រាស់ចម្រុះទទួលបាន៥រង្វាន់សម្រាប់ការអភិវឌ្ឍ និង១០រង្វាន់ក្នុងប្រភេទឌីហ្សាញ បូកនឹងការស្ងើចសរសើរពិសេសសម្រាប់គំនិតផ្ដួចផ្ដើមអំពីទំនួលខុសត្រូវសង្គម ៕
ចែករំលែកព័តមាននេះ