រាជធានីភ្នំពេញ ៖ ក្នុងឱកាសបិទសន្និសីទជាតិ សម្តេចតេជោ បានមានប្រសាសន៏ដាស់តឿនថា «អ្វីដែលខ្ញុំចង់និយាយ សំដៅគឺនៅត្រង់ថា ខ្ញុំមិនចង់បានអ្វីក្រៅពីអស់លោកអនុវត្តន៍ច្បាប់តែប៉ុណ្ណោះ ។ ព្រោះកន្លងទៅក៏មានការសង្កេតឃើញថា…
រាជធានីភ្នំពេញ ៖ ក្នុងឱកាសបិទសន្និសីទជាតិ សម្តេចតេជោ បានមានប្រសាសន៏ដាស់តឿនថា «អ្វីដែលខ្ញុំចង់និយាយ សំដៅគឺនៅត្រង់ថា ខ្ញុំមិនចង់បានអ្វីក្រៅពីអស់លោកអនុវត្តន៍ច្បាប់តែប៉ុណ្ណោះ ។ ព្រោះកន្លងទៅក៏មានការសង្កេតឃើញថា ស្ថាប័នមួយចំនួន ឬក៏អជ្ញាធរថ្នាក់ក្រោមជាតិមួយចំនួន មិនទាន់អនុវត្តន៍ច្បាប់នៅឡើយទេ គឺនៅអនុវត្តន៍បទបញ្ជានៅឡើយ ។»
ពាក់ព័ន្ធករណីខាងលើនេះ សម្តេចតេជោ បានធ្វើការរំឭកដាស់តឿនជាថ្មីម្តងទៀតថា «សូមលោក លោកស្រី ជាប្រធានស្ថាប័នធ្វើការខិតខំ ។ កំណែទម្រង់នៅក្នុងដំណាក់កាលរដ្ឋសភានីតិកាលទី៦ នាពេលខាងមុខ ក៏ជាផ្នែកមួយ នៃលក្ខខណ្ឌដើម្បីពិនិត្យមើលស្ថាប័នណាទៅមុខ ស្ថាប័នណាមិនទៅមុខ រដ្ឋមន្ត្រីណាធ្វើកើត រដ្ឋមន្ត្រីណាធ្វើមិនកើត ។ នេះជាចំណុចដែលត្រូវរំឭក ។ ខ្ញុំមិនចង់បានការអនុវត្តន៍បទបញ្ជាទេ ការអនុវត្តច្បាប់ទើបវាអាចដំណើរការបានត្រឹមត្រូវជាង ។ គ្មានជោគជ័យណាមួយដែលអ្នកទទួលខុសត្រូវមិនព្រមផ្តល់ឱកាសដល់អ្នកដទៃចូលរួម ហើយគិតតែឱបក្រសោបការងារនៅឯថ្នាក់កណ្តាល ។ ពិតមែនហើយ មានកិច្ចការខ្លះវាជាកិច្ចការអធិបតេយ្យ ដែលថ្នាក់ជាតិត្រូវគ្រប់គ្រង ។ ប៉ុន្តែកិច្ចការជាច្រើនដែលរុញទៅឲ្យថ្នាក់ក្រោមជាតិត្តូវធ្វើវាមានប្រសិទ្ធភាពច្រើនជាង ។ គឺការផ្ទេរមុខងារឲ្យបានច្បាស់ តើមុខងារណាថ្នាក់កណ្តាលដែលត្រូវធ្វើ មុខងារណាថ្នក់មូលដ្ឋានដែលត្រូវធ្វើ ។»
សម្តេចតេជោ បានបញ្ជាក់ថា «ជាក់ស្តែងនៅក្នុងឆ្នាំ២០១៨ នេះ ថវិកាប្រមាណជាង៤៣០លានដុល្លារ ត្រូវបានផ្ទេរទៅឲ្យរដ្ឋបាលថ្នាក់ក្រោមជាតិទាំង៣ថ្នាក់ ដើម្បីចាត់ចែងប្រើប្រាស់ដោយឆន្ទានុសិទ្ធសម្រាប់ចំណាយទៅលើការងាររដ្ឋបាលទូទៅ និងការអនុវត្តនូវគម្រោងអភិវឌ្ឍមូលដ្ឋាន ។»
សម្តេចគូសបញ្ជាក់ថា ប្រយ័ត្នពាក្យឆន្ទានុសិទ្ធ (ផ្ទេរយកទៅទិញឡានជិះសិន ព្រោះចៅហ្វាយខេត្ត ចៅហ្វាយស្រុកខ្វះឡានជិះ) ។ អត់ទេណា ! រឿងធំជាងគេ គឺធ្វើឲ្យមានប្រសិទ្ធភាព ។ សង្ឃឹមថាថ្នាក់ដឹកនាំ និងមន្ត្រីរាជការគ្រប់ក្រសួងស្ថាប័ន និងរដ្ឋបាលថ្នាក់ក្រោមជាតិ ក៏ដូចជាអ្នកពាក់ព័ន្ធទាំងអស់ នឹងបន្តខិតខំប្រឹងប្រែងរួមគ្នាដើម្បីអនុវត្តឲ្យបានសម្រេចជោគជ័យ នូវចក្ខុវិស័យគោលដៅ និងបំណងនៃកម្មវិធីកែទម្រង់ ។»
ចែករំលែកព័តមាននេះ