រាជធានីភ្នំពេញ ៖ ក្រសួងប្រៃសណីយ៍ និងទូរគមនាគមន៍ បានប្រកាសបើកនូវកម្មវិធីថ្មីសន្លាងមួយឈ្មោះថា «ស្ត្រីកម្ពុជាក្នុងវិស័យបច្ចេកវិទ្យាឆ្នាំ២០១៨» ក្នុងគោលបំណងលើកទឹកចិត្តស្ត្រីឱ្យចូលរួមកាន់តែច្រើនផុសផុលនៅក្នុងវិស័យបច្ចេកវិទ្យា គមនាគមន៍ និងព័ត៌មាន ដើម្បីចូលរួមចំណែកក្នុងការពាំនាំ និងកែប្រែកម្ពុជាឱ្យក្លាយទៅជាប្រទេសមួយដែលមានសក្តានុពល និងរីកចម្រើននៅក្នុងយុគសម័យឌីជីថលនេះ ក៏ដូចជាបង្ហាញពីការតាំងចិត្តរបស់កម្ពុជាក្នុងការកាត់បន្ថយគម្លាតឌីជីថលក្នុងវិស័យយេនឌ័រ។ នេះបើយោងតាមសេចក្ដីជូនព័ត៌មានពីក្រសួងប្រៃសណីយ៍ និងទូរគមនាគមន៍ ។
កម្មវិធីនេះផ្តោតលើប្រធានបទ «ការផ្តល់សិទ្ធិអំណាចដល់ស្ត្រីតាមរយៈបច្ចេកវិទ្យា គមនាគមន៍ និងព័ត៌មាន» នឹងប្រកាសស្វែងរកបេក្ខភាពជាស្ត្រី ចាប់ពីថ្ងៃទី១៥ ខែកុម្ភៈ រហូតដល់ថ្ងៃទី២៨ ខែកុម្ភ: ឆ្នាំ២០១៨ ។ បន្ទាប់មកក្រសួងនឹងធ្វើការជ្រើសរើស ហើយវាយតម្លៃរកស្ត្រីឆ្នើមដែលមានគុណសម្បត្តិគ្រប់គ្រាន់ ។ អ្នកជ័យលាភីចំនួន៣រូប នឹងត្រូវផ្តល់កិត្តិយសទទួលពានរង្វាន់នៅថ្ងៃទី៧ ខែមីនា ឆ្នាំ២០១៨ ខាងមុខ ។
ពាក់ព័ន្ធនឹងការរៀបចំកម្មវិធីនេះ លោកបណ្ឌិត កាន ច័ន្ទមេត្តា រដ្ឋលេខាធិការនៃក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា ៖« កន្លងមក យើងមើលឃើញថា ស្ត្រីកម្ពុជាមានចំនួនតិចតួចណាស់ដែលបានចាប់យកជំនាញ និងធ្វើការក្នុងវិស័យនេះ ទោះជាពួកគាត់មានសមត្ថភាព និងការច្នៃប្រឌិតប្លែកៗមិនចាញ់បុរសក៏ដោយ » ។
លោកបន្ដថា ៖« ដើម្បីជំរុញការចូលរួមបន្ថែមទៀត យើងចាំបាច់ត្រូវបង្កើតកម្មវិធីលើកទឹកចិត្តនានា ។ ជាលទ្ធផល ពានរង្វាន់ស្ត្រីឆ្នើមក្នុងវិស័យបច្ចេកវិទ្យានេះ នឹងជួយបំផុសទឹកចិត្តឱ្យស្ត្រីដទៃទៀតចាប់អារម្មណ៍ និងចូលរួមជាបន្តបន្ទាប់ » ។
កម្មវិធីនេះ មានពានរង្វាន់ផ្នែកបច្ចេកវិទ្យាចំនួន៣ប្រភេទគឺ ៖
១-សហគ្រិនឆ្នើមស្ត្រីក្នុងបច្ចេកវិទ្យា (Cambodian Woman ICT Entrepreneur Award)
២-វិស្វករស្ត្រីជោគជ័យក្នុងជំនាញបច្ចេកវិទ្យា គមនាគមន៍ និងព័ត៌មានវិទ្យា (Cambodian Woman ICT Engineer Award)
៣-ស្ត្រីដែលបានចូលរួមជំរុញនូវការប្រើប្រាស់បច្ចេកវិទ្យាសម្រាប់ការអភិវឌ្ឍសង្គម ឬសហគមន៍ (Cambodian Woman ICT For Community Award)
សូមបញ្ជាក់ថា ស្ត្រីឆ្នើមនៅកម្ពុជាទាំង៣ប្រភេទដែលបានជ្រើសរើស ត្រូវតែជាក្រុមស្ត្រីកម្ពុជាដែលមានសក្តានុពលក្នុងផ្នែកបច្ចេកវិទ្យា មានភាពជាអ្នកដឹកនាំខ្ពស់ ព្រមទាំងបានប្រើប្រាស់នូវជំនាញរបស់ខ្លួន ដើម្បីបម្រើការក្នុងស្ថាប័ន ក៏ដូចជានៅក្នុងសហគមន៍របស់ខ្លួន រហូតមកដល់ពេលបច្ចុប្បន្ននេះ ។ ក្រៅពីនេះ ពួកគាត់ក៏ត្រូវតែជាស្ត្រីកម្ពុជាដែលបានលះបង់ពេលវេលា និងកម្លាំងកាយចិត្តរបស់ខ្លួនដោយស្ម័គ្រចិត្ត ដើម្បីចូលរួមយ៉ាងសកម្មនៅក្នុងការស្វែងរកដំណោះស្រាយផ្នែកណាមួយក្នុងវិស័យបច្ចេកវិទ្យា សម្រាប់យកមកបម្រើផលប្រយោជន៍ក្នុងសង្គមកម្ពុជាជារួម ។
សាធារណជនអាចចូលរួមក្នុងកម្មវិធីនេះបានដែរ ដោយស្នើបេក្ខភាពស្ត្រីដែលលោកអ្នកគិតថា ជាស្ត្រីឆ្នើម ឬស្ត្រីគំរូក្នុងវិស័យនេះ ។ ការស្នើបេក្ខភាពអាចធ្វើឡើងតាមប្រព័ន្ធអនឡាញ ដោយគ្រាន់តែចូលទៅកាន់ http://cbrd.gov.kh/nominations ដើម្បីបំពេញបែបបទស្នើបេក្ខភាព ៕
ចែករំលែកព័តមាននេះ