សម្ដេចតេជោ៖ មិនមែនឲ្យអស់លោកអនុវត្តបទបញ្ជាទេ ឲ្យអស់លោកអនុវត្តច្បាប់ !
- ភ្នំពេញ
រាជធានីភ្នំពេញ ៖ នាព្រឹកថ្ងៃទី១៣រោច ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១៣ ខែកុម្ភៈ គ.ស២០១៨…
រាជធានីភ្នំពេញ ៖ នាព្រឹកថ្ងៃទី១៣រោច ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១៣ ខែកុម្ភៈ គ.ស២០១៨ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញប្រគល់សញ្ញាបត្រ ថ្នាក់បរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិត ជូនដល់និស្សិតសាកលវិទ្យាល័យ វេស្ទើន ចំនួន៤.១៥៨នាក់ នៅមជ្ឈមណ្ឌសន្និបាត និងពិព័រកោះពេជ្រ។ សម្តេចតេជោនាយករដ្ឋមន្ត្រី បានមានប្រសាសន៍ថា កាលពីចុងឆ្នាំ ពិភពលោកខ្វល់ខ្វាយពីរឿងបញ្ហានុយក្លេអែរកូរ៉េខាងជើង ក៏ប៉ុន្តែប៉ុន្មានថ្ងៃថ្មីៗនេះ កម្ពុជាពិតជាមានការ លើកទឹកចឹត្តមួយ ដោយសារមេដឹកនាំកូរ៉េខាងជើង និងមេដឹកនាំកូរ៉េខាងត្បូង រកវិធីសន្ទនាជាមួយគ្នា ដែលខ្ញុំគិតថា ប្រទេសមហាអំណាចទាំងអស់ ឬក៏មិនមហាអំណាចក៏គួរតែអបអរសាទរ និងលើកទឹកចឹត្តឲ្យកូរ៉េទាំងពីរសហការគ្នា។
សម្តេចបន្តថា សភាពការណ៍នេះ ក្នុងនាមរាជរដ្ឋាភិបាលកម្ពុជា សម្តេចតេជោ សូមសម្ដែងអំណរសាទរជាមួយនឹង ទំនាក់ទំនងដែលត្រូវបានកែលំអរបើទោះបីបានក្នុងរយៈពេលខ្លីក៏ដោយក៏ប្រសើរជាងភាពតានតឹង។ យើងអបអរសាទរជាមួយទំនាក់ទំនងថ្មីៗ ការស្វះស្វែងរកការសម្រុះសម្រួលថ្មីរវាងកូរ៉េទាំងពីរ។ សង្ឃឹមថាប្រទេសនានានឹងបន្តការលើកទឹកចឹត្តឲ្យកូរ៉េទាំងពីរអនុវត្តក្នុងដំណើរឆ្ពោះទៅរកការស្រុះស្រួលកាត់បន្ថយនូវភាពតានតឹង។ សម្តេចតេជោនាយករដ្ឋមន្ត្រី បានមានប្រសាសន៍សង្កត់ធ្ងន់ថា មន្ត្រីរបស់យើងអនុវត្តច្បាប់ ឬអនុវត្តបទបញ្ជា? ច្បាប់មានហើយមិនឲ្យមានតទ្រុងឡានម៉េចក៏មិនអនុវត្ត បានដល់នាយករដ្ឋមន្ត្រីបញ្ជាបាននាំគ្នាអនុវត្ត។
សម្តេចបន្តថា ចំណុចនេះគឺជាចំណុចគ្រោះថ្នាក់ខ្លាំងណាស់សម្រាប់ប្រព័ន្ធគ្រប់គ្រងមួយ។ មិនមែនឲ្យអស់លោកអនុវត្តបទបញ្ជាទេ ឲ្យអស់លោកអនុវត្តច្បាប់។ គ្រប់ស្ថាប័នទាំងអស់តែងមានច្បាប់ស្តីពីការបង្កើតស្ថាប័ន ហើយមានអនុក្រឹត្យស្តីពីការរៀបចំ និងងការប្រព្រឹត្រទៅនៃស្ដាប័ននោះ។ រឿងនេះបើសិនបន្តទុកស្ថានភាពបែបនេះគឺអាក្រក់ណាស់ វាមិនគួរឲ្យកើតនូវស្ថានភាពនេះទេ។ បើសិនអនុវត្តច្បាប់ឲ្យទៀងទាត់គ្មានអ្វីកើតឡើងនូវឡានតទ្រុងហ្នឹងទេ។ ដែនដីណាដែនដីនោះទួលខុសត្រូវអត់មានចាំបាច់ក្រសួងសាធារណៈការទេ។ មន្ត្រីអនុវត្តច្បាប់ទៅលើបញ្ហាចរាចរណ៍ផ្លូវគោកក៏មានច្រើនសណ្ឋានណាស់ដែលត្រូវធ្វើរឿងនេះ ត្រូវខិតខំធ្វើយ៉ាងម៉េចនៅក្នុងពេលចូលឆ្នាំចិនគឺកាត់បន្ថយគ្រោះថ្នាក់ចរាចរណ៍ និងកាត់បន្ថយអគ្គីភ័យ៕
ចែករំលែកព័តមាននេះ