រាជធានីភ្នំពេញ ៖ ជីវិតជាគ្រូទាយសន្លឹកបៀតាមមាត់ទន្លេ ខាងត្បូងមុខព្រះបរមរាជវាំង ដែលតែងតែមើលពីជោគជតារាសីសម្រាប់អ្នកមានជំនឿ បែរជាមានខ្សែជីវិតកម្សត់ខ្លាំងទៅវិញ ។ ពេលរ៉ឺម៉កម៉ូតូត្រឡប់ទៅផ្ទះស្ទើរមិនបាន តែក៏មានគ្រូទាយខ្លះបានក្លាយខ្លួនជាអ្នកមានដែរ មានរថយន្តទំនើបជិះ…
រាជធានីភ្នំពេញ ៖ ជីវិតជាគ្រូទាយសន្លឹកបៀតាមមាត់ទន្លេ ខាងត្បូងមុខព្រះបរមរាជវាំង ដែលតែងតែមើលពីជោគជតារាសីសម្រាប់អ្នកមានជំនឿ បែរជាមានខ្សែជីវិតកម្សត់ខ្លាំងទៅវិញ ។ ពេលរ៉ឺម៉កម៉ូតូត្រឡប់ទៅផ្ទះស្ទើរមិនបាន តែក៏មានគ្រូទាយខ្លះបានក្លាយខ្លួនជាអ្នកមានដែរ មានរថយន្តទំនើបជិះ មានខុនដូជួល ហើយមានបន្ទប់ម៉ាស៊ីនត្រជាក់សម្រាប់ទទួលភ្ញៀវដែលមកទស្សន៍ទាយ ស្រោចទឹកមន្តលើករាសី រៀបបាយសីចម្លងគ្រោះ ។
អ្នកគ្រូ មាស សុខវ៉ារី អាយុ៥៧ឆ្នាំ រស់នៅភូមិព្រែកធំ ឃុំក្បាលកោះ ស្រុកកៀនស្វាយ ខេត្តកណ្តាល មានមុខរបរជាគ្រូទាយសន្លឹកបៀ នៅមុខសាលាឧទ្ធរណ៍មាត់ទន្លេ វិថីព្រះស៊ីសុវត្ថិ សង្កាត់ជ័យជំនះ ខណ្ឌដូនពេញ បានរៀបរាប់ឲ្យដឹងថា អ្នកគ្រូបានប្រកបមុខរបរជាគ្រូទាយសន្លឹកបៀនេះ អស់រយៈពេលជាង១០ឆ្នាំមកហើយដើម្បីចិញ្ចឹមកូនប្រុស-ស្រី៥នាក់ ដោយមានគ្រូស្ថិតក្នុងរាងកាយ ដែលទាយទៅតាមអ្នកមកមើល ជួនពេលខ្លះលោកតាចតុម្មុខយាងចូល ពេលខ្លះនាគរាជខ្មៅ ហើយពេលខ្លះលោកយាយរាជចូលសណ្ឋិត អ្នកស្រីថាចំពោះអ្នកស្រី មិនមែនមានតែគ្រូមួយរូប ចូលសណ្ឋិតក្នុងរាងកាយទេ គឺច្របូកច្របល់តែម្តង ។
ជារៀងរាល់ថ្ងៃ អ្នកគ្រូត្រូវចំណាយលុយអស់៤ម៉ឺនរៀលសម្រាប់ជិះម៉ូតូរ៉ឺម៉ក់ (កង់បី) ពីផ្ទះមកកន្លែងទាយមុខវាំង ខណៈពេលនេះមិនសូវមានអ្នកមកទស្សន៍ទាយបៀទេ ហើយក្នុងមួយថ្ងៃពេលខ្លះរកបាន២ម៉ឺនរៀលទៅ៥ម៉ឺនរៀល តែបើហេង ចំថ្ងៃសីលមានភ្ញៀវមកទស្សន៍ច្រើន ក៏ទទួលបានកម្រៃគ្រាន់បើជាងថ្ងៃធម្មតាដែរ ។
អ្នកគ្រូបន្តទៀតថា ជាង១០ឆ្នាំកន្លងមកនេះ ជីវិតជាអ្នកគ្រូទាយសន្លឹកបៀ មិនមានការរីកចម្រើនសល់លុយកាក់នោះទេ គឺបានត្រឹមតែមួយថ្ងៃ សម្រាប់មួយថ្ងៃតែប៉ុណ្ណោះ ។ សម្រាប់អ្នកមកទាយ អ្នកគ្រូមិនតម្រូវឲ្យដាក់លុយតាមកំណត់នោះទេ ស្រេចតែតាមសទ្ធាអ្នកដែលមកទស្សន៍ទាយ ។
អ្នកគ្រូ មាស សុខវ៉ារី បានបញ្ជាក់ថា៖ «ជីវិតជាគ្រូទាយសម្រាប់ខ្ញុំគឺអភ័ព្វណាស់ មានប្តីមិនកបប្រាថ្នា ប៉ុន្តែខ្ញុំបានព្យាយាមចិញ្ចឹមបីបាច់កូនប្រុស-ស្រី៥នាក់បានធំធាត់រហូតមានមុខរបររៀងៗខ្លួន ហើយពេលនេះទោះបីជាជីវិតគ្រូទាយបៀមិនសូវកាក់កបក៏ពិតមែន ប៉ុន្តែខ្ញុំនៅតែបន្តមុខរបរនេះទៅមុខទៀត រហូតដល់ចាស់ជរាទើបឈប់ រួចចូលទៅវត្តកាន់ធម៌អាថ៌និងគេឯងមិនឲ្យកូនៗគេពិបាកនោះទេ »។
ដោយឡែកអ្នកគ្រូទាយសន្លឹកបៀកាលីបឈ្មោះ «អ្នកគ្រូម៉ាក់ស្រីពេជ្រ» ដែលទីតាំងនៅខាងជើងរមណីយដ្ឋានវត្តភ្នំ ស្ថិតក្នុងសង្កាត់វត្តភ្នំ ខណ្ឌដូនពេញ បានឲ្យកោះសន្តិភាពដឹងថា ឈ្មោះពិតរបស់អ្នកគ្រូ គឺ គឹម ធីតា ហៅម៉ាក់ស្រីពេជ្រ អាយុ៥១ឆ្នាំ មានកូនប្រុស ស្រីបីនាក់ ប្តីជាយោធា អ្នកគ្រូមានស្រុកកំណើតនៅភូមិពង្រ ឃុំពង្រ ស្រុកបារាយណ៍ ខេត្តកំពង់ធំ ។
អ្នកគ្រូបានប្រឡូកជីវិតជាអ្នកគ្រូទស្សន៍ទាយសន្លឹកបៀ នៅរមណីយដ្ឋានវត្តភ្នំតាំងពីដើមឆ្នាំ២០០០ ហើយអ្នកគ្រូកាន់បាធ្យាយដែលសំខាន់បំផុតគឺគុណម៉ែ គុណឪ គុណតា គុណយាយ គុណព្រះពុទ្ធ ព្រះធម៌ ព្រះសង្ឃ គុណម្ចាស់ទឹក ម្ចាស់ដី គុណបារមីដីខ្មែរទាំងអស់។ អ្នកគ្រូម៉ាក់ស្រីពេជ្រ បានរៀបរាប់ឲ្យដឹងថា ជីវិតជាអ្នកគ្រូទស្សន៍ទាយសន្លឹកបៀលើកដំបូងក្នុងមួយថ្ងៃទស្សន៍ទាយឲ្យភ្ញៀវបានត្រឹមតែពីរបីនាក់ប៉ុណ្ណោះ តែមួយរយៈពេលខ្លីក្រោយ ស្រាប់តែមានអតិថិជនមកច្រើន រហូតដល់ឈររង់ចាំ ។ ឃើញដូច្នេះគាត់ក៏បានជួលតូបផ្សេងៗទៀតបួនដប់តូប សម្រាប់ឲ្យភ្ញៀវអង្គុយរង់ចាំ ហើយការទស្សន៍ទាយរបស់អ្នកគ្រូឆុតទើបសំបូរភ្ញៀវ ។ ដំបូងឡើយអ្នកគ្រូទាយម្តងបានត្រឹមតែ១០០០រៀល ទៅ១៥០០រៀលប៉ុណ្ណោះឯង ។
ឥឡូវនេះទស្សន៍ទាយម្តងបានចាប់ពី១០ដុល្លារឡើង តែបើភ្ញៀវខ្លះមានការខ្វះខាតអ្នកគ្រូអាចទស្សន៍ទាយជូន ហើយភ្ញៀវជូនតាមសទ្ធាផងដែរ ហើយអ្វីដែលធ្វើឲ្យភ្ញៀវចាប់អារម្មណ៍ និងមានជំនឿខ្លាំងនោះ គឺអ្នកគ្រូពូកែខាងរៀបបាយសីថ្វាយម្ចាស់ទឹក ម្ចាស់ដី រៀបបណ្តែតទឹក រៀបក្រោមដើមពោធិ៍ រៀបថ្វាយបារមីលោកយាយដូនពេញ ព្រះអង្គព្រះចៅ រៀបនៅលើភ្នំឧដុង្គ។ ហើយការរៀបនេះសម្រាប់ឲ្យឯកឧត្តម លោកជំទាវ លោកឧកញ៉ា អ្នកមាន អ្នកក្រ ជោគជ័យក្នុងភារកិច្ចនិងរកទទួលទានមានបានសុខភាពល្អល្អក់ដី លក់ផ្ទះហើយត្រូវប៉ាន់ដី ។
អ្នកគ្រូនិយាយថា អាចធ្វើស្នេហ៍កុំឲ្យប្តីមានស្រី សង្សារណាបែកចិត្តឲ្យវិលត្រឡប់មកវិញ រួចរៀបការហើយបញ្ហាទាំងអស់នេះអ្នកគ្រូមិនទារលុយទំណិបមុននោះទេ ។ លុះបានសម្រេចទើបយក ក៏ប៉ុន្តែការរៀបចំបាយសីអ្នកគ្រូសុំលុយមុនខ្លះដើម្បីរៀបចំបាយសីទៅតាមបំណង ។
អ្នកគ្រូម៉ាក់ស្រីពេជក៏បានរៀបរាប់អំពីជីវិតពិតមុននិងក្រោយពេលក្លាយជាគ្រូទស្សន៍ទាយនាពេលបច្ចុប្បន្ននេះថា អ្នកគ្រូជាកូនកំព្រាឱពុក តាំងពីសម័យប៉ុល ពត ។ អ្នកគ្រូធ្លាប់លំបាកគ្រប់យ៉ាង ហើយរៀនផងធ្វើស្រែផង ព្រោះមានតែម្តាយ រួចអ្នកគ្រូចេះទាយតាំងពីអាយុ៧ឆ្នាំមកម្ល៉េះនិងចេះធម៌ដោយសាររស់នៅជាមួយជីតាតាំងពីអាយុ១ឆ្នាំ ។
អ្នកស្រី គឹម ចន្ថា អាយុ៣៥ឆ្នាំ ម្ចាស់ហាងលក់គ្រឿងបន្លាស់រថយន្តនៅផ្សារទួលសង្កែ ស្ថិតក្នុងសង្កាត់ស្រះចក ខណ្ឌដូនពេញ ជួបជាមួយកោះសន្តិភាព តែសុំមិនឲ្យថតរូបបាននិយាយថា ដោយសារតែអ្នកស្រីមានចិត្តរំភើបនិងដឹងគុណអ្នកគ្រូម៉ាក់ស្រីពេជ្រ ទើបមុខរបរលក់ដូរនាពេលបច្ចុប្បន្ននេះបានកាក់កបប្រសើរខ្លាំងណាស់ ក៏ដូចជាសុភមង្គលក្នុងជីវិតផងដែរ ។ អ្នកស្រីថាពីដើមឡើយអ្នកស្រីមិនសូវចាប់អារម្មណ៍លើអ្នកគ្រូម៉ាក់ស្រីពេជ្រ ដែលទស្សន៍ទាយសន្លឹកបៀ ការរៀបចំបាយសីតម្លើងរាសីនិងមុខរបរទទួលទាននោះទេ ដោយសារការលក់ដូរវាមិនសូវដាច់និងចង់បិទហាងម្តងៗ ទើបអ្នកស្រីប្រថុយមករកអ្នកគ្រូម៉ាក់ស្រីពេជ្រឲ្យជួយទស្សន៍ទាយតាមរយៈសន្លឹកបៀ ។
អ្នកស្រីបន្តថា ពេលនោះអ្នកគ្រូម៉ាក់ស្រីពេជ្រ ប្រាប់ថាត្រូវរៀបចំតាំងលម្អមុខផ្ទះនិងមុខហាងឲ្យស្របតាមក្បួនហុងស៊ុយ បានទាំងរៀបចំបាយសី និងស្រោចទឹកលើករាសីឲ្យទៀត ដោយបង្កក់ប្រសិទ្ធិយន្តគាថា មានទាំងទឹកអប់ម្សៅ យកទៅលាបទៀតផង ស្រាប់តែមានអតិថិជនចូលមកទិញជាបន្តបន្ទាប់ លក់ដាច់រាល់ថ្ងៃ ។
អ្នកស្រីថា មិនភ្លេចគុណបារមីអ្នកគ្រូម៉ាក់ស្រី ពេជ្រទេ ព្រោះបារមីបានធ្វើឲ្យអ្នកស្រីរកស៊ីចម្រុងចម្រើនទទួលបានសុភមង្គលក្នុងជីវិតដ៏ឧត្តម ។
ដោយឡែកអ្នកស្រី អ៊ី ឡាង សុំមិនឱ្យបញ្ចេញអាស័យដ្ឋានបានឲ្យដឹងថា ពីដើមអ្នកស្រីមានទុក្ខរឿងក្រុមគ្រួសារក៏ដូចជាមុខរបររកទទួលទាន អ្នកស្រីរត់រកអ្នកគ្រូទស្សន៍ទាយសន្លឹកបៀនៅមុខព្រះបរមរាជវាំង ដែលមានច្រើនកន្លែងមិនស័ក្តិសិទ្ធិ និយាយឲ្យចំគឺអត់ប្រយោជន៍ ។ ទើបថ្ងៃមួយមិត្តភក្តិបានប្រាប់ឲ្យទៅរកអ្នកគ្រូម៉ាក់ស្រីពេជ្រ នៅខាងជើងរមណីយដ្ឋានវត្តភ្នំ ។ ពេលមួយអ្នកស្រី បានមកពឹងអ្នកគ្រូម៉ាក់ស្រីពេជ្រ ឲ្យជួយទស្សន៍ទាយបៀ ដោយចង់ទិញដី តើវាចំណេញឬខាត ?
លុះបោះបៀទៅ អ្នកគ្រូប្រាប់ថាល្អណាស់ ព្រោះដីនោះមានហុងស៊ុយត្រូវប៉ាន់ទិញមិនខុសទេ ។ លុះទិញរួច ក៏មានគេមកសុំទិញបន្តឲ្យចំណេញដល់ទៅពាក់កណ្តាលឯណោះ ។ តាំងពីពេលនោះមក អ្នកស្រីតែងតែមកសុំយោបល់ជាមួយអ្នកគ្រូម៉ាក់ស្រីពេជ្រជារៀងរហូត ហើយបើអ្នកគ្រូប្រាប់យ៉ាងណាអ្នកស្រីក៏អនុវត្តន៍តាមមិនដែលខុសបំណងម្តងណាឡើយ ។ គាត់រៀបរាប់ថា សូម្បីតែកូនប្រុសម្នាក់ដែលដើរខុសគន្លងធម៌ លុះអ្នកគ្រូម៉ាក់ស្រីព្រេជ ប្រសិទ្ធីទឹកមន្តឲ្យអ្នកស្រី យកទៅឲ្យកូនប្រុសនោះផឹក ស្រាប់តែចេះកែខ្លួនដើរផ្លូវត្រូវវិញ និងលែងធ្វើបាបឪពុកម្តាយ ។
ងាកមកអ្នកគ្រូម៉ាក់ស្រីពេជ្រវិញ បានបញ្ជាក់ថា៖ «បច្ចុប្បន្ននេះដែរភ្ញៀវដែលមករកអ្នកគ្រូឲ្យទស្សន៍ទាយ រៀបចំបាយសីគឺមានទាំង លោកឧកញ៉ា លោកជំទាវអ្នកមុខអ្នកការ អ្នកមាន អ្នកក្រ គឺមកចម្រុះតែម្តង ហើយគាត់តែងតែមិនភ្លេចគុណខ្ញុំនោះទេ» ។ មុននិងក្លាយខ្លួនជាគ្រូទស្សន៍ទាយសន្លឹកបៀ និងឈានជើងចេញពីស្រុកកំណើតមករស់រាជធានីភ្នំពេញ សេចក្តីប្រាថ្នារបស់អ្នកគ្រូម៉ាក់ស្រីពេជ្រគឺចង់បានរទេះគោមួយ និងម៉ាស៊ីនដេរដើម្បីទៅស្រុកវិញធ្វើស្រែនិងរៀនកាត់ដេរតែប៉ុណ្ណោះ ។
តែពេលនេះសេចក្តីប្រាថ្នាហួសពីការចង់បាន គឺអ្នកគ្រូមានកូនប្រុស ស្រី៣នាក់ជាទីស្រឡាញ់ មានប្តីចិត្តល្អនិងមានខុនដូរសម្រាប់ជួលឲ្យអតិថិជនទៀតផង ហើយជីវិតរស់នៅពិតជាប្រសើរខ្លាំងណាស់ ។ នេះដោយសារតែភ្ញៀវអ្នកតូច អ្នកធំ មានជំនឿលើអ្នកគ្រូក្នុងការរៀបចំបាយសី ស្រោចទឹកប្រោះព្រំលើករាសី ទើបជីវិតអ្នកគ្រូមានបានរហូតមកដល់សព្វថ្ងៃដែលនឹកស្មានមិនដល់ ៕
ចែករំលែកព័តមាននេះ